Ruhango: Mu myaka itatu abana bagwingiye bagabanutseho hafi 12%

Yanditswe na Prudence Kwizera
Kuya 10 Nyakanga 2020 saa 09:07
Yasuwe :
0 0

Ubuyobozi bw’Akarere ka Ruhango buvuga ko bwishimira ko umubare w’abana bahuye n’ikibazo cy’imirire mibi bakagwingira ugenda ugabanuka uko umwaka uhise undi ugataha bitewe n’ingamba zagiye zifatirwa icyo kibazo.

Mu 2015 imibare yerekanaga ko mu Karere ka Ruhango hari umubare munini w’abana bagwingiye bituma ubuyobozi ku bufatanye n’abafatanyabikorwa ndetse n’abaturage bafatanya gushaka igisubizo.

Umuyobozi wungirije ushinzwe Imibereho Myiza y’Abaturage mu Karere ka Ruhango, Mukangenzi Alphonsine, yabirutseho kuri uyu wa Gatanu ubwo hasozwaga ibikorwa by’umushinga witwa ‘Gikuriro’ ufasha ako karere mu bikorwa byo kurwanya imirire mibi no kwimakaza isuku n’isukura.

Yagize ati “Uyu mushinga wa Gikuriro waje mu mwaka wa 2016, hari hamaze kugaragara mu 2015 ko Akarere ka Ruhango gafite indwara zituruka ku mirire mibi ku rwego rukabije; (…) ku igwingira ku bana batoya twari turi kuri 41%. Mu by’ukuri baraje turafatanya turwanya izo ndwara z’imirire mibi, hari ubushakashatsi bwakozwe mu 2018 bwerekana ko tugeze kuri 29.5% ku igwingira.”

Mukangenzi yashimiye abaturage n’abafatanyabikorwa bose babigizemo uruhare, abasaba kubikomeza kandi abizeza ko ubuyobozi buzafatanya nabo.

Bamwe mu baturage bo mu Karere ka Ruhango baganiriye na IGIHE bavuze ko batakigira abana bari mu mirire mibi cyangwa abagwingiye kuko bamaze gusobanukirwa kubitaho no kubategurira indyo yuzuye.

Nyirajyambere Prisca wo mu Murenge wa Ruhango yagize ati “Batwigishije guteka indyo yuzuye irimo ibitera imbaraga, ibirinda indwara n’ibyubaka umubiri ku buryo abana bacu tubitaho kandi tukagira isuku muri byose. Nta mirire mibi ikigaragara mu rugo iwanjye cyangwa mu mudugudu ntuyemo.”

Matabaro David wo mu Murenge wa Ruhango we yavuze ko yigishijwe uburyo bwo gusya imboga no kuziteguramo ifunguro rinoze kuko asanzwe ari umuhinzi wazo.

Ati “Mbere nahingaga imboga zo kugurisha gusa ariko ubu namaze kumenya gukora ifu y’imboga za dodo nkurikije inozamirire ku buryo nta mwana wanjye ushobora kugira ikibazo cy’imirire mibi.”

Abaturage bo mu Karere ka Ruhango bavuga ko bigishijwe gutekera indyo yuzuye mu gikoni cy’umudugudu bakagaburira abana babo babahurije hamwe kugira ngo buri wese ahakure isomo. Ikindi bakora ni ukorora inka n’inkoko kugira ngo abana babo bajye banywa amata barye n’amagi.

Umuyobozi wungirije w’Umushinga wa Gikuriro ku rwego rw’Igihugu, Murungi Yvonne, yavuze ko bari bafite intego yo kwita ku mirire y’abagore batwite n’abana bari munsi y’imyaka itanu y’amavuko no kubatoza kugira isuku muri byose.

Ati “Icyo twitaho cyane ni ukubaka ubushobozi bw’abafatanyabikorwa n’inzego z’ubuyobozi n’abagenerwabikorwa kugira ngo babashe kwimakaza imirire myiza ndetse n’isuku n’isukura.”

Murungi yavuze ko mu Karere ka Ruhango bahashoye arenga miliyari 1 Frw mu gihe cy’imyaka ine (2016-2020) bagamije gukumira no kurwanya imirire mibi no kwimakaza isuku n’isukura.

Yavuze ko n’ubwo umushinga wabo ugeze ku musozo, abaturage bakwiye gukomeza gushyira mu bikorwa ibyo bigishijwe kuko ibikorwa remezo by’ibanze bazakenera babihawe, asaba ubuyobozi gukomeza kubaba hafi kugira ngo batazacika intege.

Ibikorwa byo kurwanya no gukumira imirire mibi mu Karere ka Ruhango byakozwe mu mushinga witwa ‘Gikuriro’ uterwa inkunga n’Umuryango Mpuzamahanga w’Abanyamerika, USAID, ugashyirwa mu bikorwa na Catholic Relief Services, CRS, ifatanyije na Netheland Development Organisation, SNV, ndetse na Caritas Rwanda.

Usibye guhinga kijyambere bigishijwe no gutegura neza indyo yuzuye hirindwa imirire mibi itera kugwingira
Abaturage batojwe korora inkoko kugira ngo bajye babona amagi yo kurya no guha abana babo
Bamwe mu baturage bo mu Karere ka Ruhango bavuga ko batakigira abana bari mu mirire mibi cyangwa abagwingiye kuko bamaze gusobanukirwa kubitaho no kubategurira indyo yuzuye
Guhinga kijyambere hagamijwe umusaruro mwiza ni kimwe mu bibafasha gukimira no kurwanya imirire mibi
Kugaburira abana amagi ni kimwe mu bibafasha gukumira ko bahura n'ikibazo cy'imirire mibi
Mu byo abaturage bo mu Karere ka Ruhango bigishijwe harimo n'ibikorwa by'ubukorikori bibinjiriza amafaranga
Umuyobozi wungirije ushinzwe Imibereho Myiza y’Abaturage mu Karere ka Ruhango, Mukangenzi Alphonsine, yavuze ko umushinga wa Gikuriro wabafashije gukumira no kurwanya igwingira ry'abana bato
Umuyobozi wungirije w’Umushinga wa Gikuriro ku rwego rw’Igihugu, Murungi Yvonne, yavuze ko bari bafite intego yo kwita ku mirire y’abagore batwite n’abana bari munsi y’imyaka itanu

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .