00:00:00 IGIHE NETWORK KN KINYARWANDA EN ENGLISH FR FRANCAIS

Ruhango: Abagizi ba nabi batemye abaturage babiri

Yanditswe na Prudence Kwizera
Kuya 3 Ugushyingo 2022 saa 06:48
Yasuwe :

Abagizi ba nabi bitwaje imihoro bateze abaturage babiri mu Murenge wa Ruhango mu Karere ka Ruhango barabatema bagamije kubambura ibyo bari bafite.

Byabaye ku mugoroba wo kuri uyu wa Gatatu tariki ya 2 Ugushyingo 2022 mu Mujyi wa Ruhango.

Mu bo batemye harimo utanga serivise z’itumanaho na Mobile Money ndetse n’undi muturage.

Ibi bibaye nyuma y’uko muri Kanama 2022 abagizi ba nabi bategeye mu nzira Umupolisi witwa Mukeshimana Claudine mu Murenge wa Byimana mu Karere ka Ruhango baramutema arakomereka cyane, banamwambura ibyo yari afite.

Icyo gihe umugabo bari kumwe we bamuhiritse munsi y’umukingo.

Umuyobozi w’Akarere ka Ruhango, Habarurema Valens, yabwiye IGIHE ko abaturage batemwe ari babiri ariko inzego z’umutekano zahise zitabara bajyanwa kwa muganga.

Yakomeje avuga ko hari abakekwa bafashwe hakaba hagikorwa iperereza.

Ati “Uwakomeretse ni umugabo uri kwa muganga ubu. Inzego z’umutekano zahise zifata abantu batatu bakekwa, barimo kubazwa.”

Yahumurije abaturage ababizeza ko inzego z’umutekano ziri maso.

Ati “ Abaturage nibahumure ntibakangwa n’umuntu umwe cyangwa babiri biba, kandi barafatwa bagakosorwa kuko inzego z’umutekano ziba ziri maso.”

Mu Karere ka Ruhango hamaze igihe humvikana abagizi ba nabi bitwaza imihoro bagategera mu nzira abaturage bakabambura ibyo bafite, ugerageje kwihagararaho bakamutema.

Biri mu bituma bacuruzi basigaye bafunga kare batinya kunyura mu nzira nimugoroba.

Ubuyobozi bukunze kuvuga ko ababikora ari abajura baba bagamije kwiba bityo abaturage badakwiye guhangayika ngo bakuke imitima ariko ku rundi ruhande iyo usesenguye usanga hari igikwiye gukorwa kuko bimaze gukabya.

Umwe mu bamotari mu Mujyi wa Ruhango yabwiye IGIHE ko ubugizi bwa nabi bukabije kuko na we bigeze kumutangira.

Ati “Nanjye bigeze kuntangira bankomeretsa mu kiganza ndabacika. Ubuyobozi n’inzego z’umutekano bakwiye kudukiza aba bagizi ba nabi kuko birakabije, nta cyumweru cyashira badahohoteye abantu.”

Bivugwa ko no mu cyumweru gishize ku wa Gatanu mu masaha y’umugoroba hari abagizi ba nabi batangiriye abakora akazi ko gutanga serivise z’itumanaho mu Mujyi wa Ruhango bakagenda babambura amafaranga, ugerageje kwihagararaho akagirirwa nabi.

Usibye imihoro batemesha abo bateze, ngo bakunze no kwitwaza ibimene by’amacupa n’imbugita

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .