U Rwanda mu bihugu bine bya Afurika bishobora gufungurirwa imipaka mu gace ka Schengen

Yanditswe na Habimana James
Kuya 27 Kamena 2020 saa 10:16
Yasuwe :
0 0

Ibihugu bigize agace ka Schengen, byatangaje ko bishobora kongera gufungura imipaka yabyo tariki 1 Nyakanga, gusa ibyinshi mu bihugu byo ku mugabane wa Afurika ntibyashyizwe ku rutonde.

Abaturage bo mu bihugu bine gusa kuri uyu mugabane ari byo; Algeria, Maroc, Tunisia n’u Rwanda nibo bashyizwe ku rutonde rw’abashobora kwemererwa kwinjira mu bihugu bigize agace ka Schengen.

Ba ambasaderi b’ibihugu bigize Umuryango w’Ibihugu by’u Burayi, bari bamaze igihe mu biganiro byarangiye mu ijoro ryo kuri uyu wa Gatanu bemeranyije ku kongera gufungurira imipaka ibihugu 14 byo hanze y’agace ka Schengen kuva kuwa 1 Nyakanga 2020.

Urutonde rw’ibihugu byakomorewe rwatanzwe kugira ngo buri gihugu mu bigize Schengen kibyemeze cyangwa kibyange kandi hatangwe igisubizo bitarenze ku mugoroba wo kuri uyu wa Gatandatu, bityo kuwa Mbere bizemezwe cyangwa byangwe hagendewe ku bwiganze.

Imwe mu mijyi y’ibihugu bigize Schengen yasabye ko yongererwa igihe cyo gukora isuzuma ryimbitse ku bihugu bisabirwa gufungurirwa imipaka.

Umunyamabanga Mukuru w’Umuryango w’ibihugu bikoresha Igifaransa, Louise Mushikiwabo, yashimye iyi ntambwe yatewe n’ibihugu bya Afurika.

Yanditse kuri Twitter ati “Kwirinda birakomeza, ariko ndashima cyane ibihugu 4 by’Afurika, 3 biri mu muryango wacu wa Francophonie, byatoranyijwe n’Umuryango w’Uburayi ngo bifungurirwe imipaka yawo kuva iya 1 Nyakanga kubera kurwanya neza icyorezo cya koronavirusi; Tunisia, Maroc, Rwanda na Algeria”.

Agace ka Schengen muri rusange kagizwe n’ibihugu 26 by’i Burayi byashyize umukono ku masezerano yasinyiwe i Schengen muri Luxembourg, bikemeranya gukora nk’agace kamwe mu bijyanye n’ingendo mpuzamahanga no kugenzura imipaka, ku buryo ingendo hagati yabyo zikorwa mu bwisanzure.

Aka gace kagizwe na Autriche, u Bubiligi, Repubulika ya Tchèque, Denmark, Estonia, Finlande, u Bufaransa, u Budage, u Bugereki, Hongrie, Iceland, u Butaliyani, Latvia, Liechtenstein, Lithuania, Luxembourg, Malta, u Buholandi, Norvège, Pologne, Portugal, Slovaquie, Slovenia, Espagne, u Busuwisi na Suède.

Imipaka y’ibi bihugu yafunzwe guhera muri Werurwe, mu gukomeza kwirinda ikwirakwira rya virusi ya Coronavirus ku mugabane w’i Burayi.

Abaturage b’ibindi bihugu icyenda byemerewe kuzerekeza muri Schengen igihe imipaka izaba yafunguwe harimo; Australia, Canada, Georgia, u Buyapani, Montenegro, New Zealand, Serbia, Koreya y’Epfo, Thailand na Uruguay.

Uretse ibihugu byinshi bya Afurika bitari kuri uru rutonde na Leta Zunze Ubumwe za Amerika ntiruriho kuko iri mu bihugu byibasiwe cyane na Coronavirus.

Amakuru avuga ko kugira ngo igihugu gishyirwe ku rutonde rw’ibihugu byemerewe kujya mu gace ka Schengen, abaturage bacyo banduye coronavirus bagomba kuba bari munsi ya 16% by’abantu ibihumbi 100 mu gihe cy’iminsi 14 ishize. Uru rutonde rukazajya rusubirwamo nyuma ya buri byumweru bibiri.

Ikigo cyo mu Budage gikora Ubushakashatsi mu by’Indwara n’Ibyorezo, Robert Koch Institute, nacyo giherutse gukura u Rwanda ku rutonde rw’ibihugu aho ababigannye baba bafite ibyago byinshi byo kwandura icyorezo cya COVID-19.

Ibigenderwaho igihugu gishyirwa kuri uru rutonde bigabanyije mu byiciro bibiri, icya mbere ni igihe mu baturage ibihumbi 100 batuye ahantu hamwe haba haragaragayemo abarenze 50 banduye mu gihe cy’iminsi irindwi.

Mu cyiciro cya kabiri hagenzurwa icyo raporo z’abahagarariye u Budage mu bihugu bitandukanye bavuga ku kijyanye n’uko COVID-19 ihagaze mu bihugu barimo, n’uburyo amabwiriza yo kuyirinda ashyirwa mu bikorwa.

Kugira ngo igihugu gikurwe kuri uru rutonde habanza gukorwa igenzura ryemeza niba igihugu cyarakosoye ibiba byaratumye kirushyirwaho.

Mu Rwanda hafashwe ingamba zikomeye zo kwirinda Coronavirus harimo no gukaraba intoki

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .