U Rwanda rukomeje kugirwa urwitwazo mu gusigana icyasha mu banyapolitiki ba Uganda

Yanditswe na Ndahayo Emmanuel
Kuya 28 Nyakanga 2020 saa 09:25
Yasuwe :
0 0

Mu gihe Uganda yitegura kwinjira mu matora arimo n’aya Perezida azaba umwaka utaha wa 2021, izina ry’u Rwanda rikomeje kwifashishwa n’abanyapolitiki batandukanye mu gushaka amaramuko no guharabika abo batavuga rumwe.

Ibi bije nyuma y’uko umubano mubi hagati y’ibihugu byombi ufashe indi ntera, ahanini bitewe n’uko u Rwanda nk’igihugu cyigenga, rwanze inshuro nyinshi gushingira politike yarwo ku kuboko kwa Uganda kwakomeje gushaka kwivanga mu mikorere ya Guverinoma ya Kigali.

Uganda ntako itagize mu kwibasira umudendezo w’u Rwanda, kugeza n’aho itari ikibasha guhishira imikoranire yayo n’imitwe y’abahanyanyaza bashaka guhungabanya umutekano w’u Rwanda. Ibi byapfubye rugikubita, yewe n’ihungabana ry’ubukungu ryari ryitezwe cyane na Kampala nyuma y’ifungwa ry’umupaka munini wa Gatuna uhuza ibihugu byombi, ryaje kuba baringa.

Uganda kandi yakajije umurego mu icengezamatwara ry’ibinyoma byanyujijwe inshuro nyinshi mu binyamakuru byo muri icyo gihugu, ubanza ari yo karita yonyine yari isigaye mu mukino utaragize icyo wungura Leta y’i Kampala.

Ibinyamakuru bimwe byo muri Uganda byaryohewe n’uyu mukino wo guharabika u Rwanda, na cyane ko byahawe rugari n’ibukuru, aka wa mugani ngo “Uhagarikiwe n’ingwe aravoma”.

Magingo aya ariko umuvuno usa nk’uwahindutse. Ibyo guhungabanya umutekano w’u Rwanda n’ubukungu bwarwo byafashe ubusa, bituma ahubwo abanyapolitiki ba Uganda bifashisha ibinyamakuru byabo mu guharabika isura y’u Rwanda, banarugira iturufu yo kwikiza abo badahuje imyumvire.

Ibi byabayeho kenshi mu bihe bishize, aho abatavuga rumwe n’ubutegetsi bwa Museveni umaze imyaka 34 ayobora Uganda, cyangwa se abatifuzwa mu buyobozi bwo hejuru bw’ishyaka National Resistance Movement (NRM), bashinjwa gukorana n’u Rwanda kugira ngo imbehe yabo yubikwe. Ugezweho ni Umunyamabanga wa Leta ushinzwe Imiturire, Chris Baryomunsi.

Ikinyamakuru The insider, kimwe mu byifashishijwe cyane na Leta ya Uganda mu icengezamatwara ryo guharabika u Rwanda, giherutse gutangaza ko uyu mugabo “amaze iminsi mu mishyikirano na Leta ya Kigali kandi bitazwi n’umuyobozi we (Perezida Museveni)”.

Nubwo bizwi ko aya makuru ari ibinyoma, ntibibuza ubutegetsi bwa Kampala kuyashingiraho, kuko n’ubundi ikiba kigenderewe atari ugutangaza ukuri, ahubwo ari ugushyira mu mazi abira buri wese utagishakwa na Kampala.

Ibi ni kimwe mu bimenyetso byinshi bigaragaza uburyo Leta ya Kampala yabaswe no kwibasira Leta y’u Rwanda, ibyabaye inshoberamahanga ku basesenguzi basanzwe bakurikirana bya hafi politiki y’aka karere.

Umwe mu baganiriye n’ikinyamakuru Virunga Post dukesha iyi nkuru yagize ati “U Rwanda kurya mu mutwe Leta ya Uganda; bitabaye ibyo se, kuki bahora bashishikajwe no gushaka ibihuha ndetse n’amakuru adafite ishingiro avuga nabi u Rwanda?”

Ibi ariko ntacyo bihungabanya ku Rwanda, na cyane ko “abanyarwanda bakomeza kwikorera ibibareba, batitaye na busa ku butegetsi bwa Uganda. Wigeze wumva u Rwanda rupyinetswa ‘n’abatasi ba Uganda’, cyangwa ngo ruhohotere inzirakarengane z’abaturage bashinjwa kunekera Leta ya Kampala?”

Zimwe mu mpamvu zituma ibinyamakuru byo muri Uganda byirengagiza ukuri harimo gushaka indonke. Will Byababaha, umuyobozi wa The insider azwiho kwakira amafaranga aturutse muri Biro by’Ubutasi bwa Uganda (ISO) kugira ngo akomeze kwanduza isura y’u Rwanda na Perezida warwo, kabone n’ubwo nta bimenyetso yaba afitiye amakuru atangaza.

Nk’urugero, muri iyo nkuru y’umubano w’ikinyoma wa Perezida Kagame na Baryomunsi, hari aho iki kinyamakuru gitangaza ko “Minisitiri (Baryomunsi) ari umwe mu bavugana cyane na Perezida Kagame kuri telefoni ku mpamvu baziranyeho, kandi Baryomunsi atari Minisitiri w’Ububanyi n’Amahanga”.

Aha ni ho n’umwana muto yashingira akabona ko icengezamatwara rya Uganda riri mu marembera. Nubwo iki kinyamakuru kivuga ko Perezida w’u Rwanda avugana bihoraho na Baryomunsi, ntibizwi neza uburyo cyamenye amakuru y’ikoreshwa rya telefoni ya Perezida Kagame.

Mu gisa nko kwimena inda, The Insider ivuga ko “Baryomunsi ashishikajwe cyane no gushaka amajwi kugira ngo azinjire mu Kanama nshingwabikorwa k’ishyaka NRM nk’Umuyobozi Mukuru Wungirije, ahagarariye Uburengerazuba bwa Uganda”.

Gikomeza kivuga ko “ISO yaje kuvumbura ko Baryomunsi akorana n’abantu bo ku mupaka wa Kanungu, aho bamuzanira akayabo k’amafaranga avuye mu Rwanda, ibintu byatunguye benshi by’umwihariko inzego z’umutekano”.

Ibi byose ni amakuru atagira ikimenyetso na kimwe, gusa kuri buri wese ubikurikirana, ubutumwa bushaka gutangwa hano burigaragaza: ko Baryomunsi ari kwiyamamaza “akoresheje inkunga ahabwa n’u Rwanda”.

Birasa nk’aho Baryomunsi afite abanzi benshi batifuza ko atsindira umwanya mu buyobozi bukuru bw’ishyaka NRM, kandi u Rwanda ari yo turufu nziza yo kwifashisha muri uwo mugambi bafite.

Ibi byose byerekana uburyo Uganda igishishikajwe no gusebya u Rwanda, dore ko byinshi mu byo yagerageje mu myaka yashize bitayihiriye.

Ubu noneho bigeze n’aho izina ry’u Rwanda ryifashishwa mu kurwanira imyanya imbere muri politiki ya Uganda, ubanza na byo bizagenda aka Nyomberi, kuko n’ubusanzwe atari bishya.

Usibye ko bimaze kuba urwenya.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .