00:00:00 IGIHE NETWORK KN KINYARWANDA EN ENGLISH FR FRANCAIS

Ruhango: Nyuma y’uruzinduko rwa Perezida Kagame hatangijwe gahunda yihariye yo gukemura ibibazo by’abaturage

Yanditswe na Prudence Kwizera
Kuya 6 September 2022 saa 10:00
Yasuwe :

Mu Karere ka Ruhango hashyizweho gahunda yihariye yo kwegera abaturage no kubakemurira ibibazo kugira ngo ibibabangamiye mu iterambere n’imibereho myiza bikurwe mu nzira.

Ni gahunda iri kuba muri uku kwezi kwa Nzeri gusanzwe ari ukw’imiyoborerere. Iyi gahunda yo kwegera abaturage ishyizweho nyuma yaho Perezida wa Repubulika Kagame Paul agiriye uruzinduko mu Ntara y’Amajyepfo n’iy’Urengerazuba aho yahereye mu Karere ka Ruhango asaba abayobozi kurushaho kwegera abaturage no kubakemurira ibibazo.

Ubwo Umukuru w’Igihugu yakiraga ibibazo by’abaturage bagiye bamugezaho iby’akarengane n’ibindi bigaragara ko abayobozi ku nzego z’ibanze bakwiye kuba barabikemuye.

Yasabye abayobozi guhaguruka bakegera abaturage bakabakemurira ibibazo kuko ari cyo bashinzwe.

Abayobozi mu Karere ka Ruhango bose bari kugendera hamwe mu modoka nini (bus) bari kumwe n’abayobozi b’imirenge bose; abayobozi b’amashami bose ku karere; abayobozi ba Maji; abanyamategeko b’akarere; abayobozi ba REG na Wasac kuko hakunze kugaragaramo ibibazo by’ingurane z’ahanyujijwe imiyoboro; abayobozi ba RIB n’aba Polisi ndetse n’Ingabo z’Igihugu.

Bamwe mu baturage bo mu mirenge aho iyi gahunda yatangiriye mu murenge wa Ruhango, bavuga ko bayishimiye bitewe n’uko ibibazo bafite byatangiye gukemurwa ako kanya badasiragiye nk’uko mbere byagendaga kuri bamwe.

Nikuze Donata wo mu Kagari ka Mbuye, Umurenge wa Mbuye ufite ikibazo cyo kurangirizwa urubanza, ashima ko mu gukemura ibibazo hafatwa umwanya uhagije wo gutega amatwi buri wese ufite ikibazo no gutanga inama aho bikenewe.

Ati “Ikibazo cyanjye cyatinze kurangira kuko hari impapuro nari narabuze barazinyibye ariko bampaye inzira yo kugira ngo ikibazo cyanjye kirangizwe, kandi mfite icyizere ko bizarangira neza”.

Niyibizi Asie ati “Ibi bintu abayobozi bari kudukorera ni byiza cyane kuko bari kutwegera bagakemura ibibazo byacu kandi twizeye ko bizakomeza.”

Mukamana Hélène we yavuze ko yari afite ikibazo amaranye imyaka ibiri cy’urubanza rw’isambu rutarangizwa none abayobozi bamufashije kugiha umurongo.

Ati “Ikibazo baragikemuye kuko babwiye umuhesha w’inkiko wo mu Kagari kacu ka Buhoro ko ahita ampesha ibyanjye natsindiye mu rukiko. Ubu ntahanye ibyishimo.”

Umuyobozi w’Akarere ka Ruhango, Habarurema Valens, yavuze ko bashyizeho gahunda yo guhura n’abaturage bafite ibibazo kugira ngo bikemurwe badategereje ko bo ubwabo bajya kwishakira abayobozi.

Hashyizweho ahantu hane ho kwakirira ibyo bibazo ariho mu Murenge wa Ruhango, uwa Kinazi, Byimana n’uwa Kabagari.

Ati “Aho ngaho hose abaturage twabamenyesheje amasaha tubamenyesha amatariki kandi tugasaba ngo ntibibe inteko z’abaturage zisanzwe ahubwo bibe umunsi wo guhura n’umuntu wese waba afite ikibazo, cyaba igikomeye cyaba icyoroheje turashaka ko rwose tubikemura bigashirayo kandi buri kibazo kikabona igisubizo cya nyuma atari ukuvuga ngo tuguhaye undi munsi cyangwa tukohereje ku wundi muntu.”

Ati “Ku buryo buri wese atanga umusanzu ikibazo cy’umuturage kikabonerwa igisubizo.”

Ikibazo bari gusanga kirenze urwego rw’akarere, umuyobozi w’akarere ari guhita ahamagara urwo rwego rukamufasha kugikemura kugira ngo kive mu nzira.

Asobanura ko buri kibazo cyakiriwe kigakemurwa gikorerwa raporo ya nyuma (Closing Report) igaragaza imiterere yacyo n’uko cyakemuwe.

Yavuze ko ari n’umwanya wo kwigisha abaturage kubaha amategeko no kwereka abayobozi uburyo bwo gukemura ibibazo.

Ati “Turanigishirizamo abaturage kubaha amategeko, icyo amategeko yagennye. Ni n’umwanya wo kugira ngo abayobozi bigiremo. Tuzabigishirizamo gukemura ikibazo cy’umuturage mu buryo bworoshye kurenza uko tukijyana mu nzego zo hejuru”.

Muri uku kwezi bazita no ku bindi bikorwa biteza imbere abaturage bikazamura n’imibereho yabo birimo ubuhinzi, ubworozi, ubwisungane mu kwivuza, EjoHeza, isuku n’ibindi.

Ukwezi kw’Imiyoborere myiza mu Karere ka Ruhango gufite insanyamatsiko igira iti “Dutange Serivisi nziza, dukemura ibibazo by’abaturage ku gihe”.

Ufite ikibazo wese ari kukigeza ku itsinda ry'abayobozi rigafatanya kugikemura
Ni umwanya wahariwe kwakira ibibazo by'abaturage no kubikemura
Inzego zitandukanye ziri gufatanya gukemura ibibazo by'abaturage
Ni gahunda iri kubera mu mirenge itandukanye y'akarere ka Ruhango
Buri wese ufite ikibazo ari gutegwa amatwi
Abaturage bagiye bashyirwa mu matsinda bitewe n'ibibazo bafite
Abayobozi bari kugendera hamwe bagasanga abaturage kugira ngo bakire ibibazo byabo
Bishimiye gahunda ubuyobozi bwabashyiriyeho yo kubegera no kubakemurira ibibazo
Abaturage bafite ibibazo bose basabwe kubijyana kugira ngo bikemuke
Ufite ikibazo arahabwa umwanya akakibaza agahabwa igisubizo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .