Ruhango: Mu myaka itanu ishize abafite amazi meza biyongereyeho 47%

Yanditswe na Prudence Kwizera
Kuya 19 Ukuboza 2020 saa 07:37
Yasuwe :
0 0

Ubuyobozi bw’Akarere ka Ruhango bwatangaje ko mu myaka itanu ishize hatewe intambwe nziza mu kwegereza abaturage amazi meza n’amashanyarazi hagamijwe guteza imbere imibereho yabo.

Imibare yerekana ko mu 2016 amazi meza yari ku kigero cya 18% kuri ubu ari kuri 65% naho amashanyarazi yari kuri 18% abayafite bageze kuri 45%.

Umuyobozi w’Akarere ka Ruhango, Habarurema Valens, yavuze ko byabasabye gukoresha imbaraga kugira ngo bazamure ibipimo.

Ati “Muri iyi manda y’imyaka itanu igiye gusoza y’abayobozi, kuri ibyo byombi ari amazi ari n’amashanyarazi twari tutararenga kuri 18%. Ubwo rero muri iyi myaka abantu bakomeje bakora, ku mashanyarazi tugeze kuri 45% naho amazi tugeze hejuru gato ya 65%. Ni ibikorwa byiza ariko turacyafite n’ibindi byo gukora.”

Akomeza avuga ko ku kijyanye n’imiyoboro y’amazi minini bamaze kuyubaka ku kigero cya 90% gusa ngo hari iy’ubutswe kera yashaje bashaka gusana.

Yavuze ko mbere y’uko uyu mwaka w’imihigo urangira bazaha amashanyarazi imiryango ibihumbi bine, urugo ku rundi hagamijwe kuzamura imibereho myiza y’abaturage.

Bamwe mu baturage bamaze kugezwaho amazi meza n’amashanyarazi babwiye IGIHE ko imibereho yabo yahindutse kuko basigaye bagira isuku kandi batakirwara indwara zikomoka ku mwanda.

Mukantwari Marie Rose wo mu Murenge wa Kabagari mu Kagari ka Munanira yemeza ko bari babangamiwe no kujya kuvoma amazi mabi mu bishanga.

Ati “Twavomaga mu bishanga amazi mabi akadutera inzoka n’imiswi, ariko ubu twabonye amazi meza ntabwo tukirwara kuko arimo umuti kandi turayateka. Twagiraga umwanda nyine ugasanga umuntu afite ibikoresho bitogeje, atoga atanamesa imyenda kuko kuvoma mu kabande byaratuvunaga.”

Nirere Béathe wo mu Mudugudu wa Kagitare mu Kagari ka Munanira mu Murenge wa Kabagari avuga ko amashanyarazi bahawe muri santere ya Munanira yatumye hatera imbere.

Ati “Umuriro twari tuwukeneye cyane kuko twabaga mu kizima, gucaginga telefone byasabaga kujya ahitwa i Karambi umuntu akagenda nk’amasaha atatu ajya gushakayo umuriro.”

Muri santere ya Munanira hasigaye hakorerwa ibikorwa by’iterambere birimo kogosha, serivise za Irembo, gufotoza impapuro n’ibindi bakesha kubona umuriro w’amashanyarazi.

Umuyobozi w’Akarere ka Ruhango, Habarurema Valens, avuga ko mu myaka itarenze ibiri n’igice abaturage bose bazaba baramaze kugezwaho amazi meza n’amashanyarazi ku kigero cya 100%.

Ati “Nka Kabagari amashanyarazi n’amazi mwahasanze ahenshi nta mwaka urashira bihageze. Ni icyizere ko mu gihe gito gisigaye n’aho bitaragera bizahagera, ku buryo mu myaka ibiri n’igice iri imbere bitarenze 2024 ibi bibazo byombi bizaba byakemutse ku kigero cya 100%.”

Yasabye abaturage kujya bafata neza ibikorwa remezo bahabwa kugira ngo bibagirire akamaro kandi bizarambe.

Abaturage bo mu Murenge wa Kabagari bishimira amazi meza begerejwe
Imiyoboro y'amazi ikomeje kubakwa hirya no hino mu Karere ka Ruhango
Amashanyarazi mu cyaro yatumye serivise zisigaye zihuta
Umuyoboro mugari w'amazi watashywe umwaka ushize mu Karere ka Ruhango watumye umubare w'abaturage bagerwaho n'amazi meza wiyongera

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .