U Rwanda na Kenya byasinye amasezerano yo guteza imbere ubukerarugendo

Yanditswe na Ndahayo Emmanuel
Kuya 20 Mutarama 2021 saa 07:22
Yasuwe :
0 0

Urwego rw’Igihugu rw’Iterambere rubinyujije mu Ishami ryarwo ry’Ubukerarugendo (RCT) rwasinye amasezerano y’ubufatanye n’Ishyirahamwe ry’Ibigo bitwara Abakerarugendo muri Kenya (Kenya) ndetse na ‘East African Tourism Platform (EATP)’ agamije guteza imbere urwego rw’ubukerarugendo hagati y’ibihugu byombi.

Uretse ubukerarugendo, aya masezerano azanafasha mu kongera ubufatanye hagati y’ibihugu byombi mu bigendanye n’ubwikorezi bwo mu kirere, byose bigamije gufasha ibihugu byombi kongera umusaruro wabyo muri izo ngeri zombi.

Kugira ngo ibyo bigerweho, ibigo byasinye aya masezerano hagati y’ibihugu byombi bizafatanya mu gucyemura ibibazo bikigaragara mu bukerarugendo ndetse hanafatirwe hamwe ingamba zo gushyiraho ibisubizo birambuye by’uko ibyo bibazo byakemurwa, uburyo ubukerarugendo bwarushaho kwamamazwa n’uko bwagezwa ku masoko mashya, bugakomeza gukura muri rusange.

Ibi bizakorwa binyuze mu gusangira amakuru hagati ya RDB, RCT na KATA, aho bizasangira amakuru arebana n’uburyo bwo kwamamaza ubukerarugendo bw’ibihugu byombi mu rwego rwo gukomeza kongera umubare w’abasura ibyiza nyaburanga biri mu Rwanda na Kenya.

Ibihugu byombi kandi bizasangira amakuru binyuze mu ngendoshuri n’amahugurwa azakorwa hagati yabyo, ndetse aya akazaba n’amahirwe y’imikoranire myiza hagati y’ibigo by’abikorera mu bukerarugendo baturutse mu bihugu byombi.

Ubu bufatanye kandi buzagera mu bindi bikorwa birimo gusangira ubumenyi mu by’ubukerarugendo, kwigiranaho binyuze mu ngendoshuri, gushishikariza abakerarugendo basuye igihugu kimwe gusura n’ikindi, gusangira amakuru y’ibikorwa bikomeye by’ubukerarugendo bitegerejwe no gukorana n’ibindi bihugu bya Afurika mu guteza imbere ubukerarugendo binyuze mu Isoko Rusange rya Afurika riherutse gutangizwa ku mugaragaro ku wa 1 Mutarama uyu mwaka.

Muri ayo masezerano, ku ruhande rw’u Rwanda hari Ambasaderi w’u Rwanda muri Kenya, Richard Masozera; Umuyobozi Mukuru wa KATA, Agnes Mucuha; Umuyobozi Mukuru wa EATP, Fred Odek n’Umuyobozi Mukuru wa RwandAir muri Kenya, Robert Okumu.

Umuyobozi Mukuru wa RDB, Clare Akamanzi, yavuze ko ubu bufatanye buzagirira akamaro ibihugu byombi.

Yagize ati “Dushimishijwe n’ubu bufatanye kandi twiteguye kuzakorana n’abafatanyabikorwa bose kugira ngo twongera umusaruro uturuka mu bukerarugendo ndetse tunarushaho kurema imirimo itanga akazi ku bantu benshi. U Rwanda na Kenya ni ibihugu bisanzwe bikunzwe n’abakerarugendo basura Akarere ka Afurika y’Iburasirazuba kandi twiteguye gukomeza kwakira abantu benshi banyotewe no kubona ibyiza biri muri aka Karere.”

Umuyobozi wa RCT, Aimable Rutagarama, yavuze ko aya masezerano azafasha ibihugu byombi kongera abakerarugendo babisura.

Yagize ati “U Rwanda na Kenya ni ibihugu bikunzwe cyane n’abakerarugendo, kongera ubufatanye hagati y’ibihugu byombi rero bizongera umubare w’abakerarugendo bifuza gusura ibihugu byombi. Ubu bufatanye kandi buzashyiraho urufatiro rukomeye rutuma ibi bihugu byombi biba amarekezo akurura ba mukerarugendo bo mu Karere ndetse n’abo mu yandi mahanga.”

Umuyobozi wa KATA na we yavuze ko bishimiye gukorana n’u Rwanda muri aya masezerano.

Yagize ati “Twishimiye gukorana na RDB, RCT na EATP kuko ubu bufatanye buzafasha ibihugu byayasinye gusangira ibitekerezo, ubushobozi ndetse n’ubunararibonye. Ibi kandi bituma u Rwanda na KATA bizagera ku ntego yo kuba amarekezo y’inzozi ku bakerarugendo, bityo duhaze ibyifuzo byabo.”

Fred Odek yunze mu ryabo avuga ko ubu bufatanye bugiye kugena imiterere y’ubukerarugendo muri aka Karere mu gihe kiri imbere.

Yagize ati “Ubu bufatanye buzagena imiterere y’ubukerarugendo bw’Akarere. Iki ni cyo gihe cyiza cyo gufatanya tugateza imbere ubukerarugendo ndetse n’inyungu bugenera ababugiramo uruhare bose.”

Umuyobozi wa RwandAir muri Kenya, Robert Okumu, na we yavuze ko iki kigo kizagira uruhare mu ishyirwa mu bikorwa ry’aya masezerano.

Ati “RwandAir izaba umuterankunga w’amatike muri izi ngendo zigana mu Rwanda mu rwego rwo koroshya isaranganyabumenyi n’ubunararibonye.”

Yongeyeho ko RwandAir yateganyije uburyo bwo kugabanya igiciro cy’urugendo ku bakerarugendo baturutse muri Kenya bifuza gusura u Rwanda.

Muri rusange, abantu 1 000 batembera hagati ya Kenya n’u Rwanda ku mpamvu z’ubucuruzi no kwishimisha buri kwezi.

Ambasaderi w’u Rwanda muri Kenya, Richard Masozera, yavuze ko iri sinywa ry’amasezerano ari umusaruro w’umubano w’ibihugu byombi.

Yagize ati “Isinywa ry’aya masezerano hagati ya RDB, RCT, KETA na EATP rishimangira umubano mwiza usanzwe hagati y’ibihugu bya Kenya n’u Rwanda. Ubu bufatanye kandi bugize intego zo kubaka ubushobozi bw’ubukerarugendo muri aka Karere. Mu gihe turajwe ishinga no guteza imbere imigenderanire ni ingenzi cyane ko twita ku migenderanire y’imbere mu bihugu byacu niba twifuza ko uru rwego ruzanzamuka.”

Ubukerarugendo ni kimwe mu bikorwa bishingiyeho imibanire y’u Rwanda na Kenya. Kenya ni kimwe mu bihugu bisurwa cyane n’abakerarugendo b’Abanyarwanda kandi bagenda biyongera buri mwaka.

Ku rundi ruhande, abakerarugendo baturuka muri Kenya bakomeje kwiyongera cyane mu gusura u Rwanda, aho Umujyi wa Kigali uri muri bimwe mu bice bakunze gusura cyane.

Aya masezerano ategerejweho guteza imbere ubukerarugendo hagati ya Kenya n'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .