U Rwanda rwasubije Uganda umuturage wayo wakubiswe n’ingabo zayo zimwitiranya n’Abanyarwanda

Yanditswe na N.Kubwimana Janvière
Kuya 14 Ukuboza 2019 saa 03:09
Yasuwe :
0 0

Sebudigiri John ukomoka muri Komisi Kisoro muri Uganda, ahazwi nka Bufumbira, arashimira cyane u Rwanda rwamwakiriye rukamuvuza nyuma yo gukubitwa n’ingabo za Uganda, zikamugira intere zamwibeshyeho ko ari umunyarwanda.

Uyu musaza w’imyaka 60 asanzwe atuye muri Uganda ari naho umuryango we w’umugore n’abana batandatu batuye.

Kuri uyu wa Gatandatu nibwo u Rwanda rwashyikirije uyu Sebudirigi umuryango we, nyuma y’uko kuwa 11 Ugushyingo yakubiswe n’ingabo za Uganda nk’uko abyivugira agahungira mu Rwanda bakamwakira ndetse akanavuzwa.

Uyu Sebudirigi asobanura uburyo yakubiswe, akanashima cyane u Rwanda rwamutabaye akanavuzwa akaba asubijwe mu gihugu cye ari muzima.

Ati “Nari mvuye gusura inshuti yanjye yitwa Garasiyani, ngeze mu nzira ntaha mpura n’abasirikare batanu ba Uganda, batangira kumpondagura cyane bazi ko ndi Umunyarwanda, inyuma yanjye haturutse Umunyarwanda nawe baramukubita cyane ku bw’amahirwe turabacika twiruka tugana mu Rwanda baratwakira”.

“Nahageze ndimo kuvirirana amaraso menshi mu mutwe kuko nari nakomeretse bikabije, banjyana kwa muganga maramo iminsi itatu nitabwaho n’abaganga. Ubu maze koroherwa ndetse bananshyikirije umuryango wanjye, ubu ndishimye cyane kuko nsubiye iwacu ndi muzima, Leta y’u Rwanda irakabaho”.

Uyu musaza akomeza asaba igihugu cye [Uganda], gufata neza abaturage b’u Rwanda kuko yabonye ko nta mutima mubi bafite.

Ati "Ni ukuri Uganda nayisaba gufata neza abaturage b’u Rwanda kuko nta mutima mubi bafite, iyo bawugira ntibari kunyakira nakubiswe n’ingabo zacu ngo bamvuze. Mu Rwanda barantabaye, banguriye indi myenda kuko indi yari yuzuye amaraso, ntashye nishimye kandi nzagaruka gusura u Rwanda kuko bambereye umubyeyi".

Nyirabayenza Justine umugore w’uyu musaza, yashimye cyane uko igihugu cy’u Rwanda, cyakiriye umugabo we akanavuzwa kandi yarakubiswe n’ingabo z’iwabo muri Uganda, avuga ko ubutumwa ajyanye iwabo ari uko abanyarwanda bakwiye gufatwa neza iwabo nk’uko nabo bafatwa neza mu Rwanda.

Uyu musaza yakubiswe n’ingabo za Uganda nyuma yo kumwibeshyaho ko ari Umunyarwanda, ahungira mu Rwanda avurizwa ku kigo nderabuzima cya Cyanika, akaba asezerewe kuri uyu wa 14 Ukuboza 2019 ashyikirijwe umuryango we bakaba basubiye ku ivuko ryabo muri Komine ya Kisoro.

Yakiriwe n'u Rwanda ruramuvuza asubira iwabo ameze neza
Nyuma yo guhuzwa n'umuryango we asubiye mu Bufumbira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza