Rusizi: Abaturiye amashyuza bifuza ko hashyirwa hoteli

Yanditswe na Sitio Ndoli
Kuya 29 Ukuboza 2019 saa 08:53
Yasuwe :
0 0

Iyo ugeze ku mashyuza mu murenge wa Gitambi mu karere ka Rusizi usanga abantu benshi baje kwivurisha aya mazi ahora abira, abandi bahasohokeye kubera ukuntu ari ahantu nyaburanga, nyamara ntiwahabona aho uwagira icyo ashaka kugura yakibona.

Bamwe mu bahaturiye bavuga ko aha hantu hakwiriye kubakwa hoteli kugira ngo abahasura babone icyo bahifuza haba ibiribwa cyangwa se aho baruhukira, hakiyongeraho ndetse ko hakurura ba mukerarugendo bigafasha abahaturiye.

Nikobatuye Octave yagize ati “Maze imyaka 60 ku isi, imyinshi nayimaze hano ku mashyuza mfasha abantu kubavura amavunane nkoresheje ano mazi ariko usanga abatugana bizanira impamba yabo, hakenewe kubakwa hoteli rwose, ubuyobozi bubyumve.”

Minani Japheth yunzemo ati “ni njye warohoye abantu benshi muri aya mazi, haza abanyamahanga barimo Abarundi, Abakongomani n’abandi benshi kuburyo aha hantu hashowe imari rwose byafasha abahaturiye ndetse n’aya mazi akabungwabungwa, byazamura ubukerarugendo bwacu.”

Bamwe mubo twahasanze bahatembereye bavuga ko babona koko hakwiriye igikorwa remezo cyafasha abahagana kubona ibyo bacyeneye kandi ko byafasha no kwinjiriza ubukerarugendo bw’u Rwanda amadevise.

Ndungutse Jean Pierre umwe muri bo yagize ati “Rwose hadufasha hashyizwe hoteli kuko haragendwa njyewe si ubwa mbere mpaje rwose ariko usanga abantu bizanira ibintu bari burye kuburyo bibagora cyane ariko hari ababikora byakwinjiriza imisoro igihugu ndetse n’abanyamahanga bahagana bakazana amadevize.”

Kayumba Euphrem, Umuyobozi w’Akarere ka Rusizi avuga ko aha hantu ari umutungo bwite w’uruganda rukora sima CIMERWA ariko ngo ikigo cy’igihugu gishinzwe iterambere RDB ngo kiri gushaka umushoramari ushobora kuhubaka.

Ati “Amashyuza ari mu butaka bwa CIMERWA, icyo RDB iri gukora iri gushaka umushoramari wakwemera kuhubaka ibikorwa bijyanye n’ubukerarugendo. Uwo mushoramari namara kubonoka azaza bakamuhuza na CIMERWA noneho agafata ubwo butaka akabubyaza umusaruro.”

Abaturage bavuga ko iyi hoteli iramutse yubatswe bahabona akazi ndetse byateza imbere aka gace batuyemo.

Abahagana bizanira amafunguro ndetse n'ibindi bakenera bakifuza ko hakubakwa hoteli ibafasha kubibona hafi
Ku Mashyuza abantu benshi baza kuhivuza amavunane bakoresheje aya mazi ashyushye kandi ahora abira
Abaturiye Amashyuza basanga ari ahantu nyaburanga hakwinjiriza igihugu amadevize nabo bakahabona akazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .