00:00:00 IGIHE NETWORK KN KINYARWANDA EN ENGLISH FR FRANCAIS

Ruhango: Abana babiri bigaga mu ishuri ry’incuke basanzwe mu mugezi bapfuye

Yanditswe na Prudence Kwizera
Kuya 25 Ugushyingo 2022 saa 02:56
Yasuwe :

Abana babiri bo mu Murenge wa Mbuye mu Karere ka Ruhango basanzwe mu mugezi bapfuye, bikekwa ko batwawe n’umuvu w’amazi.

Abo bana bombi ni abakobwa barimo Nezerwa Tabita Furaha w’imyaka ine na Nambazimana Josiane w’imyaka itatu, bo mu Kagari ka Mwendo mu Murenge wa Mbuye.

Bombi bafitanye isano kuko ba nyina bavukana, bakaba babaga kwa nyirakuru wabohereje kwiga mu irerero, aho babanza kwambuka igishanga cya Rwicanyoni kugira ngo bagereyo.

Amakuru avuga ko ubwo imvura yajyaga kugwa ahagana saa tanu kuri uyu wa Kane, mwalimu yabarekuye ngo batahe, nyuma baza kugaragara mu mugezi w’Ururumanza bapfuye.

Umwe mu babyeyi b’abo bana witwa Jean Damasecene Akumunezera, yavuze ko babonye abana badatashye, bajya kubashaka maze babasanga mu mugezi bapfuye.

Ati "Tumaze kubona ko ntabaje, mabukwe afata umwanzuro wo kujya gushaka mu gishanga aho banyura. Umurambo umwe twawubonye hano hepfo undi tuwusanga nko mu kilometero kimwe."

Umuyobozi w’Akarere ka Ruhango, Habarurema Valens, yabwiye IGIHE ko basanze abo bana batwawe n’amazi y’imvura, yabaye menshi akarenga inzira y’abanyamaguru.

Ati "Turihanganisha imiryango yagize ibyago. Turasaba abaturage muri rusange kwitwararika mu gihe imvura yaguye ari nyinshi, kuko imigezi n’imivu y’imvura bijya byuzura, amazi akaba menshi bitunguranye agatera impanuka nk’izi."

Yasabye kandi abantu bakuru kwita ku bana cyane cyane mu bihe by’imvura nyinshi.

Urwego rw’Igihugu rw’Ubugenzacyaha, RIB, rwatangiye iperereza kugira ngo hamenyekane mu by’ukuri niba nta kindi cyihishe inyuma y’uru rupfu.

Uyu mugezi ni wo wapfiriyemo aba bana
Abaturage bakomeje kwibaza icyaba cyishe abo bana

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .