00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rwize isomo rikomeye, ubu tuzi icyo amahoro avuze- Minisitiri Mbabazi

Yanditswe na Muyisenge Jean Felix
Kuya 23 June 2022 saa 06:41
Yasuwe :

Minisitiri w’Urubyiruko n’Umuco, Rosemary Mbabazi yavuze ko amateka mabi yaranze u Rwanda yasigiye Abanyarwanda isomo rikomeye harimo kumenya agaciro ko kubaho mu mahoro.

Yavuze ko kugira ngo haboneke amahoro n’umutekano urambye bigomba guhera ku miyoborere myiza bikagera no mu ngo ababyeyi bita ku nshingano zabo bakanaha uburere bwiza abana babo.

Ibi yabitangarije mu nama yateguwe n’Umuryango uharanira kurwanya ikoreshwa ry’abana mu gisirikare ndetse no kugarura amahoro n’umutekano, Dallaire Institute for Children, Peace and Security igamije gukangurira urubyiruko guharanira amahoro n’umutekano.

Iyi nama yabaye ku ya 22 Kamena, yahurije hamwe urubyiruko rwo mu nzego zitandukanye harimo n’iz’umutekano n’abandi biganjemo abitabiriye inama ya CHOGM.

Minisitiri w’Urubyiruko n’Umuco, Rosemary Mbabazi yatangaje ko amahoro n’umutekano bitangirira mu rugo.

Ati “Rimwe mu masomo twize ni uko amahoro cyangwa amakimbirane bitangirira mu ngo, niyo mpamvu ababyeyi bafite inshingano zo guha urugero rwiza abana babo. Tunagerageza gukora iyo bwabaga kugira ngo abana barindwe ibihungabanya umutekano wabo”.

Minisitiri Mbabazi yakomeje agaragaza ko u Rwanda rwashyize ku isonga urubyiruko nk’abantu b’ibanze kugira ngo igihugu kigere ku iterambere cyifuza.

Ati “Urubyiruko ruhabwa urubuga rwo gutanga ibitekerezo no kugira uruhare mu iterambere ry’igihugu bahabwa umwanya mu nama zitandukanye nk’Umushyikirano, Youth Connect n’izindi.”

Gen. Roméo Dallaire washinze Dallaire Institute for Children, Peace and Security yavuze ko uko ikiremwamuntu gikomeza guha umwanya amakimbirane, byongera ibyago byinshi byo kwangiza ahazaza h’abana.

Ati “Ubu hari abana barenga miliyoni 15 ku Isi bari mu bihugu byugarijwe n’intambara. Ibi byongera amahirwe menshi y’uko bamwe muri aba bana bazahatirwa kujya mu gisirikare ku ngufu kandi bagakwiye kuba batozwa kuzavamo abantu b’ingezi mu gihe kiri imbere.”

Minisitiri w’Iterambere Mpuzamahanga muri Canada, Harjit Singh Sajjan yatangaje ko hari icyizere ko umubare w’abana binjizwa mu gisirikare wagabanywa n’ubwo hakiri urugendo rurerure.

Ati “Gahunda twatangije izatwara igihe ariko dukwiye kuyikomeza. Bimwe mu bisubizo kuri iki kibazo ni uko urubyiruko rufata iya mbere rugaharanira kurengera ahazaza habo. Ibi byakorwa bagerageje gutora ubuyobozi bushoboye bakanatinyuka gushyira igitutu ku bayobozi ngo bafate ingamba zisigasira umutekano n’amahoro.”

Capt Abia Ikuzo waturutse mu Ngabo z’u Rwanda, yavuze ko abagize ingabo na Polisi y’u Rwanda bahabwa amahugurwa y’imyitwarire ikwiye igihe bahuye n’aba bana mu bice biri kuberamo amakimbirane.

Umwe mu rubyiruko rwitabiriye iyi nama, Nikuze Sandrine yavuze ko urubyiruko rufite inshingano zo guharanira uburenganzira bw’abo, no gusigasira amahoro n’umutekano uranga u Rwanda.

Gen. Roméo Dallaire wayoboye Ingabo z’Umuryango w’Abibumbye mu bikorwa byo kugarura amahoro mu Rwanda mbere gato no mu gihe cya Jenoside yakorewe Abatutsi, yagize igitekerezo cyo gushinga Dallaire Institute for Children, Peace and Security nyuma yo kubona uburyo abana bashowe mu bikorwa bya gisirikare n’iby’ubugizi bwa nabi muri Jenoside yakorewe Abatutsi mu 1994.

Urubyiruko ruturutse muri Polisi y'u Rwanda rwitabiriye iyi nama
Nikuze Sandrine yavuze ko urubyiruko rufite inshingano zo guharanira uburenganzira bwarwo no gusigasira amahoro n’umutekano
Mu rubyiruko rwitabiriye iyi nama harimo abaturutse muri za kaminuza
Minisitiri w’Urubyiruko n’Umuco Rosemary Mbabazi yavuze ko amateka mabi yaranze u Rwanda yasigiye Abanyarwanda isomo rikomeye harimo kumenya agaciro ko kubaho mu mahoro
Iyi nama yitabiriwe n'abagize inzego z'umutekano zitandukanye
Uribyiruko rugize Rwanda Scout Association rwari rwitabiriye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .