00:00:00 IGIHE NETWORK KN KINYARWANDA EN ENGLISH FR FRANCAIS

Rusizi: Imiryango 70 y’abarokotse Jenoside imaze gutuzwa mu midugudu y’icyitegererezo

Yanditswe na Akimana Erneste
Kuya 19 June 2022 saa 05:14
Yasuwe :

Kuva umwaka w’imihigo wa 2021-2022 watangira, imiryango 70 y’abarokotse Jenoside yakorewe Abatutsi mu 1994 imaze gutuzwa mu midugudu y’icyitegererezo mu Karere ka Rusizi.

Muri iyi miryango, igera ku 10 yashyikirijwe inzu yubakiwe mu Murenge wa Mururu, ku wa 18 Kamena 2022. Ni umuhango witabiriwe n’ubuyobozi bw’inzego zitandukanye zirimo iza Leta n’iz’abikorera.

Abatujwe muri iyi midugudu bavuze ko bari mu nzu zishaje zenda kubagwaho, bamwe bacumbika mu baturanyi, ubu bakaba bishimira ko ubuzima bwabo bwahindutse.

Nyirantijimana Francine yagize ati “Ndi umubyeyi w’abana bane, nari mbayeho nabi ku buryo nabonaga ntaho najya. Iyo imvura yagwaga najyaga mu ruganiriro, inzu yaje gusenyuka iragwa ntangira kujya mu baturanyi. Iyo naburaga amafaranga yo kwishyura baransohoraga nkabura aho mba ngasembera.’’

Yashimye Leta y’u Rwanda yamuhaye aho kuba ndetse ngo agiye kuryama agasinzira.

Nyirabizimana Séraphine yavuze ko yahoraga yigunze kuko imvura iyo yagwaga yasohoraga ibintu byose agahita ajya gucumbika mu baturanyi.

Yashimye ubuyobozi bwamutekerejeho bugatuma na we abona aho gukinga umusaya.

Umuyobozi w’Akarere ka Rusizi, Dr Kibiriga Anicet, yavuze ko bashyize imbaraga muri gahunda yo kubakira abatishoboye kuko hakiri umubare munini.

Yagize ati “Kubakira abatishoboye ni urugendo. Muri uyu mwaka tumaze kubaka inzu zirenga 70 zose twazihaye abaturage. Abaturage baracyari benshi batari bubakirwa icyakora na bo tubafite muri gahunda ku buryo twizera ko bose bazubakirwa.’’

Muri rusange hamaze kubakwa inzu zisaga 500. Mu Karere ka Rusizi habarurwa nibura abantu barenga 2000 bafite inzu zimeze nabi ku buryo hatagizwe igikorwa ngo zubakwe zishobora kubagwira.

Imiryango 10 y'abarokotse Jenoside yakorewe Abatutsi yashyikirijwe inzu yubakiwe mu Mudugudu w'Icyitegererezo uherereye mu Murenge wa Mururu mu Karere ka Rusizi
Abayobozi barimo Meya w'Akarere ka Rusizi, Dr Kibiriga Anicet, aherekejwe n'ab'ingabo na Polisi basuye umwe mu miryango watujwe neza
Inzu bubakiwe zigezweho ndetse zirimo ibyangombwa by'ibanze umuntu akenera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .