U Budage bwakuye u Rwanda mu bihugu biteye impungenge kubera Coronavirus

Yanditswe na Iradukunda Serge
Kuya 18 Kamena 2020 saa 08:41
Yasuwe :
0 0

Ikigo cyo mu Budage gikora Ubushakashatsi mu by’Indwara n’Ibyorezo, Robert Koch Institute, cyakuye u Rwanda ku rutonde rw’ibihugu aho ababigannye baba bafite ibyago byinshi byo kwandura icyorezo cya COVID-19.

Ibigenderwaho igihugu gishyirwa kuri uru rutonde bigabanyije mu byiciro bibiri, icya mbere ni igihe mu baturage ibihumbi 100 batuye ahantu hamwe haba haragaragayemo abarenze 50 banduye mu gihe cy’iminsi irindwi.

Mu cyiciro cya kabiri hagenzurwa icyo raporo z’abahagarariye u Budage mu bihugu bitandukanye bavuga ku kijyanye n’uko COVID-19 ihagaze mu bihugu barimo, n’uburyo amabwiriza yo kuyirinda ashyirwa mu bikorwa.

Kugira ngo igihugu gikurwe kuri uru rutonde habanza gukorwa igenzura ryemeza niba igihugu cyarakosoye ibiba byaratumye kirushyirwaho.

Ni isesengura rikorwa n’inzego z’ubuyobozi mu Budage zirimo Minisiteri y’Ubuzima, Ibiro bishinzwe Ububanyi n’Amahanga ndetse na Minisiteri y’Ubutegetsi bw’Igihugu.

Minisitiri w’Ubuzima, Dr Ngamije Daniel, yatangaje ko gukurwa kuri urwo rutonde ari intambwe ishimishije.

Abinyujije kuri Twitter yagize ati “Amakuru meza ku muhate w’u Rwanda mu kurwanya COVID-19! U Rwanda ruratekanye kandi ruragendwa no muri ibi bihe bya COVID-19. Ni ubutumwa nakiriye bwa Ambasaderi, Dr Thomas Kurz!.”

Amakuru ava kuri uru rutonde agenderwaho na Leta y’u Budage mu gufata ibyemezo bitandukanye birimo n’igihe umuntu azamara mu kato igihe yinjiye muri iki gihugu, ndetse kandi agakoreshwa mu kuburira Abadage aho bari hirya no hino ku Isi.

Ubu butumwa bukura u Rwanda ku rutonde rw’ibihugu birimo ibyago byinshi byo kwandura COVID-19 buje busanga umubare w’abamaze kwandura iki cyorezo ungana na 646 barimo 350 bakize na 294 bakiri kwa muganga mu gihe abitabye Imana bo ari babiri.

Ikigo cya Robert Koch Institute gisanzwe gifitanye ubufatanye na Leta y’u Rwanda aho mu ntangiriro z’uyu mwaka aricyo cyaruhaye ikoranabuhanga rwifashishwa mu gupima icyorezo cya COVID-19.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .