Rusizi: Umwarimu ukekwaho gukubita umunyeshuri akamuvuna ukuboko yatawe muri yombi

Yanditswe na Ferdinand Maniraguha
Kuya 18 Nzeri 2019 saa 01:56
Yasuwe :
0 0

Urwego rw’Igihugu rushinzwe Ubugenzacyaha (RIB) rwatangaje ko rwataye muri yombi umwarimu wo kuri GS Murira mu karere ka Rusizi, ukekwaho gukubita umunyeshuri yigisha akamuvuna ukuboko.

Mu mezi ane ashize nibwo umunyeshuri witwa Kwizera Patrick wo mu murenge wa Muganza mu Karere ka Rusizi, ngo yakubiswe na Misago Jean Baptiste wamwigishaga mu mwaka wa mbere w’amashuri yisumbuye kuri GS Murira.

Uyu mwana aherutse gutangariza TV1 ko yakubiswe umukoropesho azira gutsindwa umwitozo mwarimu w’ubugenge (Physique) yari yabahaye we na bagenzi be, akaza kuvunika ukuboko kugeza ubwo ajyanywe kwa muganga.

Ababyeyi b’umwana bavuga ko kwa muganga basanze igufwa ryaravunitse, biba ngombwa ko bamuha inyunganirangingo izwi nka ‘tige’ ifasha igufwa gusubirana.

Kuri uyu wa Gatatu, RIB ibicishije kuri Twitter yatangaje ko umwarimu ukekwa yafashwe n’inzego bireba.

Bagize bati “Turabasaba kugabanya ibihuha kuko tukimara kumenya amakuru ukekwa yarafashwe ariho arakurikiranwa.”

Umuyobozi wa GS Murira, Mujawayesu Zenie yatangarije IGIHE ko umunyeshuri ari koroherwa ndetse ngo batangiye kumuganiriza we n’ababyeyi be babahumuriza.

Yagize ati “Ikigaragara ni uko umwana yenda koroherwa kubera ko ntakiri ku bitaro, baramupfuka akagenda asubirayo, n’ubu uyu munsi twari kumwe na we mbaza umubyeyi uburyo uburwayi bwe bumeze.”

Mujawayesu avuga ko nta myitwarire mibi bari bazi kuri mwarimu Misago, ngo birashoboka cyane ko ari impanuka yagize.

Ati “N’umubyeyi ubwe atanga ubuhamya n’abandi banyeshuri barabutanga. Ntabwo ari ibyari bimenyerewe. Twahumurije abanyeshuri tubereka ko iyo ikibazo cyavutse inzego zigikurikirana. Twabakanguriye kwiga no kwitabira ishuri cyane ko nabo babonye ko ari nk’impanuka yagwiririye uwo mwarimu kuko ntabwo wari usanzwe ari umuco we.”

Icyakora, uyu muyobozi yasabye abarimu kujya bitonda mu gihe bahana abana, bakirinda kubaha ibihano bibabaza umubiri.

Ingingo ya 121 mu gitabo cy’amategeko ahana ibyaha mu Rwanda, ivuga ko umuntu wese, abishaka, ukomeretsa undi, umukubita cyangwa umusagarira ku buryo bwa kiboko bubabaje aba akoze icyaha.

Iyo abihamijwe n’urukiko, ahanishwa igifungo kitari munsi y’imyaka itatu ariko kitarenze imyaka itanu n’ihazabu y’amafaranga y’u Rwanda atari munsi y’ibihumbi magana atanu ariko atarenze miliyoni imwe.

Iyo icyaha cyakorewe umwana, umubyeyi, uwo bashyingiranywe cyangwa umuntu udashoboye kwitabara kubera imiterere ye ku mubiri cyangwa mu bwenge, ahanishwa igifungo kirenze imyaka itanu ariko kitarenze imyaka umunani n’ihazabu y’amafaranga y’u Rwanda atari munsi ya miliyoni imwe ariko atarenga miliyoni ebyiri.

Iyo gukubita cyangwa gukomeretsa byateye indwara cyangwa kudashobora kugira icyo umuntu yikorera ku buryo budahoraho, igihano kiba igifungo kitari munsi y’imyaka icumi ariko kitarenze imyaka cumi n’itanu n’ihazabu y’amafaranga y’u Rwanda atari munsi ya miliyoni eshatu ariko atarenze miliyoni eshanu.

Uyu mwana aherutse gutangariza TV1 ko yakubiswe umukoropesho azira gutsindwa umwitozo mwarimu w’ubugenge (Physique) yari yabahaye we na bagenzi be, akaza kuvunika ukuboko kugeza ubwo ajyanywe kwa muganga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza