Sima ya Prime Cement ikorerwa ku butaka bw’u Rwanda yagejejwe ku isoko (Amafoto)

Yanditswe na N.Kubwimana Janvière
Kuya 2 Nzeri 2020 saa 12:10
Yasuwe :
0 0

Uruganda rwa Prime Cement Ltd ruherereye mu Karere ka Musanze mu Majyaruguru y’u Rwanda rwatangiye kugeza ku isoko sima yarwo mu rugendo rwo gufasha igihugu kuyihazaho.

Prime Cement Ltd kuri uyu wa Kabiri, tariki ya 1 Nzeri 2020, nibwo yamuritse sima yayo nshya, inemeza ko yatangiye kujya ku isoko.

Uru ruganda rwuzuye rutwaye asaga miliyari 37 Frw, ruherereye mu Murenge wa Kimonyi mu Karere ka Musanze mu cyanya cyahariwe inganda ahazwi nko mu Ruvunda.

Prime Cement yinjiye mu Rwanda ifite intego yo kuziba icyuho cya sima nke ku isoko ry’imbere mu gihugu.

U Rwanda rukenera sima ingana na toni 800,000 ku mwaka mu gihe igihugu gifite ubushobozi bwo gutunganya izigera kuri toni 480,000.

Umuyobozi Mukuru wa Prime Cement Ltd, Rolf Anttila, avuga ko intego ya mbere bafite muri uru ruganda ari ukuzamura ingano ya Sima ikorerwa mu Rwanda no kugabanya ingano y’iyatumizwaga hanze.

Yagize ati “Uyu ni umunsi w’ibyishimo kuri twe, ni ubwa mbere Sima dukora, Prime Ciment tuyishyize ku isoko. Intego dufite ni ukuzamura ingano ya sima ikorerwa mu Rwanda tukaziba icyuho cy’ibura ryayo ku isoko, ikindi ni uko bizatuma ingano ya sima yatumizwaga mu mahanga twifashishije ikorerwa mu Rwanda."

Bamwe mu bacuruzi banini b’ibikoresho by’ubwubatsi n’abandi bari mu mishinga y’ubwubatsi bavuga ko uru ruganda ruje ari igisubizo kuri bo cyane ko bizatuma sima ihenduka ku isoko.

Musabyimana Janviere usanzwe akora ubucuruzi bw’ibikoresho by’ubwubatsi yavuze ko bashimishijwe cyane no kwegerezwa uruganda rukora sima hafi yabo.

Yagize ati "Icya mbere ni uko bigiye gutuma ubucuruzi bwacu bwaguka, ikindi ni uko yasaga n’iyabuze ku buryo bamwe bari barahagaritse ibikorwa byabo by’ubwubatsi n’aho yabonekaga yabaga ihenze itari munsi y’ibihumbi 13 Frw, ariko aha batwemereye ko tuzajya tuyibona ku 9,500 Frw. Abantu bagiye kongera gusubukura ibikorwa byabo bifashishije sima nziza ikomoka ku makoro yacu.’’

Simpenzwe David na we wari mu bikorwa by’ubwubatsi yavuze ko sima itari ikibonek ku isoko mu buryo bworoshye.

Ati “Ubu [sima] yari igeze ku13500 Frw, waba uyiguze ku muntu musanzwe mukorana neza akayiguhera 13,000 nayo yabaga yaraturutse hanze. Hari n’abari barahagaze kubaka, none uru ruganda ruje nk’igisubizo nta muntu uzongera kugorwa no kubona sima. Tuyibonye hafi kandi kuri make ndetse yizewe, aka ni agaciro k’Abanyarwanda.’’

Muri bimwe mu byifashishwa hakorwa sima ya Prime Ciment harimo umwihariko w’amabuye azwi nk’amakoro yaturutse ku iruka ry’ibirunga, aboneka cyane mu Turere twa Musanze, Burera, Nyabihu na Rubavu, hakongerwamo n’ibindi biyabutabire bitandukanye.

Uruganda rwa Sima Prime Ciment mu itangira ryarwo rufite ubushobozi bwo gukora Sima ingana na toni 600,000, bikaba biteganyijwe ko mu gihe cy’imyaka ibiri iri imbere ruzongera ingano y’ibyo rukora ikagera kuri 1,200,000. Uru ruganda rumaze gutunganya toni za sima zigera ku bihumbi 100.

Prime Cement ni iy’ikigo Milbridge Holding SA gihuriramo ibindi byinshi biri mu bucuruzi bwo gukora ibintu mu nganda n’ibikoresho by’ubwubatsi muri Angola, Leta Zunze Ubumwe z’Abarabu, u Rwanda na Afurika y’Epfo.

Prime Cement yagejeje sima yayo ku isoko ry’u Rwanda
Uru ruganda rufite intego yo guhaza u Rwanda sima no gusagurira amahanga
Uruganda rufite ubushobozi bwo gukora toni 600 000 za sima ku mwaka, rukoresha abakozi babigize umwuga barenga 100
Hari imashini zabugenewe zifashishwa mu gufunga isima mu mifuka yabugenewe
Amakoro ari mu bikoresho byifashishwa mu gukora sima
Umuyobozi Mukuru wa Prime Cement Ltd, Rolf Anttila, avuga ko intego ya mbere bafite muri uru ruganda ari ukuzamura ingano ya Sima ikorerwa mu Rwanda

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .