Rwanda Polytechnic yananiwe gusobanura amasoko yatanze aruta ingengo y’imari, bimwe biba ’kwiyeranja’

Yanditswe na Rabbi Malo Umucunguzi
Kuya 15 Nzeri 2020 saa 08:04
Yasuwe :
0 0

Ishuri Rikuru ry’u Rwanda ry’Imyuga n’Ubumenyingiro (Rwanda Polytechnic, RP) ryagowe no gusobanura uburyo ryatanze amasoko yarutaga ingengo y’imari ryari rifite, abadepite barishinja kurenga ku itegeko rigena ingengo y’imari no kudakurikiza amategeko agenga imitangire y’amasoko ya leta.

Kuri uyu wa Mbere nibwo abayobozi bakuru ba RP bitabye Komisiyo y’Inteko Ishinga amategeko – Umutwe w’abadepite - Ishinzwe gukurikirana imikoreshereze y’imari n’umutungo by’igihugu, PAC, ngo babazwe ku makosa yagaragaye muri Raporo y’Umugenzuzi Mukuru w’Imari ya Leta, y’umwaka wa 2018/2019.

Iyo raporo igaragaza ko hari aho RP yatanze amasoko ane kuri miliyoni 801.3 Frw kandi yari ifite ingengo y’imari ya miliyoni 347 Frw, bivuze ko harenzeho miliyoni 454.3 Frw, bihwanye na 131%.

Muri ayo masoko harimo iry’ibikoresho byagombaga kwifashishwa mu bumenyi ngiro ryari rifite ingengo y’imari ya miliyoni 224 Frw, ryakoreshejwe kuri miliyoni zirenga 590 Frw, bivuze ko igiciro cyarenzeho miliyoni 370 Frw, bingana n’izamuka rirenga 165%.

Abadepite bagaragaje ko hakeneye gusobanurwa impamvu ikigo gishobora gutanga isoko ku mafaranga arenga ingengo y’imari yateganyijwe, n’aho amafaranga yishyuwe yaturutse. Ikindi kibazo cyagaragaye ni amasoko 45 yatanzwe hatabanje inyigo y’isoko (market survey), afite agaciro ka miliyari 1.5 Frw.

Umuyobozi wa RP, Dr James Gashumba, yabanje kuvuga ko iki ari ikigo kimaze imyaka ibiri gusa gitangiye, ku buryo kitaragira ingufu nyinshi. Yahise aha umwanya Umuyobozi wungirije Ushinzwe Imari n’Ubutegetsi, Dr Alex Ruberwa, ngo abe ari we ubisobanura kimwe ku kindi.

Agitangira na we ati “Ikibazo kigaragaza ko twari dufite ingengo y’imari ya 347 Frw tugakoresha miliyoni 800 Frw arenga, icyo kibazo mugenzi wanjye ushinzwe imari n’ubutegetsi (DAF) araza kukivugaho...”

Byatumye Perezida wa PAC, Depite Muhakwa Valens atangira kubaza ati “ibibazo ko mubihererekanya birasubizwa na nde?”

Umuyobozi w’Ishami ry’Ubutegetsi n’Imari, Nsabimana Diogene, yavuze ko amasoko batanze yari afite amafaranga menshi bagereranyije n’ingengo y’imari, ku buryo amafaranga y’inyongera bayasabye mu ngengo y’imari ivuguruye.

Ati “Natwe twarabibonaga, ariko bitewe n’uko turi ikigo cy’ishuri, hari ibyo twabonaga tutagomba kureka gukora, turateganya dushyiraho amafaranga [arenga ahari], ariko duteganya ko tuzayabona mu ivugururwa ry’ingengo y’imari kugira ngo tuzabashe kwishyura iryo soko tuzaba twaratanze.”

Depite Muhakwa yavuze ko atumva imiterere y’iryo genamigambi. Dr Ruberwa yemeye ko habaye ikibazo mu iteganyabikorwa, avuga ko ubuyobozi bwari bukiri bushya, ingingo atemeranyije n’abadepite.

Ni ingingo itanyuze uwari uhagarariye Ibiro by’Umugenzuzi Mukuru w’Imari ya Leta, wavuze ko bitemewe gutanga isoko wizeye ko amafaranga azaboneka mu ngengo y’imari ivuguruye, ahubwo bigomba gukorwa yarabonetse.

Nyamara ngo si byo byakozwe na RP kuko mu masoko ane yarengeje ngengo y’imari, atatu yatanzwe mbere y’ivugururwa ry’ingengo y’imari, uretse rimwe gusa.

Uwari uhagarariye Minisiteri y’ubutabera yahise abaza uburyo hatanzwe amasoko kandi nta mafaranga ahari, niba nta kibazo cyabayeho mu kwishyura bigashora leta mu manza, ari nabyo bikunze gutuma icibwa amafaranga menshi.

Dr Ruberwa yavuze ko amasoko yarangiye neza, kuko bakoraga ivugururwa ry’ingengo y’imari bateganya kwishyura.

Yakomeje ati “Kuba twarakoresheje ingengo y’imari irenze iyo tateguye, turemera ko atari byo, icyo ni intege nke rwose.”

Depite Jeanne d’Arc Uwimanimpaye yavuze ko bibabaje kuba ikigo gitanga amasoko mu mafaranga kitarabona, kandi ingengo ari itegeko ritorwa n’Inteko Ishinga amategeko.

Ati “Wavuga ute ukuntu ushobora gukora igenamigambi, ukarenza amafaranga ushobora gutanga? Icya mbere bafite icyaha cyo kwica itegeko rigena ingengo y’imari, bakajya gukora ibintu badafitiye amafaranga.”

Depite Muhakwa yakomeje ati “Turakomeza ariko iki ntabwo tukinyuzweho rwose, mukomeze mushake ibisobanuro rwose kandi wenda n’izindi nzego zizadufasha kubikurikirana.”

Gutanga isoko nta nyigo zakozwe

Dr Ruberwa yakomereje ku masoko 45 yatanzwe hadakozwe inyigo y’isoko (market survey), afite agaciro karenga miliyari 1.5 Frw. Ati “Ni imikorere mibi twemera ariko ubu twarabikosoye.”

Depite Muhakwa yavuze ko kwemera gukosora ari kimwe, ariko bakeneye kumenya niba hari ingaruka byagize ku babigizemo uruhare.

Dr Ruberwa yavuze ko iki kigo cyashyizweho n’itegeko mu 2017 ariko gihabwa abayobozi muri Werurwe 2018, kandi icyo gihe ngo ingengo y’imari yari yaramaze gutorwa. Ubwo icyo kigo cyakoraga ihererekanyabubasha na WDA, ingengo y’imari nini niho yari yaremerejwe, kandi hari ibindi byari bikeneye gukorwa.

Ati “Ni amakosa yakozwe ariko mu nyungu zo kugira ngo atagira akazi kahatakarira.”

Depite Bakundufite Christine yabajije niba bishatse kuvuga ko aba bayobozi bakoze ibyo bagombaga gukora.

Dr Ruberwa ati “Nk’uko nababwiye, nta nubwo icyo gihe nari nakahageze muri Rwanda Polytechnic, ariko iyo nganira na bagenzi banjye batubwira ko kubera cya gihe gito bari bafite, ari uko bakoze mu kwiyaranja, ni uko byagenze.”

Imvugo kwiyaranja yahise izamura impaka mu badepite bavuze ko icyo kintu kitabaho mu mutungo wa leta, iyo mvugo yemera kuyisubirana anayisabura imbabazi.

Umuyobozi ushinzwe amasoko muri RP yahawe umwanya, asa n’uvuguruza umuyobozi we, avuga ko ya nyigo yakozwe, ahubwo icyo batabashije kugaragariza abagenzuzi b’imari ya leta ni “amadosiye y’ibyo bintu, ariko mu by’ukuri inyigo y’isoko yarakozwe”.

Ni ibintu Depite Muhakwa yavuze ko bitangiye kwivanga kuko abayobozi mu kigo kimwe bavuguruzanya, hibazwa igisubizo kiri bwemerwe.

Dr Ruberwa yahise avuga ko iyo nyigo itakozwe, kuko iyo iba yarabaye haba hari n’inyandiko ibigaragaza, ati “ibyo ntabwo ari byo.”

Byatumye abadepite bagize PAC bibaza niba aba bayobozi bariteguye kubazwa na PAC kuri iyi raporo, bahagarika ikoranabuhanga ry’amashusho babanza kungurana ibitekerezo hagati yabo, bibaza niba abayobozi ba RP bahagarikwa mu kiganiro bakazongera kwitaba undi munsi biteguye, ariko hanzurwa ko bakomeza.

Umwe mu badepite yabajije abayobozi ba RP impamvu basinye kuri raporo y’umugenzuzi w’imari ya leta, kandi ahagenewe uko ubuyobozi bw’ikigo bwayibonye havugwamo ko inyigo y’isoko yakozwe ariko raporo idahari.

Umudepite ati “Iyi raporo yasinywe na nde? Si mwebwe?”

Dr Ruberwa ati “Raporo ni iyacu, n’ikirimo cyose turacyemera, ni yo mpamvu...”

Visi Perezida wa PAC, Depite Mukarugwiza Annonciata, yunze ati ati “Ni ukuvuga ko wasinye ibintu byanditse nabi rero?”

Dr Ruberwa ati “ndabyemera rwose.”

Umuyobozi wa RP, Dr Gashumba, yijeje PAC ko bagiye kongera imbaraga mu kunoza imikorere, niba ari abakozi bakeneye guhugurwa bikorwe, cyangwa niba ari n’ibihano nabyo bifatwe.

Ati “Ntabwo dushaka kugira ibyo duhakana cyangwa tutumva, intege nke twatangiranye turagenda twiyubaka, no muri Minisiteri barabizi hagenda haba amavugurura, kandi ndashaka kubizeza no kureba ngo abagenzuzi bazaze, bave hano banezerewe kubera ko inama batugiriye twazumvise kandi twazishyize mu bikorwa. Nzabikurikirana ndabibijeje.”

Umuyobozi Mukuru muri Minisiteri y’Uburezi, Dr Rose Baguma, yijeje ko bazatanga umusanzu amakosa yabaye agakosorwa.

PAC yahataga ibibazo abayobozi ba RP mu ikoranabuhanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .