00:00:00 IGIHE NETWORK KN KINYARWANDA EN ENGLISH FR FRANCAIS

Rulindo: Batatu bafashwe batekeye kanyanga mu rugo rw’umuturage

Yanditswe na Claude Bazatsinda
Kuya 19 June 2022 saa 09:38
Yasuwe :

Polisi y’Igihugu ikorera mu Karere ka Rulindo ifatanyije n’izindi nzego ahagana saa Tanu z’ijoro ryo kuwa Gatandatu tariki 18 Kamena rishyira kuri iki Cyumweru, yataye muri yombi abantu batatu nyuma yo gufatwa batekeye kanyanga mu rugo rw’umuturage.

Abo bantu bafatiwe mu Murenge wa Murambi, Akagari ka Gatwa mu Mudugudu wa Gisiza.

Uretse abo bafashwe, Polisi kandi yahafatiye litiro 10 za kanyanga bari bamaze guteka n’icupa rya Red Warage, amajerekani arindwi ya merase yifashishwa mu gukora kanyanga, ingunguru ya litiro 350 y’umusemburo wifashishwa mu gukora kanyanga, ikidomoro cya litiro 180 gitazemo kanyanga, ingunguru batekeyemo kanyanga n’uruseke ruyungurura kanyanga.

Umuhuzabikorwa w’ibikorwa bya Polisi n’abaturage mu Ntara y’Amajyaruguru, SP, Alex Ndayisenga, yashimye imikoranire ya Polisi n’abaturage batanga amakuru ahakekwa ibyaha, asaba abantu kwirinda ibyaha kuko bibakururira ibihano biremereye.

Yagize ati “Tuributsa abaturage kwirinda kwishora mu byaha byo gucuruza no gukoresha ibiyobyabwenge kuko bibakururira ibihano biremereye byo mu rwego rw’amategeko, uretse kandi n’ibihano ibiyobyabwenge bigira ingaruka ku buzima bw’ababinyoye, ntabwo rero Polisi izigera iha agahenge abo bose babigiramo uruhare. Turabagira inama yo gushakira imibereho mu bindi kuko iyo mu byaha ntiramba kandi turashimira abaturage bakomeza kuduha amakuru.”

Abafashwe bose n’ibyafashwe bahise bajya gucumbikirwa kuri Sitasiyo ya Polisi ya Murambi kugira ngo bashyikirizwe Ubugenzacyaha, RIB, bakorerwe dosiye ku byaha bakurikiranyweho bishobora guhanishwa igifungo cya burundu mu gihe baba babihamijwe n’urukiko.

Amajerekani yuzuyemo merase yifashishwaga mu gukora kanyanga
Bimwe mu bikoresho byifashishwaga mu gukora kanyanga
Iyi kanyanga inzego z'umutekano zasanzwe itetswe, abari bayitetse batabwa muri yombi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .