Sosiyete y’itumanaho ya Airtel ifatanije na Minisiteri y’Urubyiruko n’ikoranabuhanga mu itumanaho bakiriye inama y’akarere igamije gusuzuma umushinga wa “One Network Area Project”, umushinga uhuriweho na sosiyete z’itumanaho mu karere ugamije korohereza abakiriya babo mu biciro; ni umwe mu mishinga y’ibikorwa remezo bihuriweho n’ibihugu bikoresha Umuhora wa ruguru.

Iyi nama yabereye I Kigali, yateranije abahagarariye sosiyete z’itumanaho mu karere, abashinzwe imirimo ifitiye igihugu akamaro, abaminisitiri b’ikoranabuhanga mu itumanaho ndetse n’abandi bayobozi bakuru bahagarariye ibihugu bine bikoresha Umuhora wa Ruguru; Uganda, Kenya, Sudani y’Epfo n’u Rwanda. Bimwe mu byaganiriweho harimo uko abafatanyabikorwa mu itumanaho bo muri ibyo bihugu bafatanya mu koroshya ibiciro no guhuza serivisi baha abakiriya.

Afungura iyi nama, Gatete Claver, Minisitiri w’Imari n’Igenamigambi w’u Rwanda yagarutse ku kamaro k’itumanaho mu guhuza ibikorwa by’akarere. Ati “Sosiyete z’itumanaho zigira uruhare runini muri iyi nkingi (itumanaho) yo guhuza ibikorwa by’akarere. Bityo dukwiriye gukorana nabo ngo tuzabashe gushyira mu bikorwa umushinga wa One Area Network Project”.

Naho Umuyobozi Mukuru wa Airtel, Teddy Bhullar yagaragaje ko sosiyete ayoboye yiteguye gufata iya mbere mu gusohoza icyifuzo cyo koroshya no guhuza serivisi baha abakiriya, ati “Ibi bigaragazwa na gahunda yacu ya ‘One Network’ (murandasi imwe) mu bihugu 17 harimo n’akarere ka Afurika y’I Burasirazuba”.

Bhullar yongeyeho ko ubu abakiriya ba Airtel babasha kwitaba ku buntu iyo bahamagawe n’abantu bari mu bindi bihugu.

Jean Philbert Nsengimana, Minisitiri w’Urubyiruko n’Ikoranabuhanga mu itumanaho mu Rwanda yahamagariye sosiyete z’itumanaho zikorera mu karere na za guverinoma kwihutisha iyoroshywa rya serivisi zihabwa abaturage kugirango bajye babasha gutumanaho. Yaboneyeho gushimira Airtel ko yafashe iya mbere mu gushyira mu bikorwa iyi gahunda.

Naho Dr Fred Matiang’i, Umunyamabanga wa Leta ya Kenya muri Minisiteri y’Ikoranabuhanga mu itumanaho yasabye ko sosiyete z’itumanaho zashyiraho urubuga ruhoraho zizajya zihuriramo na minisiteri z’ikoranabuhanga mu itumanaho bakaganira ku mbogamizi ziba mu rwego rw’itumanaho.

Hejuru ku ifoto: Minisitiri Nsengimana na Teddy Bhullar wa Airtel