Rutsiro: Abakozi 10 bakomeje gufungwa, bane bazaburana bari hanze

Yanditswe na Mukwaya Olivier
Kuya 31 Kanama 2020 saa 11:00
Yasuwe :
0 0

Urukiko rw’ibanze rwa Gihango rwategetse ko abakozi 10 b’Akarere ka Rutsiro bakurikiranyweho gukoresha nabi umutungo wa Leta bafungwa iminsi 30 y’agateganyo mu gihe bane bazaburana bari hanze.

Abazakomeza kuburana bafunzwe ni abakozi bane bakorera ku karere barimo Umuyobozi ushinzwe Imiyoborere n’Umutungo mu Karere ka Rutsiro, Basabose Alexis; Umuyobozi ushinzwe iyubakwa ry’Imihanda, Kamana Jean Marie na Munyamahoro Cyato Justin usanzwe ari Umucungamari w’akarere.

Mu banyamabanga nshingwabikorwa b’imirenge bazakomeza kuburana bafunzwe barimo uwa Murunda , Nyabirasi, Mushubati na Kivumu.

Mu bazakomeza gufungwa harimo abashinzwe ubutaka mu mirenge ya Nyabirasi, Mukura na Kivumu.

Mu bazaburana bari hanze harimo abashinzwe ubutaka mu mirenge ya Ruhango Sekamana Théophile n’uwa Murunda, Murari Richard.

Mu banyamabanga nshingwabikorwa b’imirenge, abazaburana bari hanze ni Umunyamabanga Nshingwabikorwa w’Umurenge wa Gihango, Rutayisire Deogratias na Ikizihiza Alida, uyobora Umurenge wa Rusebeya

Mu byumweru bibiri bishize nibwo Urwego rw’Igihugu rw’Ubugenzacyaha, RIB, rwataye muri yombi abakozi 14 muri nyuma yo kubakekaho kunyereza umutungo wa Leta.

Aba bayobozi bakaba bari banahagaritswe by’agateganyo n’ubuyobozi bw’akarere mu gihe cy’amezi atandatu kubera iperereza bakorwagaho ryo kunyereza umutungo wa Leta mu mishinga ijyanye no gukora imihanda y’imigenderano muri gahunda ya VUP.

Bivugwa ko mu bikorwa byagombaga gukorerwa abaturage hari ibikoresho birimo amabuye n’imicanga byagombaga kubaka ibiraro bito ku mihanda y’imigenderano bitahageze kandi byarishyuwe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .