Ikigo cy’u Rwanda Gishinzwe Imirimo Imwe n’Imwe Ifitiye Igihugu Akamaro(RURA) kiratangaza ko cyashyizeho itsinda rigamije kwiga uburyo ibiciro by’ingendo mu modoka byagabanuka kubera bikajyana n’igiciro cy’ibikomoka kuri peteroli byamanutse.

Mu gihe kiri mu nsi y’amezi 10, igiciro cy’ibikomoka kuri petetoli cyavuye ku mafaranga y’u Rwanda 1030 kigera kuri 895 kuri litiro.

Mu kiganiro umuyobozi wa RURA, Patrick Nyirishema yagiranye The Newtimes yayitangarije ko hashyizweho itsinda riziga ku bijyanye n’igabanuka amafaranga y’ingendo zo mu modoka akajyana n’ibyo biciro bishya.

Umugenzi uteze bisi mu mujyi wa Kigali/ ifoto: The New Times

Ibi biciro byatangiye kugabanuka muri Werurwe bikomeza kugabanuka mu mezi yakurikiyeho kugeza muri uku kuboza 2014.

Nyirishema yasobanuye ko ibiciro by’ubwikorezi bidahita bigabanuka kubera ko ibiciro by’ibikomoka kuri peteroli bigabanutse, akaba ari yo mpamvu RURA ikirimo kureba icyakorwa, biciye muri iri tsinda ryashyizweho.

Yagize ati “Turumva ko igabanuka ry’amafaranga y’u Rwanda 135 kuri litiro, ryumvikana, twashyizeho itsinda ryiga kuri iki kibazo, Abanyarwanda bamenye ko mu gihe iryo tsida rizaba ryamaze gusuzuma iki kibazo rizagena ibyakorwa ku bijyanye n’ibiciro.”

Abayobozi ba sosiyete zitwara abagenzi bavuga ko igabanuka ry’ibiciro atari ikibazo mu gihe cyose rizajyana n’imanuka ry’igiciro cy’ibikomoka kuri Peteroli.

Mu masaha y'umugoroba abagenzi bo mu mujyi wa Kigali batonda umurongo bategereje Bus/ ifoto : The New Times

Col. Ludovic Twahirwa (Dodo) umuyobozi wa sosiyete itwara abagenzi RFTC yatangaje ko biteguye kubahiriza ibiciro bishya RURA izagena.

Umugenzuzi muri sosiyete Kigali Bus Service, Nshimyumukiza Alto, nawe yavuze ko biteguye gukurikiza biciro bishya byashyirwaho na RURA ariko ayisaba kugira icyo ikora mu gihe igiciro cy’ibikomoka kuri peteroli cyakongera kuzamuka.

Samson Rukundo, utwara imodoka mu muhanda Kigali-Gicumbi yifuza ko ibiciro bitahinduka kugira ngo bibafashe kuziba icyuho cy’igihombo baba baragize mu gihe igiciro cy’ibikomoka kuri Peteroli cyazamutse.

Ati “ Turifuza ko RURA yareka ibiciro bigakomeza kuba uko byari bimeze, dukorera mu gihombo. Igabanuka ry’igiciro cy’ibikomoka kuri Peteroli ni impano yacu muri iki gihe cy’iminsi mikuru.”

Yakomeje avuga ko ibiciro by’aho baparika imodoka n’ibyo kuzikanika biri hejuru, bikabarushya kubyishyura mu gihe abagenzi ari bake mu muhanda.

Minisiteri y’Ubucuruzi n’inganda yatangaje ko ibi biciro bishobora kugabanuka mu mpera za Mutarama 2015.

[email protected]