00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda ruhagaze he ku bwisanzure bw’abaryamana bahuje ibitsina?

Yanditswe na Musangwa Arthur
Kuya 22 June 2022 saa 07:46
Yasuwe :

Ingingo ijyanye n’uburenganzira bw’abaryamana bahuje ibitsina ni imwe mu zikunze kugarukwaho n’abantu hirya no hino ku Isi, bamwe bagaragaza ko bakwiye kwemerwa na Leta z’ibihugu ndetse bagahabwa amahirwe angana n’ay’abandi baturage mu gihe abandi bavuga ko ibyo bakora ari ikizira bikwiye kwamaganirwa kure.

Mu bushakashatsi umuryango uharanira uburenganzira no guteza mbere ubuzima, HDI, wakoze mu 2021; wagaragaje ko kimwe n’ibindi bihugu mu Rwanda naho hari abantu baryamana n’abo bahuje ibitsina ndetse n’abandi bafite ibyiyumvo bitandukanye n’ibimenyerewe ku mibonano mpuzabitsina (LGBTQ).

Muri ubu bushakashatsi HDI yaganiriye n’abanyamuryango ba LGBTQ 499, abo muri Kigali bari bagize 55%, ab’i Huye bagize 17%, Muhanga bagize 15% na Nyanza yari ifite abagera kuri 12%.

Muri aba bakoreweho ubushakashatsi, 39% bavuze ko batemera igitsina bavukanye (kuba abahungu cyangwa abakobwa), 32% baryamana n’abo bahuje igitsina ariko bemera ko ari igitsinagabo mu gihe 11% bavuze ko bemera ko ari igitsina gore.

Umuntu ashingiye kuri ubu bushakashatsi ashobora kubona ko u Rwanda na rwo ruri mu bihugu bifite abantu bemera ko baryamana n’abo bahuje ibitsina ndetse n’abandi bafite ibyiyumviro bitandukanye n’ibimenyerewe ku mibonano mpuzabitsina.

Muri ubu bushakashatsi, abaryamana bahuje ibitsina mu Rwanda bwagaragaje ko hari zimwe mu mbogamizi bagihura na zo ziganjemo izishingiye ku ivangura bakorerwa n’abantu.

Abagera kuri 68% by’abakobwa baryamana na bagenzi babo bavuze ko bahuye n’ibikorwa byo guhezwa n’ivangura, abagabo baryamana na bagenzi babo bahuye n’iki kibazo bo bangana na 56% mu gihe abahuye n’iki kibazo bari mu cyiciro cy’abaryamana n’abagabo ndetse n’abagore bo ari 50%.

Imyumvire y’Abanyarwanda kuri iki cyiciro cy’abaryamana bahuje ibitsina nayo igenda itandukana, ubu bushakashatsi bwagaragaje ko 46% by’Abanyarwanda batakira neza ibijyanye n’abaryamana bahuje ibitsina ndetse n’abafite ibyiyumviro bitandukanye n’ibisanzwe ku mibonano mpuzabitsina, 74% bagaragaza ko ibyiyumviro by’abaryamana bahuje ibitsina bitandukanye n’umugambi w’Imana.

Uretse aba, 49% bagaragaje ko abaryamana bahuje ibitsina ari abantu badasanzwe batandukanye n’abandi, mu gihe Abanyarwanda barenga 50% bo bemera ko kuba umuntu yaryamana n’uwo bahuje igitsina abiterwa n’amategeko abajenjekera.

Kugeza ubu bibarwa ko Abanyarwanda 32% aribo bashyigikira abaryamana bahuje ibitsina mu gihe abandi 43% bo bavuga ko bumva abari muri iki cyiciro ntacyo babatwaye.

Mu rwego rwo gushaka kumenya uko Abanyarwanda bumva ibijyanye n’uburenganzira bw’abaryamana bahuje ibitsina IGIHE yaganirije abantu batandukanye.

Kayumba Etienne wo mu Karere ka Gasabo, Umurenge wa Gisozi yavuze ko ibijyanye n’abaryamana bahuje ibitsina abyumva gusa kuko ntawe uramwerurira ngo amubwire ko ari muri icyo cyiciro.

Ati “Ntabwo nshaka kumenya ibijyanye n’ayo mategeko kuko numva nta binshishikaza kuri abo bantu. Nta nubwo nafata umwanya wanjye wo kubyumva kuko byaba ari ugutakazi igihe.”

Ibi abihuriyeho na mugenzi we Nzaramba Charles wemeza ko nubwo mu Rwanda nta mategeko ahari ahana abaryamana bahuje ibitsina, umuco nyarwanda utabyemera.

Ati “Nta mategeko cyangwa amabwiriza ahari ahana abanyamuryango ba LGBTQ ariko indangagaciro z’umuco wacu ntabwo zemera ibyo bintu.”

Nubwo hari abatemera ibijyanye n’uburenganzira bw’abaryamana bahuje ibitsina, Uwitonze Aisha wo mu Karere ka Muhanga we si ko abibona.

Uyu mukobwa w’imyaka 24 yabwiye IGIHE ko we yumva ari abantu nk’abandi badakwiriye kuvangurwa. Ati “Ahubwo niba dutangiye kuvuga amategeko yihariye areba abaryamana bahuje ibitsina numva ari ivangura dutangiye kubakorera kubera ko twese turi Abanyarwanda.”

Ikijyanye n’uburenganzira bw’abaryamana bahuje ibitsina ntigikunze kuvugwaho rumwe n’ibihugu, hari ibivuga ko ari abantu nk’abandi bakwiriye guhabwa uburenganzira nk’ubwo abandi bafite, mu gihe ibindi byiganjemo ibigendera ku mahame ya Islam bidakozwa iby’iyi ngingo.

Iyi ngingo kandi ikunze guteranya ibihugu, urugero ni nk’aho mu 2019 Leta ya Zambia yari iyobowe na Edgar Lungu yafashe icyemezo cyo kwirukana uwari Ambasaderi wa Leta Zunze Ubumwe za Amerika muri icyo gihugu nyuma yo kuvuga ko Zambia ikwiye guha rugari abaryamana bahuje ibitsina.

Ibindi bihugu bya Afurika nka Zimbabwe na Uganda byo byagiye byerura bikavuga ko bidakozwa iby’iyo ngingo yo kwemera abaryamana bahuje ibitsina.

Leta y’u Rwanda ihagaze he?

Mu Rwanda hashize iminsi habera ibikorwa bihuza abaryamana bahuje ibitsina birimo nk’inama zitandukanye, ubukangurambaga bwabo mu bijyanye n’ubuzima ndetse n’ibirori byo kumurika imideli, ibintu bituma benshi bibaza niba u Rwanda rwemera uburenganzira bwabo cyangwa rwarakomeje gutsimbarara nk’ibihugu byinshi bya Afurika.

Ibijyanye n’aho Leta y’u Rwanda ihagaze ku burenganzira bw’abaryamana bahuje ibitsina ni kimwe mu bibazo byabajijwe Perezida Kagame mu 2016 ubwo yari yitabiriye Rwanda Day yabereye i San Francisco muri Leta Zunze Ubumwe za Amerika.

Perezida Kagame yavuze ko icyo u Rwanda rushyize imbere ari uguhangana n’ibibazo rufite kandi ntihagire uwo ruheza mu kubishakira ibisubizo.

Ati “Ibyo ntabwo ari ikibazo kuri twe kandi ntiduteganya no kubigira ikibazo, turi guhangana n’ibibazo by’ubwoko butandukanye dufite kandi turashaka ko buri wese abigiramo uruhare agatanga umusanzu [...] nk’uko nabivuze icyo ntabwo ari ikibazo gikomeye kuri twe.”

Iyi ngingo kandi iherutse kugarukwaho mu kiganiro Ibiro by’Umuvugizi wa Guverinoma y’u Rwanda byagiranye n’itangazamakuru kuwa 14 Kamena 2022.

Umuvugizi Wungirije wa Guverinoma y’u Rwanda, Alain Mukuralinda yavuze ko imbere y’amategeko y’igihugu abantu bose bareshya kandi nta vangura ribaho.

Ati “Hano mu Rwanda imbere y’amategeko abantu bose barareshya nta kuvangura uruhu, idini cyangwa se ababana bahuje ibitsina ariko ntekereza ko abafite icyo kibazo bashobora no kureba ijambo Perezida wa Repubulika yigeze kuvugira muri Rwanda Day. Kandi nta tegeko dufite rivangura, nta mpungenge rero abantu babana bahuje ibitsina bari bakwiye kugira.”

Nubwo Leta y’u Rwanda ivuga ko imbere y’amategeko abantu bose bareshya, ingingo ya 14 mu gitabo cy’amategeko y’igihugu iteganya ko “Ugushyingiranwa k’umugabo umwe n’umugore umwe gukorewe mu butegetsi bwa Leta ku bushake bwabo ariko kwemewe”.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .