U Rwanda rwashyikirije Uganda umuturage warwo warashwe afite ibiyobyabwenge

Yanditswe na N.Kubwimana Janvière
Kuya 22 Mutarama 2020 saa 04:33
Yasuwe :
0 0

U Rwanda rwashyikirije Uganda umuturage warwo warashwe ashaka kurwanya inzego z’umutekano nyuma yo gufatirwa mu bikorwa bya magendu n’ibiyobyabwenge yashakaga kwinjiza mu gihugu zamuhagarika akagerageza kuzirwanya.

Gutanga uyu murambo w’uwitwa Ndagijimana Theogene byabaye kuri uyu wa 22 Mutarama 2020.

Itsinda ry’abayobozi ba Uganda ryari riyobowe na Meya w’Akarere ka Kisoro, Peter Mugisha, ari kumwe n’Umudepite uhagarariye agace ka Bufumbira, James Nsaba Buturo.

Hari kandi uhagarariye Polisi mu Karere ka Kisoro ndetse n’abaturage basaga 200 bagaragazaga uburakari bwinshi.

Bahuye n’itsinda ryaturutse mu Rwanda ryari ririmo Meya w’Akarere ka Burera, Uwanyirigira Marie Chantal n’Umuyobozi wungirije wa Polisi mu Ntara y’Amajyaruguru, SSP Jean Bosco Rudasingwa.

Ndagijimana wishwe yari afite imyaka 25 y’amavuko, akomoka mu Karere ka Kisoro. Yarasiwe mu Karere ka Burera, Umurenge wa Kagogo mu ijoro ryo ku wa 18 rishyira 19 Mata 2020, ari kumwe n’itsinda ry’abantu batanu.
Muri bo harashwemo batatu barimo abanyarwanda babiri n’uyu munya-Uganda bahita bapfa. Kuraswa kwabo kwaturutse ku gushaka kurwanya inzego z’umutekano zari zibafatanye ibiyobyabwenge.

Abanyarwanda bapfuye harimo uwitwa Munyembabazi w’imyaka 21 na Munezero Eric w’imyaka 21 bose bakomoka mu Karere ka Burera.

Ibyo bafatanywe byarimo ibiyobyabwenge nka kanyanga, imyenda ya caguwa n’ibindi, bari bitwaje kandi n’intwaro za gakondo zirimo ibisongo n’imihoro.

Umuyobozi w’Akarere ka Burera, Uwanyirigira Marie Chantal, yavuze ko uyu muturage yarasanywe n’abandi banyarwanda babiri, asobanura ko bitakozwe byateganyijwe ahubwo byabaye mu buryo bwo kwitabara.

Ati "Turi aha mu gikorwa cyo gushyikiriza Uganda umuturage wabo warasiwe ku butaka bwacu ubwo yari atwaye ibiyobyabwenge na magendu, yarasanywe n’abandi banyarwanda babiri ubwo bahagarikwaga bagashaka kurwanya inzego z’umutekano nazo zikirwanaho. Abandi babiri bo bahise bacubira mu mazi baratoroka."

Yasabye abafatirwa mu byaha byo gutunda ibiyobyabwenge no kwambukiranya imipaka mu buryo bunyuranyije n’amategeko kubicikaho kuko ari icyaha gikomeye.

Ati "Ntabwo duhwema kwigisha abantu kureka gutunda, gukoresha ibiyobyabwenge kuko iwacu bitemewe, ariko bamwe babirengaho, gusa dukomeza kubingingira kubireka, ndetse no kwambuka imipaka mu buryo bunyuranyije n’amategeko."

Meya w’Akarere ka Kisoro, Peter Mugisha, hamwe n’abandi bayobozi ba Uganda ntibigeze bifuza kuvugana n’itangazamakuru. Gusa ubuyobozi bw’Akarere ka Burera n’abo bari kumwe babashyikirije impapuro zatanzwe n’ibitaro bya Ruhengeri aho uyu murambo wa Ndagijimana wajyanwe ngo ukorerwe isuzuma.

Umurambo w'uyu muturage wa Uganda washyikirijwe ubuyobozi bw'igihugu kuri uyu wa Gatatu
Uyu muturage yarashwe afite ibi biyobyabwenge
Ku ruhande rwa Uganda hari abaturage benshi bagaragazaga uburakari bwinshi
Ubuyobozi bw'u Rwanda bushyikiriza ubwa Uganda inyandiko zigaragaza ko uyu murambo utanzwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza