Rwanda Day: Abanyarwanda basobanuriwe byihariye uko babyaza umusaruro amahirwe y’ishoramari mu gihugu cyabo

Yanditswe na Evariste Nsengimana
Kuya 5 Ukwakira 2019 saa 05:58
Yasuwe :
0 0

Ibigo 16 bikorera ishoramari mu Rwanda byegereye Abanyarwanda n’inshuti zabo bitabiriye Rwanda Day, mu Mujyi wa Bonn mu Budage, bibasobanurira byihariye uburyo bagira uruhare mu guteza imbere ubukungu bw’igihugu cyababyaye nabo bikabateza imbere.

Rwanda Day ni umunsi ngarukamwaka watangijwe mu 2010 uhuriza hamwe abanyarwanda baba mu mahanga, ababa mu Rwanda n’inshuti zabo baganira ku iterambere ry’igihugu n’ahazaza harwo.

Umwihariko w’iyi yabaye kuri uyu wa 5 Ukwakira, ni uko ibigo bigera kuri 16 bikorera ishoramari mu Rwanda, byafashe iya mbere bikajya kubasobanurira amahirwe y’ishoramari agaragara mu gihugu cyabo n’uko bagira uruhare mu iterambere ryacyo.

Iyi gahunda yiswe ’Career Corner’, igamije guhuza ibyo bigo n’Abanyarwanda baba mu mahanga bafite ubumenyi n’ubushobozi bikeneye kugira ngo bibahe akazi banagire uruhare mu iterambere. Yateguwe ku bufatanye n’ikigo cy’iterambere (RDB).

Mu bigo byitabiriye iyi gahunda harimo Banki ya Kigali, Cogebanque Rwanda, Uruganda rukora telefone rwa Maraphone, DND Developers Ltd, Century Real Estate zimenyerewe mu kubaka amacumbi, I&M Bank n’ibindi.

Umuyobozi ushinzwe Imenyekanishabikorwa muri Banki ya Kigali witabiriye icyo gikorwa, Nshuti Thierry, yabwiye IGIHE ko Career Corner igamije kuganiriza urubyiruko n’abandi bafite ubumenyi n’ubushobozi ibyiza bihari n’inzira banyuramo bagakorera igihugu cyabo.

Ati “Icyo turimo gukora hano, tuganira nabo, tukumva ibyo bize, tukababwira uburyo ubwo bumenyi bukenewe haba mu gihugu no muri Banki ya Kigali nkorera, tukababwira icyerekezo cyacu kugira ngo tubamare ubwoba tunabashishikarize kuzana ubumenyi bafite kugira ngo bishobore gufasha mu kuzamura igihugu cyacu.”

Nshuti yavuze ko hari abagaragaye bize ibijyanye n’ibyo Banki ya Kigali ikeneye mu cyerekezo ifite cyo kwimakaza ikoranabuhanga.

Ati “Twabonye abana b’abanyarwanda basobanukiwe kandi bafite ubushake bwo gukorera igihugu cyabo.”

Yavuze ko hari umwanya wahariwe gukorerwa imurikabikorwa ry’ibyo bigo bitandukanye aho bisobanura serivisi bitanga n’uburyo abanyarwanda babyifuza bakorana bakagira uruhare mu iterambere ry’igihugu cyabo.

Ati “Ntacyo tutavugaho, turimo kubwira abantu gushora imari yabo mu Rwanda, turabwira abanyarwanda bakora cyangwa bakorera mu bihugu by’amahanga ko u Rwanda rukeneye ko bizigama mu gihugu cyacu kugira ngo amafaranga bakorera n’igihe badahari abe afite icyo amariye igihugu.”

Yakomeje agira ati “Icyo twifuza ni uko umunyarwanda uri hanze atekereza ngo nakubaka gute ubukungu bw’igihugu cyanjye nkoranye na Banki ya Kigali.”

Umuyobozi ushinzwe Serivisi z’Ikoranabuhanga muri Cogebanque, Yvon Gilbert Nishimwe, yabwiye IGIHE ko serivisi bari kwibandaho ari iyitwa Cogebanque Mortgage, inguzanyo ifasha umukiliya wa banki kugura cyangwa kuvugurura inzu yo kubamo.

Ati “Tuyizaniye abanyarwanda baba i Burayi, twayigabanyijeho inyungu igera kuri 15% ku mwaka. Ariko kandi dufite na gahunda twashyiriyeho abanyarwanda baba mu mahanga aho bashobora kubona serivisi za banki zifashisha ikoranabuhana ku biciro byiza.”

Yavuze ko bafite ishami ryihariye rizajya rikurikirana abanyarwanda b’abakiliya bayo baba mu mahanga, bibafashe kubona inguzanyo baguramo inzu mu Rwanda zikababyarira inyungu.

Banki Nkuru y’igihugu (BNR) itangaza ko hagati ya 2000-2005, Abanyarwanda bohereje mu gihugu miliyoni $3.6-8.6 mu gihe mu 2006-2010 yavuye kuri miliyoni $25 agera kuri miliyoni $98.2. Iyi mibare yiyongereyeho 158% aho mu 2018, u Rwanda rwakiriye miliyoni $253 avuye hanze.

Rwanda Day iri kubera mu Budage yitezweho gushimangira iri terambere binyuze mu mahirwe y’ishoramari ari mu Rwanda n’izindi gahunda zo kwihutisha icyerekezo cyarwo azamurikirwamo.

Umuyobozi ushinzwe Imenyekanishabikorwa muri Banki ya Kigali, Nshuti Thierry, witabiriye icyo gikorwa yasobanuye serivisi iyi banki yageneye Abanyarwanda
Ibigo bitandukanye byaturutse mu Rwanda byamuritse ibyo bikora imbere y'abitabiriye Rwanda Day
Abiganjemo urubyiruko basobanuriwe amahirwe bashobora kubona mu gihugu
Abanyarwanda basobanuriwe byihariye uko babyaza umusaruro amahirwe y’ishoramari mu gihugu cyababyaye

Amafoto: Philbert Girinema na Karirima A. Ngarambe - Bonn; Rwanda Gov

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .