00:00:00 IGIHE NETWORK KN KINYARWANDA EN ENGLISH FR FRANCAIS

Rutsiro: Bakeneye miliyoni 32 Frw ngo abaturage bose babe bafite ubwisungane mu kwivuza

Yanditswe na Nsanzimana Erneste
Kuya 17 January 2022 saa 08:57
Yasuwe :

Mu Karere ka Rutsiro habarurwa abaturage barenga ibihumbi 50 batarishyura ubwisungane mu kwivuza, barimo abarenga ibihumbi 10 ubu badashobora kwivuza kuko batanze umusanzu w’igice.

Umwaka w’ubwisungane mu kwivuza utangirana n’ukwezi kwa Nyakanga ukarangira muri Kamena. Mu rwego rwo korohereza abaturage, leta yashyizeho ko umuryango wishyuye 75% by’umusanzu wa mituweli usabwa uba wemerewe kwivuza kugera tariki 31 Ukuboza.

Mu Karere ka Rutsiro habarurwa abaturage 19.693 bishyuye 75% by’uwo musanzu bivuze ko aba ubu batemerewe kuwivurizaho keretse babanje gutanga 25% abura.

Ubuyobozi bw’aka karere busaba abaturage barebwa n’iki kibazo gushaka umusanzu usigaye bakawishyura kuko mu gihe batabikora uwo batanze wapfa ubusa.

Imibare itangwa n’ubuyobozi bw’aka karere igaragaza ko hakenewe miliyoni 32 kugira ngo abagatuye bose uko ari ibihumbi 324 babe bafite ubwisungane mu kwivuza.

Umuyobozi w’Akarere ka Rutsiro, Murekatete Triphose yabwiye IGIHE ko umubare munini w’abatarishyura ari abatishoboye.

Ati "Abafatanyabikorwa turabasaba ko nk’uko dusanzwe dufatanya mu bindi bikorwa byose biteza imbere abaturage bacu, bagira uruhare kugira ngo abaturage babashe kubona ubwisungane mu kwivuza cyane cyane ko umubare munini w’abo dusigaranye batarayishyura ari abadafite ubushobozi".

Kugeza ubu Akarere ka Rutsiro kari ku mwanya wa 25 mu gutanga ubwisungane mu kwivuza kuko abamaze kubutanga ari 81%.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .