Rusizi: Sena igiye gukorera ubuvugizi ibitaro biberewemo umwenda wa miliyoni 315Frw

Yanditswe na Akayezu Jean de Dieu
Kuya 13 Werurwe 2019 saa 09:06
Yasuwe :
0 0

Itsinda rya Komisiyo y’Imibereho y’abaturage n’imibereho myiza y’abaturage n’uburenganzira bwa muntu mu Nteko Ishinga Amategeko, Umutwe wa Sena, rigiye gukora ubuvugizi ku bibazo birimo imyenda y’asaga miliyoni 315Frw, ibitaro n’ibigo nderabuzima byo mu karere ka Rusizi biberewemo yiganjemo aya mituweli.

Ni mu igenzura iri tsinda ry’abasenateri riri gukora hirya no hino hagamijwe kumenya neza ibibazo biri mu bitaro n’ibigo nderabuzima, aho muri Rusizi basanze hari ibibazo birimo imyenda na serivisi mbi.

Visi Perezida w’iyi Komisiyo, Margaret Nyagahura, yavuze ko n’ubwo usanga ibibazo byose biba bisa ariko muri Rusizi ho hari umwihariko w’umwenda munini ibitaro biberewemo ari nabyo bazakorera ubuvugizi ku nzego zibishinzwe.

Yagize ati “Ibibazo byose ubona bisa, iby’umubare udahagije w’abaforomo, ibibazo by’umwenda. Sena rero n’ubundi turi abajyanama tuzakora ubuvugizi ndetse dutanga n’ingamba y’ibyo tubona byakorwa.”

Imyenda myinshi ibitaro biberewemo birimo amafaranga ya mituweri batahawe ubwo izi serivisi zari zitaregurirwa RSSB, amafaranga ya serivisi zihabwa abaje kwivuza bakabura ayo kwishyura bagasigaramo amadeni.

Ibitaro bya Gihundwe biberewemo umwenda wa miliyoni 77Frw za mbere y’uko mituweli yegurirwa RSSB, hakaba na miliyoni 41Frw z’amadeni y’abaturage baza kwivuza badafite ubwishingizi bakabura ubwishyu.

Umuyobozi w’ibitaro bya Gihundwe, Dr Nshizirungu Placide, yabwiye Radio Rwanda ko amadeni abadindiza mu iterambere kandi bigatuma n’abakozi badahembwa bityo bikagira ingaruka zikomeye mu mitangire ya serivisi.

Yagize ati “Hari imiti iba yatanzwe kuri abo barwayi bigatuma natwe uko kutatwishyura hari icyo bidindiza ari muri serivisi, ari imiti tugomba kugura, [….], ntabwo aba ari imiti gusa tuba tugomba guhemba abakozi, kuvugurura inyubako no kongera abakozi.”

Ubuyobozi bw’Akarere ka Rusizi butangaza ko hagiye gukorwa igenzurwa ry’imyenda igaragaza ibyangombwa bisabwa ngo yishyurwe no gufata ingamba zihariye mu kurwanya abaza kwivuza bakambura ibitaro hatirengagijwe abatishoboye.

Ibitaro bya Gihundwe muri Rusizi biri mu biberewemo umwenda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza