Ubudasa abanyarwanda basabwa kugaragaza mu itegurwa n’ishyirwa mu bikorwa ry’igenamigambi rirambye

Yanditswe na Evariste Nsengimana
Kuya 15 Ugushyingo 2018 saa 11:54
Yasuwe :
0 0

Minisitiri w’Ubutegetsi bw’Igihugu, Prof. Shyaka Anastase, yasabye abaturage kugaragaza uruhare rwabo mu gutegura no gushyira mu bikorwa igenamigambi, kugira ngo risubize ibibazo bafite mu buryo burambye.

Ubu butumwa Prof. Shyaka yabutangiye mu Murenge wa Bukure, Akarere ka Gicumbi ku wa 13 Ugushyingo.

Yatangizaga ku rwego rw’igihugu, gahunda yo kwakira ibitekerezo by’abaturage bizagenderwaho mu gutegura igenamigambi ry’umwaka w’ingengo y’imari wa 2019/20.

Ati "Twese dufite amaboko abiri ariko abanyarwanda dushaka kwishakamo ibisubizo, dukeneye uruhare rwanyu no gufatanya mu kubishyira mu bikorwa."

Prof. Shyaka yavuze ko niba ari igikorwa runaka abaturage bifuza kuzagezwaho nk’amashuri, imihanda n’ibindi bikenera imbaraga z’abaturage, bakwiye kuzabikora, bakirinda gusaba bataragaragaza uruhare rwabo.

Prof. Shyaka yavuze ko bakwiye kujya bitabira imiganda irimo iyo kubaka, gutwara ibikoresho by’ubwubatsi, n’ubundi bufasha busaba imbaraga zatuma imihigo yeswa vuba, leta nayo ikunganira ku bindi bisaba amafaranga.

Yatanze urugero nk’amashuri y’uburezi bw’ibanze bw’imyaka 9 na 12, abanyarwanda bagaragaje ubushake n’ubushobozi mu miganda n’ibindi bagiye bakora, kuko agaciro kabyo kihariye 62% by’ingengo y’imari yatwaye.

Umunyamabanga wa Leta muri Minisiteri y’Imari n’Igenamigambi, ushinzwe Igenamigambi, Dr. Uwera Claudine, yavuze ko "iyo abaturage bagize uruhare mu gutegura no gushyira mu bikorwa igenamigambi banagira uruhare rwo kubirinda no kubisigasira, bigatuma igenamigambi riramba kuko baba babigizemo uruhare."

Abatuye muri uyu murenge basabye ko umwaka utaha bazahabwa amashuri y’incuke, abanza, ayisumbuye na Kaminuza, amashanyarazi, imihanda ya Kaburimbo, inganda n’ibindi.

Hategekimana Flouduard, yabwiye IGIHE ati "Iyi gahunda yo kuza kutubaza ibyo twifuza byazashyirwa mu igenamigambi ni nziza, ubundi mbere wabonaga bidakorwa neza, batatwegera neza. Rero nibagaruka kutwereka ibishoboka bizadufasha ku buryo ibikeneye imbaraga tuzazitanga tuzi ko twikorera."

Iki gikorwa cyabereye hirya no hino mu gihugu, biteganyijwe ko ibyavuyemo bizashyira hamwe kugeza ku rwego rw’igihugu, nyuma abaturage bakazerekwa ibyo bazakorerwa bijyanye n’ubushobozi buhari.

Inteko y'abaturage b'akagari ka Rwesero bari baje kugaragaza ibyo bifuza ko byazibandwaho
Abaturage batanze ibitekerezo basaba guhabwa ibikorwaremezo
Prof. Shyaka yavuze ko niba ari igikorwa runaka abaturage bifuza kuzagezwaho nk'amashuri, imihanda n'ibindi bikenera imbaraga z'abaturage aribo bazajya babitangamo ibitekerezo
Umunyamabanga wa Leta muri Minisiteri y'Imari n'Igenamigambi, ushinzwe Igenamigambi, Dr. Uwera Claudine, yavuze ko iyo abaturage bahawe umwanya bituma ibintu babigira ibyabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza