Treasure Communications Limited yafunguye ishami rishya ry’imenyekanishabikorwa mu Rwanda

Yanditswe na Evariste Nsengimana
Kuya 17 Ukwakira 2019 saa 03:41
Yasuwe :
0 0

Ikigo Treasure Communications Limited kimaze kubaka izina mu gutanga serivisi zo kumenyekanisha ibikorwa muri Kenya, Uganda, na Tanzania , cyafunguye ishami rishya ku isoko ry’u Rwanda, cyizeza abakiliya kubazamurira inyungu y’ibyo bacuruza ndetse no kubimenyekanisha mu Rwanda.

Iri shami ryafunguwe kuri uyu wa 16 Ukwakira 2019, riherere Kacyiru mu Karere ka Gasabo, hafi y’ahahoze ibiro by’ako Karere mu ruhande ruherereyemo Ambasade y’Abanyamerika, umuhango witabiriye n’abantu batandukanye barimo abakiliya biki kigo, abakozi n’abandi.

Treasure Communications Limited imaze amezi ane ikorera mu Rwanda aho yari ifite ibiro muri Kigali City Tower, ikaba yimukiye Kacyiru.

Umuyobozi w’ishami rishinzwe iterambere ry’ubucuruzi n’Abakiliya muri Treasure Communications Limited, Muneza Marie Claire, yavuze ko muri serivisi batanga harimo izifasha abafite ibikorwa kubimenyekanisha bigahita binagurishwa binyujijwe mu kubyamamaza basanga umuguzi.

Muri serivisi iki kigo gitanga, hari gutegura igicuruzwa mu iduka ku buryo bukurura umukiliyan (Merchandising), kwamaza ibicuruzwa ariko bigahita binagurishwa (Sales Promotions) , uburyo bwo kumenyekanisha ibikorwa binyuze mu bukangurambaga buzenguruka mu bice bitandukanye by’igihugu (Sales Trade development).

Ati “Ni ukuvuga ngo ni ibijyanye no gukora ubukangurambaga uzenguruka mu bice bitandukanye ariko unacuruza. Icyo gihe iyo umuntu cyangwa ikigo runaka kibidusabye turakorana, tukamwigira uburyo yabikoramo tukanamufasha kubikora kugira ngo bibashe kumubyarira inyungu.”

Treasure Communications Limited kandi inatanga serivisi yo gukurikiranira umukiliya ibicuruzwa bye ku masoko, ikamurebera niba ibicuruzwa na serivisi bye bigera aho bikwiye , kugira ngo icyo gicuruzwa kibashe kumenywa no kugurwa na benshi bikamubyarira inyungu ihagije.

Iki kigo gifite akarusho kihariye ko gukoresha Application yitwa “ Efisales”, aho serivisi zose batanga babasha kuzikoresha binyuze muri application ndetse n’umukiliya akaba yabasha gukurikirana ibikorwa byose umunota ku wundi ndetse bikamworohera kubona raporo nyakuri kuri serivisi ahabwa.

Iyi Porogaramu inafasha mu gukora igenzura rigaragaza uko ibicuruzwa na serivisi by’umukiliya bikunzwe ku isoko n’aho biherereye n’aho bikunzwe bitaragezwa bikagezwayo.

Umuyobozi mukuru wa Treasure Communications Limited, Francis Mworia, yavuze ko icyo kigo kimaze imyaka irindwi gitanga izo serivisi zo gufasha abakiliya babo kumenyekanisha ibyo bacuruza na serivisi zabo ku baguzi hagamijwe kuzamura inyungu zibyo bacuruza.

Ati “Iyo dukora ibyo, icyo twibandaho cya mbere ni uguha umukiliya agaciro mu rwego rwo kumwizeza ko ibyo yahigiye kugeraho yabigeraho.”

Francis yavuze ko ibyo bashyize imbere ari ugufasha abakiliya kubona inyungu y’amafaranga mu byo bakora no gukurikira uko ibicuruzwa na serivisi batanga bimenyekana kandi bikanagurwa hirya no hino babifashijwemo na Application ya efisales.

Ati “Binyuze mu makuru umukiliya ahabwa n’iyo Application abasha guteganya, akavuga ngo uku kwezi nikurangira nzaba maze gucuruza ibintu ibi n’ibi kwashira akagenzura niba byaragezweho.”

Francis yavuze ko umwihariko w’ikigo ayobora ari uko gifite ingamba zihariye aho abakozi bacyo begera umukiliya bagafatanya mu igenamigambi, bakamugira inama icyamufasha kugera ku ntego ze vuba.

Ati “Ibyo tubikora mu kiguzi giciriritse ugeranyije n’agaciro ka serivisi duha umukiliya. Turamwegera tukareba icyo yabonye ugeranyije n’igishoro yakoresheje akagira ijanisha aduha.”

Yakomeje agira ati “Tuzishimira no kubona abandi bakiliya basanzwe bakoresha ubundi buryo cyangwa bakorana n’ibindi bigo baza tugafatanya.”

Umwe mu bakiliya b’iki kigo witwa Wandeo Evelyne yagizwe ati “Natangiye gukorana na Treasure mu mezi ane ashize, ubu bucuruzi bwo mumbazemo imyaka itatu, nahoraga nshakisha ikigo nakorana nacyo ntibinyorohere, kugeza ubwo ngeze kuri Treasure Communication, icyo nabasobanurira ni uko ibikorwa byanjye biri gutera imbere.”

Treasure Communications Limited imaze imyaka irindwi ifasha abashoramari kumenyekanisha no gukurisha ibicuruzwa na serivisi mu bihugu bya Kenya, Uganda Tanzania n’u Rwanda, kuri ubu ikaba ikorana n’ibigo 23.

Umuyobozi mukuru wa Treasure Communications Limited, Francis Mworia, yavuze ko icyo kigo kimaze imyaka irindwi gitanga izo serivisi zo gufasha abakiliya babo kumenyekanisha ibyo bacuruza na serivisi zabo
Abantu batandukanye bitabiriye itangizwa ry'iki kigo
Byari ibyishimo ubwo Treasure Communications Limited yatangizwaga
Umuyobozi w’ishami rishinzwe iterambere ry’ubucuruzi n’Abakiliya muri Treasure Communications Limited, Muneza Marie Claire (ibumoso)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza