Rutsiro: Abakozi bane b’Akarere bafunzwe bazira kubakisha nabi ishuri ku buryo byasabye ko risenywa

Yanditswe na Mukwaya Olivier
Kuya 22 Ukwakira 2020 saa 03:10
Yasuwe :
0 0

Abakozi bane b’Akarere ka Rutsiro bari mu maboko y’inzego z’ubutabera bakurikiranweho gukoresha nabi umutungo ufitiye rubanda akamaro, ubwo bubakaga Ishuri ribanza rya Kinunu.

Hagaragaye amakosa y’imyubakire nko gukoresha isima nkeya n’umucanga mwinshi, ku buryo byageze aho ubuyobozi butegeka ko ayo mashuri ashyirwa hasi, akubakwa bundi bishya.

Abafunzwe barimo Hakizimana Fulgence ushinzwe inyubako z’amashuri mu Karere, Majyambere Jonas ushinzwe uburezi mu murenge wa Boneza na Mbabare Jean Paul ushinzwe kubaka Ishuri ribanza rya Kinunu.

Bafunzwe nyuma y’uruzinduko Umunyamabanga uhoraho muri Minisiteri y’uburezi, Mulindwa Samuel, aherekejwe n’Umugaba Mukuru w’Inkeragutabara, Gen Fred Ibingira, bahagiriye, basanga hakoreshejwe sima nke n’umucanga mwinshi, hamwe n’andi makosa menshi y’imyubakire.

Nyuma yo gusura aka Karere, abayobozi bemeje ko aya mashuri asenywa akongera kubakwa bushya.

Umuvugizi w’umusigire w’Urwego rw’Ubugenzacyaha, RIB, Dr. Murangira B. Thierry, yemeje aya makuru, avuga ko bakurikiranweho gukoresha nabi umutungo wa leta ubwo bubakaga ishuri ribanza rya Kinunu.

Ati “Bafashwe tariki 16, bakurikiranweho icyaha cyo gukoresha nabi umutungu ufitiye rubanda akamaro ubwo bubakaga ishuri ribanza rya Kinunu riherereye mu Murenge wa Boneza akarere ka Rutsiro, ejo nibwo dosiye zabo twazishyikirije Ubushinjacyaha.”

Yakomeje asaba Abanyarwanda gucunga neza umutungo wa leta, kuko RIB itazihanganira umuntu wese uzanyereza umutungo wa Rubanda.

Gukoresha nabi umutungo ufitiye rubanda akamaro bihanishwa igifungo kirenze imyaka itanu ariko kitarenze imyaka irindwi, n’ihazabu y’amafaranga y’u Rwanda atari munsi ya 3 000 000 Frw ariko atarenze 5 000 000 Frw.

Ibiro by'Akarere ka Rutsiro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .