U Rwanda rwakiriye abandi banyarwanda 33 bari bafungiwe muri Uganda

Yanditswe na N.Kubwimana Janvière
Kuya 28 Ugushyingo 2019 saa 08:50
Yasuwe :
0 0

Abandi banyarwanda 33 bari bamaze iminsi itatu bafungiwe muri gereza ya Kisoro muri Uganda, barekuwe boherezwa mu Rwanda.

Aba banyarwanda bageze ku mupaka wa Cyanika ku mugoroba wo kuwa 27 Ugushyingo 2019, aho bari bafite umunaniro mwinshi, agahinda ndetse n’inzara kuko batabonaga icyo kurya.

Mu buhamya aba banyarwanda bagiye batanga bavuga ko bafashwe nk’aho atari abantu ndetse mu gufungwa kwabo batswe amafaranga menshi dore ko barekuwe nta kintu na kimwe bafite.

Umwe muri bo Mutemberezi Fulgence wo mu Karere ka Rubavu, yari amaze amezi 10 akora ubucuruzi bwa Restaurant muri Uganda, yafashwe muri iki cyumweru n’inzego z’umutekano z’icyo gihugu.

Ati “Kuwa mbere nazindukiye mu kazi nasanze abapolisi benshi n’abasirikare ba Uganda bagose ahantu hose ngo bashaka abanyarwanda, nanjye narafashwe badupakira imodoka batujyana kudufunga, bukeye tujya kwitaba urukiko badushinja ko nta byangombwa bitwemerera kubayo dufite, nyamara natwe twari tubifite barabitwatse barabica".

Akomeza avuga ko mu kumufunga bamwatse amafaranga afunguwe ayasabye barayamwima.

Ati"Njya gufungwa abapolisi banyatse amafaranga imitwaro 10 nari mfite, nyuma mfunguwe nyabatse banyeretse inote imwe barambwira ngo nyitegereze yanditseho Uganda si u Rwanda, ngo nta burenganzira mfite bwo kujyana umutungo wabo ku butaka bwacu, naje gutya nsizeyo umutungo utari hasi ya miliyoni ebyiri n’igice, mbese umunyarwanda muri Uganda ni ikizira abagitekereza kujyayo bazinukwe".

Musabyimana Angelique wo mu Karere ka Nyabihu nawe yagize ati" Umunyarwanda uko afashwe Uganda ni nk’umwanda, mazeyo umwaka nkora akazi ko muri Salon ariko n’Abagande twakoranaga banyishishaga. Njye nigeze numva umusirikare avuga ngo uwamuha abanyarwanda bose bari Uganda ngo yabasukaho lisansi akabatwika, numvise ngize ubwoba”.

Avuga ko akimara gufungwa ku wa mbere, abapolisi bamwatse amafaranga arayabima, bamwaka telephone, yari afite kuri Mobile Money ibihumbi 100, bamubajije umubare w’ibanga yanga kuwubabwira barayijyana bayimugaruriye amafaranga bayakuyeho na simukadi bashyizemo idakora.

Ati “Mbibabajije barambwira ngo nta mutungo ngirayo si mu Rwanda. Ubu tubabajwe n’ubuzima bw’abasigayeyo kuko bari guhigwa bukware. Nubwo dufunguwe hasigayemo abarenga 100 bari mu buzima bugoye cyane".

Bakomeza bavuga ko bakorewe ibikorwa by’itotezwa, kubeshyerwa kuko ngo agace Umunyarwanda atuyemo kakaberamo ibyaha by’urugomo nk’ubwicanyi byose babigereka ku munyarwanda.

Aba kandi ngo birukanwe muri Uganda nta kintu na kimwe bahawe mu byo bari batunze, kurandurirwa imyaka kuko ngo bahinze ku butaka bwabo ndetse harimo n’abatandukanyijwe n’imiryango yabo.

Musanabera Clementine wo mu Karere ka Musanze wari umaze imyaka 19 ashakiye muri Uganda, avuga ko bamutandukanyije n’umugabo we n’abana be babiri.

Ati "Mu ijoro ryo kuwa mbere nibwo twumvise abantu bakubita urugi, umugabo akinguye baramubwira ngo nabahe Umunyarwanda uryamye iwe kuko we ni umugande, ababwiye ko mfite ibyangombwa benda kumukubita, bansohoye nambaye ubusa, umugabo anjugunyira agatenge n’agakanzu, bantwara ubwo bampakira mu modoka n’abandi banyarwanda baradufunga, baturekuye uyu munsi ngo baduhaye imbabazi, ubu nsizeyo umugabo n’abana banjye. Gusa ikinshimishije ni uko ngeze mu gihugu cyanjye".

Bakomeza bavuga ko uko iminsi itambuka Umunyarwanda muri Uganda akomeje kuba nk’umuziro ku butaka bwaho, aho n’abaguzeyo imitungo irimo inzu n’imirima ngo basigaye bacyurirwa n’abagande ngo batunze umwuka ibyo biyitirira si ibyabo.

Bakomeza bagira inama bagenzi babo zo guca ukubiri n’ibitekerezo biberekeza muri Uganda kuko batahakenewe.

Abanyarwanda 33 bari bafungiwe muri Uganda bageze mu Rwanda
Musanabera Clementine wari umaze imyaka19 muri Uganda bamutandukanyije n'umuryango we
Musabyimana Angelique yagarutse mu Rwanda ariko abapolisi ba Uganda baramucucuye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza