Sitasiyo yatwaye miliyari 17Frw yitezweho guhaza amashanyarazi icyanya cy’inganda cya Kigali

Yanditswe na Evariste Nsengimana
Kuya 27 Nzeri 2018 saa 04:09
Yasuwe :
0 0

Guverinoma y’u Rwanda yungutse sitasiyo nto (substation) nshya y’amashanyarazi, yitezweho gukemura ikibazo cy’umuriro mu cyanya cy’inganda cya Kigali.

Iyi sitasiyo nto ya Ndera mu Karere ka Gasabo ifite ubushobozi bwo kugabura Mega Volt Amp (MVA) 40 z’amashyanyarazi. Yubatswe mu mushinga watewe inkunga na Guverinoma y’u Buyapani, ibinyujije mu Ikigo cyayo gishinzwe ubutwererane mpuzamamahanga, JICA.

Yatangiye kubakwa mu 2016, yuzura mu 2018 itwaye miliyoni 2219 z’ama- Yen, ni ukuvuga asaga miliyari 17Frw.

Ubwo yafungurwaga kuri uyu wa Kane, Umunyamabanga wa Leta muri Minisiteri y’ibikorwa remezo ushinzwe ingufu, amazi, isuku n’isukura, Kamayirese Germaine, yashimiye u Buyapani ku nkunga bukomeza guha u Rwanda.

Yanavuze ko iyi sitasiyo izafasha mu kongera ingufu n’ingano z’amashanyarazi mu Mujyi wa Kigali, cyane cyane mu gace kahariwe inganda.

Umujyi wa Kigali wihariye 64% by’amashanyarazi yose akoreshwa mu gihugu, ariko icyanya cyahariwe inganda kiri mu bice bikenera mwinshi nk’uko gikomeje kwaguka.

Kamayirese yagize ati “Ni ukugira ngo ihe inganda imbaraga zibashe gukora umuriro wacu udacikagurika kandi binagabanye umuriro wajyaga utakarira hirya no hino kuko iki gice cyakuraga amashanyarazi kure.”

Ambasaderi w’u Buyapani mu Rwanda, Takayuki Miyashita, yavuze ko bwahisemo gufasha agace kahariwe inganda kuko ari nkingi ikomeye y’iterambere ry’igihugu.

Ati “Twishimiye kuhafasha kubona amashanyarazi. Iyi sitasiyo izafasha gutanga umuriro uhamye muri aka gace, twe nka Leta y’u Buyapani twishimira uruhare rwacu mu iterambere ry’u Rwanda.”

Umwe mu bagize itsinda ry’Abadepite b’u Buyapani baje gufungura iyi sitasiyo, Shingo Miyake, yashimiye abantu bose bagize uruhare mu iyubakwa ry’iyi sitasiyo.

Yavuze ko izakemura ikibazo cy’ibura n’itakara ry’umuriro w’amashanyarazi ryagiraga ingaruka ku kazi k’abaturage, inganda n’imibereho y’abaturage.

Iyi sitasiyo yubatswe mu gice cya kabiri cy’umushinga w’u Buyapani wo gukwirakwiza amashanyarazi afite imbaraga mu Rwanda.

Icya mbere cya 2011-14 cyafashije gusana Sitasiyo ya ya Jabana, iya Gikondo no kongerera ubushobozi iza Musha na Rwinkavu, cyatwaye miliyoni 2454 z’ama-Yen.

Icya gatatu kizakorwa 2018-20 ni ukubaka sitasiyo ya Gasogi no gusana imiyoboro, bizatwara ama Yen 2 635.

Guverinoma iheruka gukora impinduka mu buryo inganda zishyura umuriro w’amashyanyarazi, aho zashyiriweho kujya zishyura amafaranga make mu masaha y’ijoro, hagamijwe ko inganda zikora cyane mu gihe abantu badakeneye amashyanarazi ari benshi.

Umunyamabanga wa Leta muri Mininfra, Germaine Kamayirese na Ambasaderi w’u Buyapani mu Rwanda Takayuki Miyashita bafungura iyi sitasiyo nto
Abayobozi batandukanye bitabiriye itahwa ry'iyi sitasiyo nto ya Ndera
Iyi sitasiyo nto yitezweho guhaza amashanyarazi icyanya cyagenewe inganda cya Kigali
Byitezwe ko iyi sitasiyo nto izagabanya amashanyarazi yajyaga atakarira mu nzira kubera imiyoboro isanzwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .