U Rwanda rwijeje u Buhinde gufasha abashoramari babwo kubyaza umusaruro amahirwe rufite

Yanditswe na Evariste Nsengimana
Kuya 25 Mutarama 2020 saa 12:40
Yasuwe :
0 0

Umunyamabanga wa Leta muri Minisiteri y’Ububanyi n’Amahanga, Amb. Nduhungirehe Olivier, yavuze ko u Rwanda ruha agaciro uruhare rw’u Buhinde mu rugendo rw’iterambere ryarwo kandi ko ruzakomeza guharanira ko abashoramari babwo babyaza umusaruro amahirwe y’ishoramari rufite nta mbogamizi bagize.

Amb.Nduhungirehe yabigarutseho mu birori byo kwizihiza ku nshuro ya 71 u Buhinde bubaye Repubulika yigenga, byabereye kuri Ambasade y’icyo gihugu mu Rwanda, ku mugoroba wo kuri uyu wa 25 Mutarama 2020.

Ibihugu byombi bimaze igihe mu bufatanye kandi butanga umusaruro mu mfuruka zose.

Ati “Guverinoma y’u Rwanda ishishikajwe n’uburyo umubano wayo n’u Buhinde urushaho kuba mwiza guhera mu 1994. U Buhinde rwakoze ibishoboka mu gufasha u Rwanda mu rugendo rwo kwiyubaka.”

Amb.Nduhungirehe yavuze ko by’umwihariko imyaka itatu ishize ivuze byinshi ku mateka y’umubano w’ibihugu byombi.

Iyo myaka niyo abakuru b’ibihugu byombi bagiriye ingendo z’amateka muri ibyo bihugu.

Perezida Paul Kagame w’u Rwanda yagiriye uruzinduko mu Buhinde muri Mutarama 2017, ku butumire bwa Minisitiri w’Intebe wabwo Narendra Modi, aho abayobozi bombi bishimiye ibiganiro bagiranye bigaruka ku gutsura umubano bifitanye.

Mu 2018 Perezida Kagame yongeye gusura iki gihugu mu nama y’ihuriro ry’ibihugu biharanira kubyaza umusaruro ingufu z’izuba rizwi nka ‘International Solar Alliance’ yabereye i New Delhi muri Werurwe 2018.

Muri uwo mwaka nyuma y’amezi ane Perezida Kagame avuyeyo nibwo Minisitiri Nerendra yakoreye uruzinduko rw’amteka mu rwa Gasabo, rutazibagirana mu mitima y’abanyarwanda kubera umusaruro rwasize.

Amb.Nduhungirehe ati “Hari amasezerano y’ubufatanye yashyizweho umukono mu nzego z’umutekano, ubuzima, uburezi, ubuhinzi, ubucuruzi n’ishoramari, ibikorwa remezo n’umuco. Guverinoma y’u Rwanda yizeye ko gahunda n’imishinga by’ubufatanye bizarushaho gutera imbere binyuze mu gufasha mu ishyirwa mu bikorwa ry’imishinga yatangijwe no kwagura imipika y’umubano.”

Amb.Nduhungirehe yavuze ko by’umwihariko ubucuruzi n’ishoramri hagati y’u Rwanda n’u Buhinde ari bimwe mu bifatiye runini umubano bifitanye.

Ati “Guverinoma y’u Rwanda izakomeza gushyigikira no korohereza abashoramari b’Abahinde bifuza kubyaza umusaruro amahirwe ari mu gihugu cyacu.”

U Rwanda n’u Buhinde kandi bifitanye ubufatanye rwo ku rwego mpuzamahanga aho bifatanya mu bikorwa by’umuryango w’Abibumbye n’indi miryango mpuzamahanga. Biharanira kandi ko abaturage b’ibihugu byombi bagerwaho n’inyungu z’uwo mubano.

U Rwanda kandi ruritegura kwakira inama izahuriza hamwe abakuru b’ibihugu na Guverinoma biri m’Umuryango w’ibihugu bikoresha Icyongereza, Commonwealth izabera i Kigali muri Kamena 2020 (CHOGM2020).

Amb. Nduhungirehe yavuze ko u Rwanda rwizeye ko u Buhinde buzaruba hafi mu myiteguro kandi bukanayitabira ku bwinshi.

Raporo ya Doing Business Banki y’Isi iheruka gutangaza umwaka ushize yagaragaje ko u Rwanda rwongera kuba igihugu cya kabiri muri Afurika yo munsi y’Ubutayu bwa Sahara cyorohereza abashoramari, rukaza ku mwanya wa 38 ku Isi.

Bimwe mu byo Leta ikora mu korohereza abashoramri harimo gushyiraho ikigo kibaha amakuru na serivisi bibafasha gutangiza ishoramari arimo ajyanye no kuryandikisha, kubona ibyangombwa, kubona ubutaka bwo gukoreraho, kugabanyirizwa imisoro n’ibindi.

Amb Nduhungirehe yijeje u Buhinde ko u Rwanda ruzakomeza gufasha abashoramari babwo kubyaza umusaruro amahirwe rufite
Ibi birori byahuje abahinde n'inshuti zabo mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .