U Bubiligi bwahaye u Rwanda Imbangukiragutabara eshatu za miliyoni 180 Frw

Yanditswe na Twarabanye Venuste
Kuya 22 Gashyantare 2020 saa 04:07
Yasuwe :
0 0

Ambasade y’u Bubiligi mu Rwanda yashyirikije Minisiteri y’Ubuzima imbangukiragutabara eshatu zo kwifashisha mu bikorwa byo kurwanya Ebola n’ubundi butabazi bwo kugeza abarwayi kwa muganga.

Binyuze mu Kigo cy’Ababiligi gishinzwe iterambere mpuzamahanga (Enabel), izo mbangukiragutabara zashyikirijwe Minisiteri y’ubuzima ku wa Gatanu tariki 21 Gashyantare 2020.

Izo modoka uko ari eshatu zifite agaciro ka miliyoni 180 Frw. U Bubiligi buzihaye u Rwanda mu rwego rwo kuba zafasha igihe habaho ikibazo cya Ebola ariko muri rusange zikaba zizajya zifashishwa mu kugeza abarwayi kwa muganga.

Ubuyobozi bw’ishami rishinzwe ubutabazi muri Minisiteri y’ubuzima bwatangaje ko zije ziyongera ku zindi zigera kuri 300 ziri mu Rwanda zizongera imbaraga mu gukemura ibibazo birebana no kujyana abantu kwa muganga.

U Bubiligi bufasha u Rwanda mu bikorwa bitandukanye birimo ubuzima, ubuhinzi no guteza imbere imijyi.

Muri Mata 2019 bwasinyanye n’u Rwanda amasezerano y’inkunga ya miliyoni 120 z’amayero, ni ukuvuga asaga miliyari 121 Frw azafasha muri izo nzego mu myaka ya 2019 na 2024.

Urwego rw’ubuzima ruzatangwamo miliyoni 45 z’amayero, ubuhinzi butangwemo miliyoni 30 naho guteza imbere imijyi bitware miliyoni 28 z’amayero mu gihe andi azakoreshwa mu gucunga neza umutungo wa Leta.

Iyo nkunga yaje ikurikira iyo u Bubiligi bwatanze mu 2011 ya miliyoni 160 z’amayero yakoreshejwe mu buzima , ingufu, ubuhinzi n’ibindi. Imishinga y’iterambere nk’iyo inyuzwa muri Enabel.

Imbangukiragutabara eshatu zatanzwe n'u Bubiligi zifite agaciro ka miliyoni 180 Frw

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .