00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda na Barbados byasinyanye amasezerano ashobora gufungurira imiryango RwandAir

Yanditswe na Iradukunda Serge
Kuya 9 Ugushyingo 2022 saa 03:39
Yasuwe :

U Rwanda na Barbados byashyize umukono ku masezerano y’ubufatanye mu guteza imbere ingendo zo mu kirere hagati y’ibihugu byombi, ashobora gutuma Sosiyete nyarwanda ikora ubwikorezi bwo mu kirere, RwandAir itangira gukora ingendo zijya muri iki gihugu.

Aya masezerano yashyizweho umukono kuri uyu wa Gatatu tariki 9 Ugushyingo 2022. Uruhande rw’u Rwanda rwari ruhagarariwe na Minisitiri w’Ibikorwaremezo, Dr Ernest Nsabimana, mu gihe Barbados yo yari ihagarariwe na Minisitiri w’Ububanyi n’Amahanga n’Ubucuruzi mpuzamahanga, Kerrie Symmonds.

Minisitiri Dr Nsabimana yavuze ko aya masezerano ashimangira icyerekezo u Rwanda rufite cyo kuba igicumbi mu guteza imbere ingendo zo mu kirere hirya no hino ku Isi.

Yavuze ko nyuma y’aya masezerano u Rwanda rugiye kureba uburyo RwandAir yatangira gukorera ingendo muri Barbados.

Ku ruhande rwa Barbados, Minisitiri Kerrie Symmonds yavuze ko igihugu cye cyifuza ko RwandAir yatangira kuhakorera ingendo vuba bishoboka.

Ibiganiro byo kuba ibihugu byombi byagirana aya masezerano yashyizweho umukono uyu munsi byatangiye muri Nzeri 2022, ubwo u Rwanda rwari rwitabiriye inama y’ubucuruzi n’ishoramari hagati ya Afurika n’ibihugu byo muri Caraïbes.

Biteganyijwe ko mu gihe RwandAir yatangira izi ngendo yazajya ihaguruka ku Kibuga Mpuzamahanga cya Kigali ikagera Barbados nta handi inyuze.

Ibi bivuze ko Abanyarwanda n’abandi baturage bo mu karere bazoroherwa n’ingendo zo kugera muri Barbados kuko nk’ubusanzwe umuntu washakaga kujya muri iki gihugu ahagarutse i Kigali, igihe yakoresheje RwandAir cyangwa KLM yabanzaga kunyura Bruxelles na Amsterdam akabona kugera muri iki gihugu.

Ku bakoresheje Kenya Airways bo babanza kunyura Nairobi, Londres bakabona kugera Barbados, uwakoresheje Brussels Airlines we abanza guca Entebbe- Bruxelles na Amsterdam.

Ibi biganiro n’ubutwererane hagati y’u Rwanda na Barbados, byasembuwe n’urugendo rw’akazi Perezida Paul Kagame yagiriye muri iki gihugu muri Mata 2022.

Barbados ni igihugu kiri mu Burengerazuba bw’Inyanja ya Atlantique wegera iya Caraïbes.

Iki Kirwa gikikijwe n’Inyanja impande zose, kiri ku buso bwa kirometero kare 439 (439 km2), aho gituwe n’abaturage barengaho gato ibihumbi 285. Kuva ku mpera y’Amajyepfo ugera ku mpera y’Amajyaruguru y’Igihugu, igice kirekire ni ibirometero 34, bikaba 23 kuva mu Burasirazuba ugana mu Burengerazuba. Muri rusange, umuzenguruko w’iki gihugu ni ibirometero 97 gusa.

U Rwanda rushobora kandi kubaka umubano na Barbados mu bijyanye no guteza imbere ishoramari mu bukungu mu rugendo rurimo rwo guhindura Kigali icyicaro cy’ibigo by’imari muri Afurika.

Barbados yateye imbere cyane muri iki cyiciro, aho binyuze mu ivugururwa ry’amategeko, gusonera abashoramari n’ibindi bikorwa byorohereza abashoramari, urwego rw’imari muri Barbados ruhagaze neza cyane.

Umusaruro mbumbe wari miliyari 5.2$, umuturage umwe yinjiza ibihumbi 18$, nk’uko imibare yo mu 2019 ibyerekana. 90% by’abatuye iki gihugu ni Abirabura, abandi bakaba abafite inkomoko mu Burayi n’ahandi.

Mu bakerarugendo miliyoni imwe basura Barbados buri mwaka, nibura 39% basubira muri icyo gihugu, aho kiri mu bya mbere ku Isi mu kugira umubare munini w’abakerarugendo bagisura inshuro irenze imwe.

Nubwo ari igihugu gihenze, ndetse kigashyigikira ubukerarugendo bwo ku rwego rwo hejuru (high-end tourism), nk’uko bimeze ku Rwanda, usanga abasuye iki gihugu birengagiza izo mbogamizi zose bagasurayo, bitewe n’uko ari igihugu cyiza by’agatangaza.

U Rwanda na Barbados byasinyanye amasezerano ashobora gufungurira imiryango RwandAir

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .