U Rwanda rwakiriye miliyari 152 Frw zizifashishwa mu guteza imbere ubumenyi no guhanga imirimo

Yanditswe na Twarabanye Venuste
Kuya 10 Nyakanga 2020 saa 09:08
Yasuwe :
0 0

U Rwanda rwakiriye miliyari 152 Frw zirimo miliyari 10.8 Frw zatanzwe n’Umuryango w’Ubumwe bw’u Burayi (EU) na miliyari 142 Frw zatanzwe na Banki y’Isi, zizifashishwa mu guteza imbere urwego rw’abikorera, guhanga imirimo no guteza imbere ubumenyi mu nzego zitandukanye.

Amasezerano y’izo nkunga yashyizweho umukono na Minisitiri w’Imari n’Igenamigambi, Dr Uzziel Ndagijimana ku wa Gatatu.

Inkunga ya EU ya miliyari zigera ku 10.8 Frw izakoreshwa mu gufasha urwego rw’abikorera no guhanga imirimo, ni igice cy’inkunga y’asaga miliyari 495.8 Frw EU yemereye u Rwanda izagenda itanga mu byiciro kugeza mu mpera za 2020.

Iyo nkunga izakoreshwa mu guhanga imirimo izahabwa urubyiruko, izibanda ku bukungu bushingiye ku ikoranabuhanga, ubukerarugendo n’amahoteli. Izo nzego zombi zagaragaje ko arizo zishobora kwiyubaka byihuse mu rwego rw’abikorera.

Ibyo bizakorwa mu mishinga ibiri; umwe wa ‘Market Skills4Tourism’ uzongera ubumenyi ku rubyiruko ruri mu rwego rw’ubukerarugendo n’amahoteli, n’uwitwa ‘Tech Innovation/Incubation Hubs’ uzongera imirimo ishingiye ku ikoranabuhanga binyuze mu guhanga udushya. Ukazibanda mu mijyi yunganira Kigali ya Rusizi, Rubavu, Nyagatare na Muhanga.

Ambasaderi wa EU mu Rwanda, Nicola Bellomo, yavuze ko iyo nkunga ije gufasha urwego rw’ubukerarugendo n’amahoteli rwagizweho ingaruka na Covid-19.

Yavuze ko impamvu bitsa ku ikoranabuhanga ari uko aho Isi igana, hakubitiyeho n’icyo cyorezo, byagaragaye ko hatimakajwe ikoranabuhanga bigoye kwisanga mu cyo yise ’Isi nshya.’

Ati "Ibi bifitanye isano cyane cyane n’ibihe turimo, aho urwego rw’ubukerarugendo n’amahoteli rwakozweho cyane n’icyorezo cya Covid-19. Byongeye byaragaragaye ko hatabayeho urwego rukomeye rw’ikoranabuhanga bigoye kwisanga mu Isi nshya. Niyo mpamvu iyi gahunda ije mu gihe gikwiye cyo kuziba icyuho kiri mu ikoranabuhanga mu Rwanda."

Guverinoma kandi yasinye amazeserano y’inkunga ya miliyari 142 Frw ya Banki y’Isi, azakoreshwa mu gushyigikira ingufu za leta zo kongera amahirwe yo kubona ubumenyi bukenewe ku isoko ry’umurimo mu nzego zatoranyijwe.

Kimwe cya kabiri cy’ayo mafaranga ni inkunga naho andi ½ ni inguzanyo izishyurwa mu myaka 38 guhera nyuma y’imyaka itandatu, ikazabarirwa inyungu ya 0.75%.

U Rwanda rutegenya ko ayo mafaranga azakoreshwa mu kongera uburyo bwo kugera ku masomo y’imyuga n’ubumenyingiro, amahugurwa na gahunda zitandukanye zo mu mashuri makuru zisubiza ibibazo biri ku isoko ry’umurimo n’iterambere rusange.

Minisitiri Dr Uzziel Ndagijimana, yagaragaje ko izo nkunga zombi zizafasha mu kugera ku ntego z’iterambere u Rwanda rwihaye. Yavuze ko guteza imbere ubumenyi no guhanga imirimo ari zimwe mu ntego z’ibanze igihugu gifite mu iterambere.

Ati "Guteza imbere ubumenyi no guteza imbere umurimo ni ishingiro rya gahunda y’igihugu yo kwihutisha iterambere. Iyi nkunga izagira uruhare rukomeye mu kuzamura ubumenyi bw’abakozi mu rwego rwo guhindura ubukungu mu gihe kirekire."

Inkunga ya EU n’iya Banki y’Isi kandi zizagira uruhare rukomeye mu ntego y’u Rwanda yo guhanga imirimo igera kuri miliyoni 1.5 mu 2024, binyuze mu byo zizakoreshwa mu gushyigikira urwego rw’abikorera, guhanga imirimo, gutanga ubumenyingiro no guteza imbere ikoranabuhanga.

Minisitiri Dr Ndagijimana na Ambasaderi wa EU mu Rwanda, Nicola Bellomo, nyuma y'isinywa ry'amasezerano

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .