00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rugiye kubona uruganda rutunganya diamant

Yanditswe na Rabbi Malo Umucunguzi
Kuya 21 June 2022 saa 07:17
Yasuwe :

Imishinga ikomeye y’ishoramari mu ikoranabuhanga, ubuhinzi, ubwikorezi n’ibindi, ikomeje kumurikirwa mu Rwanda mu gihe rwakira Inama y’Abakuru b’Ibihugu na za Guverinoma bigize Commonwealth, CHOGM.

Kimwe mu bigo birimo kumurika ibyo bikora ni Solex Rwanda, Ikigo cyatangijwe n’abashoramari bo muri Afurika y’Epfo bakora imirimbo ihenze cyane binyuze mu gutunganya amabuye y’agaciro arimo diamant, amabengeza (Amethyst) na gemstones.

Umuyobozi Mukuru wa Solex Rwanda Ltd, Solly Masilo, yabwiye IGIHE ko aya mabuye y’agaciro bayabyazamo imirimbo yo ku rwego ruhanitse, cyangwa bakayataka, bakayanogereza mu buryo umukiliya ashobora kubyifuzamo.

Masilo ari mu Rwanda hamwe n’itsinda rinini, ndetse bamaze gushinga icyo kigo kizaba gikora ibintu bitatu by’ingenzi. Gukora imirimbo, gukata gemstones no gutunganya diamant (cutting and polishing).

Ni ikigo cyatangijwe n’abantu bafite imyaka irenga 20 mu bijyanye no gutunganya amabuye y’agaciro, agakurwamo imirimbo ihenze.

Mu bikoresho uru ruganda rurimo kumurika mu Rwanda harimo impeta zihenze, imikufi yo mu ijosi, n’akabumbano bise Inyambo, kakoreshejweho kara (carat) 18 za zahabu ku buryo kagurishwa $32.000.

Bafite n’ibindi byinshi bikozwe muri diamant, ifeza (silver) n’ibindi, biri mu byiciro biciriritse n’ibyihagazeho.

Masilo yagize ati "Impamvu twaje mu Rwanda ni uko usanga rufite politiki nziza, ndetse rwashyizeho uburyo buhamye bworohereza abashoramari. Hari n’imitungo kamere nk’amabuye y’amabengeza (amethyst), ifeza, ndetse ruherereye mu Karere kabonekamo amabuye y’agaciro nko muri Tanzania (haboneka Tanzanite) n’andi mabuye nka zahabu."

"Ikindi mwibuke hano hari uruganda rushongesha amabuye y’agaciro rwa Aldango, tukaba natwe turi muri urwo rwego."

Yavuze ko mu Rwanda bifuza kuhakorera imirimbo yo ku rwego rwo hejuru igenewe abakiliya mu gihugu, mu Karere no ku rwego mpuzamahanga.

Iki kigo giteganya ko uretse kubaka uruganda, hazubakwa n’ububiko buzaba buranguza abacuruzi imirimbo igezweho, baba abo mu Rwanda, mu Karere no hanze yako.

Masilo avuga ko icyemezo cyo gushora imari mu Rwanda bagifashe kubera ko rwizewe ku rwego mpuzamahanga, ku buryo n’ibyahakorewe usanga bifite agaciro.

Byongeye, ngo u Rwanda ni igihugu kiri ku murongo, cyemera ko Afurika ikwiye kubyaza umusaruro amabuye y’agaciro ayibonekamo, aho kugira ngo yoherezwe ahandi, akorwemo ibintu bigaruka bihenze.

Yakomeje ati "Mu kwezi gutaha tuzazana ibikoresho byacu dutangire ibikorwa, ariko bizaba bijyanye no gukora imirimbo, gukata diamant no kuzitunganya, no gukata gemstones no kuzitunganya. Mu bijyanye no gukora imirimbo duteganya guha akazi abantu bagera kuri 20 mu ntangiriro."

Mu bijyanye no gutunganya diamant, bateganya kuzaba bafite abantu bari hagati ya 20-40, barimo Abanyarwanda bazahabwa amahugurwa y’ibanze y’amezi atandatu y’uburyo iyi mirimo ikorwa.

Kugira ngo umuntu abe abizobereyemo neza ngo bisaba nibura amahugurwa y’amezi 18.

Biteganywa ko mu bazahabwa umwihariko harimo abana b’impfubyi za Jenoside yakorewe Abatutsi mu 1994, kugira ngo babone ubumenyi bushobora guhindura imibereho yabo.

Masilo yashimangiye ko CHOGM ari amahirwe akomeye babonye nk’abikorera, yo kumenyekanisha ibyo bakora, ku buryo biteguye kurushaho kubigeza no mu masoko ya kure.

U Rwanda kandi rufite umwihariko ko ari igihugu kiri hagati muri Afurika, ku buryo cyaba irembo ryiza ryo kwinjira no mu bindi.

Nyuma yo gushinga uru ruganda mu Rwanda, hazahita hashingwa ishami ryarwo muri Botswana, muri Afurika y’Amajyepfo.

Ntabwo amafaranga yo gutangiza uruganda mu Rwanda aremezwa neza, ariko ngo azaba abarirwa muri miliyoni z’amadolari ya Amerika.

Biteganywa ko uru ruganda ruzaba rwubatswe mu Cyanya cyahariwe Inganda cya Masoro, mu Karere ka Gasabo, mu Mujyi wa Kigali.

Aka kabumbano bise Inyambo kagurwa $32,000
Solex Rwanda ifite imirimbo myinshi ya zahabu na diamant
Perezida Kagame asura ahakorera Solex Rwanda
Moto zikoresha amashanyarazi nazo zirimo kumurikirwa ahabera CHOGM
Ahabera CHOGM 2022 hatatswe byihariye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .