U Rwanda rwakiriye ibikoresho byo kurwanya Coronavirus rwahawe n’Umuyobozi wa Dubai

Yanditswe na Habimana James
Kuya 14 Kamena 2020 saa 09:29
Yasuwe :
0 0

U Rwanda rwakiriye imyambaro 300 000 ikoreshwa n’abaganga bita ku barwayi ba Coronavirus hamwe n’ibindi bikoresho byifashishwa kuvura iyi ndwara, byatanzwe n’Umuyobozi wa Dubai, Sheikh Mohammed bin Rashid Al Maktoum, akaba Visi Perezida na Minisitiri w’Intebe wa Leta Zunze Ubumwe z’Abarabu hamwe n’Umugore we Sheikha Hind bint Maktoum bin Juma Al Maktoum.

Sosiyete ya Dubai Ports World izobereye mu gucunga no kubaka ububiko bw’imizigo iva cyangwa ijya mu mahanga ari nayo igenzura ubwitwa Kigali Logistics Platform buherereye i Masaka mu karere ka Kicukiro hamwe na hoteli ya One & Only iherereye mu Karere ka Musanze no mu ishyamba rya Nyungwe, nizo zafashije mu bikorwa byo kugeza mu Rwanda ibi bikoresho bivanywe i Dubai.

Byazanywe mu gihugu bitwawe n’indege ya RwandAir. Mohammed Ibrahim Al Shaibani, ukuriye “Kerzner International” igenzura amahoteli ya One&Only, yavuze ko umuyobozi wa Dubai arajwe ishinga no gufasha u Rwanda n’abanyarwanda muri ibi bihe bitoroshye byatewe n’iki cyorezo.

Ahagana saa munani z’ijoro nibwo ibi bikoresho byageze mu Rwanda bizanwe n’indege ya RwandAir.

Birimo ibyo kwirinda coronavirus, ibifata ibipimo byo muri laboratwari, ibyo kuvura ndetse n’ibifasha mu kongerera abarwayi umwuka (ventilators).

Umuyobozi Mukuru w’Ikigo cy’Igihugu cy’Ubuzima, RBC, Dr Nsanzimana Sabin wakiriye iyi nkunga, yavuze ko ibi bigaragaza ubufatanye busanzwe buranga ibihugu byombi.

Yavuze ko nubwo u Rwanda rusanganywe ibikoresho byo kuvura iki cyorezo, ari ngombwa kongera ubushobozi.

Yagize ati “Ibi bikoresho biraza kunganira ubushobozi dufite bwo kuvura no gupima coronavirus, kandi iyi nkunga igaragaza ubufatanye bw’ibihugu bigize Isi cyane ko iki cyorezo cyafashe Isi yose, ni ngombwa ko habaho n’ubufatanye bw’Isi.”

“Kugeza ubu nta kibazo cy’ibikoresho dufite cyane ko nta n’abantu dufite bakenera kuba bakongerwa umwuka ariko bishobora kuba, niyo mpamvu bisaba ko uba witeguye kandi ufite ibikoresho bihagije. Muri ibi bikoresho twakiriye uyu munsi harimo na ‘ventilators’ kuko iki ni kimwe mu bikoresho bya ngombwa mu kuvura iki cyorezo.”

Yagaragaje ko nubwo ibikoresho Bihari, bitavanyeho ko Abanyarwanda bagomba gukomeza kwirinda.

Ati “Icyiza ni uko dukomeza kwirinda kuko kwivuza ari amahitamo ya nyuma, ni byiza ko twirinda ku buryo bitagera aho dushyira abantu mu kubongerera umwuka.”

Minisitiri w’Ubuzima, Dr Daniel Ngamije yavuze ko ibikoresho bahawe bigiye kongerera u Rwanda ubushobozi bwo gupima coronavirus.

Yagize ati “Twishimiye iyi nkunga yatanzwe na Mohammed bin Rashid Al Maktoum afatanyije n’umugore we, Sheikha Hind bint Maktoum bin Juma Al Maktoum mu guhangna na Coronavirus, ibi bizongera ubushobozi bwacu bwo gupima ndetse n’ubwo kuvura.”

Umuyobozi wa Dubai Ports World mu Rwanda, Sumeet Bhardwaj, yavuze ko iyi nkunga, ari ikimenyetso kigaragaza ubufatanye buri hagati y’ibihugu byombi.

Ati “Iyi nkunga ni ikimenyetso cy’ubucuti bukomeye buri hagati ya UAE n’u Rwanda. Nishimiye guhagararira umuyobozi wa Dubai n’umugore we kuko nibo batanze iyi nkunga ku Rwanda, u Rwanda ni inshtuti ye kandi na we ni inshuti y’u Rwanda.”

Kugeza ubu umubano w’ibihugu byombi uhagaze neza haba muri Politiki, ubuhahirane, ishoramari n’ibindi.

Muri Werurwe uyu mwaka, Mohammed bin Rashid Al Maktoum yagiriye uruzinduko mu Rwanda, asura bimwe mu bice birugize, yihera ijisho ibyiza nyaburaga rufite birimo Pariki y’Ibirunga n’urusobe rw’ibinyabuzima icumbikiye.

Mu 2018 ibi bihugu byahahiranye ibicuruzwa bifite agaciro karenga miliyoni 750$. Mu Ukwakira 2019 ku bufatanye bwa leta y’u Rwanda na sosiyete ya Dubai Ports World izobereye mu gucunga no kubaka ububiko bw’imizigo iva cyangwa ijya mu mahanga, hakaba harafunguwe ububiko bw’ibicuruzwa bwiswe ‘Kigali Logistics Platform’.

Ibikoresho byatanzwe birimo imyambaro y’abaganga na ventilators byo guhangana n’icyorezo cya Coronavirus
U Rwanda rwakiriye imyambaro 300 000 ikoreshwa n’abaganga bita ku barwayi ba Coronavirus n’ibindi bikoresho byifashishwa kuvura iyi ndwara, byatanzwe n’Umuyobozi wa Dubai, Sheikh Mohammed bin Rashid Al Maktoum, akaba Visi Perezida na Minisitiri w’Intebe wa Leta Zunze Ubumwe z’Abarabu n’Umugore we Sheikha Hind bint Maktoum bin Juma Al Maktoum
Nubwo u Rwanda nta kibazo cy'ibikoresho rufite, rwagaragaje ko inkunga rwahawe ari ingenzi kuko irwongerera ubushobozi bwo guhangana na coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .