U Rwanda ruracyorora inka nyinshi zidatanga umukamo uhagije

Yanditswe na Uwishyaka Jean Louis
Kuya 26 Kamena 2017 saa 11:08
Yasuwe :
0 0

Ikigo cy’Igihugu gishinzwe guteza imbere ubuhinzi n’ubworozi (RAB) cyatangaje ko kirajwe ishinga no kongera umusaruro w’amata u Rwanda rubona ku buryo mu mwaka utaha wazaba ugeze kuri toni ibihumbi 800, uvuye kuri toni zisaga ibihumbi 700 uriho ubu kuko rugifite inka nyinshi zidatanga umusaruro uhagije.

Aborozi batandukanye bagaragaza ko hari igihe umusaruro w’amata ugabanuka ahanini bitewe n’imihindagurikire y’ibihe, baba biteze imvura ntiboneke bityo amatungo yabo nayo akabaho nabi. Byonegeye n’ubwoko bw’inka ziri mu Rwanda bukaba bukirimo nyinshi zitanga umusaruro muto.

Imibare itangwa na RAB, igaragaza ko mu Rwanda habarurwa inka zirenga miliyoni 1.4, ariko izigera muri kimwe cya kabiri cyazo ni ‘Inyarwanda’ zizwiho kudatanga umukamo utubutse cyane ariko hariho gahunda yo kongera izikamwa neza.

Umuyobozi ushinzwe ubworozi muri RAB, Dr Christine Kanyandekwe, Dr Kanyandekwe yagize ati “Urebye ku cyo kuvugurura icyororo, turacyafite Inyarwanda [inka] ziri muri 50%; dufite inka miliyoni 1.4 ariko 50% ubu ngubu ziracyari inyarwanda. Turi gukomeza kuvugurura icyororo kugira ngo aborozi bagire inka zitanga umukamo utubutse.”

Yavuze ko leta yatumije mu mahanga imfizi zigezweho ku buryo intanga zazo zizifashishwa mu guterwa inka mu rwego rwo kongera umukamo. Izo mfizi byitezwe ko nta gihindutse zazagera mu Rwanda bitarenze uyu mwaka.

RAB ivuga ko ikomeza guhura aborozi binyuze mu buryo bunyuranye harimo n’ingendoshuri bakora haba mu ma murikabikorwa ajyanye n’iby’ubuhinzi n’ubworozi kugira ngo barebe ibyo bagenzi babo bakora nabo babe babigiraho.

Ni muri urwo rwego Minisiteri y’Ubuhinzi n’Ubworizi yateguye imurikabikorwa ry’ubuhinzi n’ubworozi riri kubera ku Mulindi, mu Karere ka Kicukiro, ahari kumurikwa ibikorwa binyuranye birimo n’inka z’amoko atandukanye harimo n’izarushanyijwe gukamwa amata menshi maze eshatu za mbere zambikwa ikamba ndetse ba nyirazo bahembwa ibikoresho binyuranye bizabafasha mu bworozi bwabo.

Muri iri murika, aborozi aborozi banakanguriwe guhunika ubwatsi bateganyiriza ibihe bibi by’izuba.

Yagize ati “Kugira ngo dukomeze twongere umukamo, turakangurira abahinzi gukomeza kugaburira neza amatungo yabo; hari uburyo tubereka hano muri iri murika [ riri kubera ku Mulindi wa Kanombe] bujyanye n’uko bahunika ubwatsi kugira ngo no mu gihe cy’izuba inka ikamwe."

Dr Kanyandekwe avuga kandi ko ubundi buryo buzafasha igihugu kongera umusaruro w’amata ari uko aborozi bagomba kwita ku nka zabo bazororera ahantu heza no kuzikorera isuku kugira ngo zidafatwa n’indwara zinyuranye zatuma umukamo ugabanuka.

Yavuze ko leta ifite intego yo kongera umusaruro w’amata ku buryo mu mwaka utaha uzaba ugeze kuri toni ibihumbi 800 zivuye ku zigera ku bihumbi 770 uriho kuri ubu.

U Rwanda rwihaye intego yo kugera kuri Toni ibihumbi 800 by'amata mu 2018

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza