Ruhango: Abakozi batatu barimo ab’umurenge bakurikiranyweho kunyereza amasuka akoreshwa muri VUP

Yanditswe na Prudence Kwizera
Kuya 17 Gicurasi 2020 saa 04:46
Yasuwe :
0 0

Abakozi batatu barimo babiri b’Umurenge wa Ruhango mu Karere ka Ruhango n’undi ucunga umutekano mu ishuri riri hafi yaho batawe muri yombi n’Urwego rw’Igihugu rw’Ubugenzacyaha, RIB, bakurikiranyweho icyaha cyo kunyereza amasuka akoreshwa muri VUP.

Aba bakozi uko ari batatu bakekwaho kunyereza amasuka 100 akoreshwa mu bikorwa bya VUP mu Murenge wa Ruhango. Icyo cyaha cyakozwe mu ntangiriro z’iki cyumweru nk’uko ubuyobozi bw’inzego z’ibanze zibitangaza.

Abamaze gufatwa bakekwaho kwiba ayo masuka ni Umukozi w’Umurenge wa Ruhango ushinzwe kwakira abawugana (Customer Care); ushinzwe kubika Ibikoresho (Planton) n’ushinzwe Umutekano ku ishuri ryegeranye n’uwo murenge ryitwa AVSI.

Umunyamabanga Nshingwabikorwa w’Umurenge wa Ruhango, Nemeyimana Jean Bosco, yabwiye IGIHE ko ayo makuru ari impamo ndetse abo bakozi bafashwe ngo bakorweho iperereza.

Ati “Bakurikiranyweho kunyereza ibikoresho by’umurenge, ni amasuka akoreshwa iyo dukora imihanda muri VUP; ni amasuka 100 yari akiri mashya.”

Bose uko ari batatu bafungiye kuri Sitasiyo ya RIB ya Ruhango mu gihe iperereza ku byaha bakekwaho bikomeje.

Muri iyi minsi hari kugaragara bamwe mu bakozi bakurikiranyweho kurigisa ibikoresho bitandukanye birimo ibigenewe abaturage n’ibya Leta.

Uheruka kuvugwa ni Umunyamabanga Nshingwabikorwa w’Akagari ka Gakoni mu Murenge wa Muganza muri Rusizi, watawe muri yombi akekwaho kunyereza amabati yagenewe abatishoboye.

Undi uheruka kumvikana ni Agronome w’Umurenge wa Ruheru mu Karere ka Nyaruguru wafashwe n’inzego z’umutekano, akurikiranyweho kunyereza ifumbire n’ishwagara n’imbuto y’ibirayi byari bigenewe abaturage.

Abakozi batatu barimo ab’Umurenge wa Ruhango mu Karere ka Ruhango bakurikiranyweho kunyereza amasuka akoreshwa muri VUP

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .