Rusizi: Abacyekwaho gukora magendu n’abashoferi bambuka umupaka bagiye gushyirwa mu kato

Yanditswe na Sitio Ndoli
Kuya 1 Kamena 2020 saa 04:23
Yasuwe :
0 0

Ubuyobozi bw’akarere ka Rusizi bwafashe ingamba zo gufata abacyekwaho gucuruza magendu bagahurizwa hamwe ndetse n’abashoferi batwara amakamyo yambuka umupaka, mu rwego rwo kwirinda ikwirakwira rya coronavirus.

Bibaye nyuma y’aho muri ako karere habonetse abarwayi batanu ba coronavirus barimo abacuruzi, umumotari n’abandi.

Bamwe mu batuye aka karere bavuze ko bafite impungenge z’uko iki cyorezo cyakomeza kwiyongera mu gihe hari abantu bagikora ubucuruzi butemewe, ibi ngo babishingira ku kuba hari bimwe mu bicuruzwa birimo na caguwa byo muri RDC biri kugaragara ku masoko ya Rusizi.

Umwe yagize ati “Haracyagaragara Salsa yo muri Congo, n’imyenda ndetse n’inkweto bya caguwa. Hano ku muhanda ndetse no mu isoko, urumva ko biteye impungenge nibafate abakora forode, ubundi indwara irashira.”

Umuyobozi w’akarere ka Rusizi Kayumba Euphrem yavuze ko batangiye gufata abacyekwaho gukora magendu kugira ngo bapimwe kuko bashobora kuba bakwandura iyi ndwara.

Yagize ati “Abantu bacuruza ibyo bicuruzwa uvuze haruguru (forode) twatangiye no kubafata kuko bari mu bacyekwaho kuba bateza ibyago byo kwandura. Twatangiye kubafata kugira ngo bapimwe, tumenye ubuzima bwabo uko buhagaze.”

“ Ikindi gikomeye ni ugukumira, twafashe ingamba nk’ubuyobozi bw’inzego z’ibanze ndetse n’inzego dufatanya z’umutekano kuburyo izo nzira zitemewe kuburyo nta muntu wongera kuhanyura kandi turatekereza ko biraza kugenda neza.”

Akomeza agira ati “Ariko tukaba dusaba abaturage ko tugumya gufatanya cyane cyane baduha amakuru ku baba bakomeje ibyo bikorwa bibi bigaragara ko byateza abantu ibyago.”

Mu yindi myanzuro yafashwe harimo ko abatwara imodoka zijyana ibicuruzwa muri Congo barashyirwa mu kato.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .