00:00:00 IGIHE NETWORK KN KINYARWANDA EN ENGLISH FR FRANCAIS

Rucagu yibukije abakiri bato inshingano bafite ku bageze mu zabukuru

Yanditswe na Prudence Kwizera
Kuya 7 Ukwakira 2022 saa 01:40
Yasuwe :

Umwe mu bagize Urwego Ngishwanama rw’Inararibonye, Rucagu Boniface,yasabye abakiri bato kujya bita ku bageze mu zabukuru, asobanura ko iyo umuntu utakigira imbaraga asuzuguwe ashobora no kwiyahura.

Ni nyuma y’uko hirya no hino mu gihugu hagiye hagaragara abageze mu zabukuru batitabwaho bigatuma basaza nabi.

Umwe mu basaza bo mu Karere ka Huye aherutse kubwira IGIHE ko abayeho nabi mu bukene kandi afite abana bafite ubushobozi.

Yagize ati “Umuhungu wanjye yateye imbere ariko nta kintu amfasha kuko nyina yamubujije kugira ikintu na kimwe amfasha mu mibereho.”

Ubwo mu Karere ka Nyamagabe haberaga ibirori byo kwizihiza Umunsi Mpuzamahanga w’abageze mu zabukuru ku wa 4 Ukwakira 2022, Rugacu yagaragaje ko kutita ku bageze mu zabukuru bigira ingaruka mbi.

Agaruka ku ruhare rw’abageze mu zabukuru mu kubaka igihugu, Rucagu yavuze ko baba bageze mu gihe cyo kudasesagura ahubwo icyo bashoboye bagikora.

Yakanguriye abakiri bato guha agaciro abantu bakuze babaha agaciro no kububaha kuko iyo batitaweho bishobora kubaviramo kwiyahura.

Ati “Ndashima abaturage babana n’abageze mu zabukuru bakabaha agaciro, bakabubaha, burya umuntu utakigira imbaraga iyo agize ibyago bakamusuzugura ashobora no kujya kwiyahura.”

Uyu munsi wizihijwe ku nsanganyamatsiko igira iti “Abageze mu zabukuru, Isôoko tuvomaho”.

Umunyamabanga wa Leta muri Minisiteri y’Ubutegetsi bw’Igihugu Ushinzwe Imibereho Myiza, Ingabire Assoumpta, yagarutse ku itegeko ry’umuryango rivuga ko umubyeyi afite inshingano zo kwita ku bana ariko mu gihe nawe yananiwe amaze kuba mukuru, ba bana itegeko riteganya ko bafite inshingano zo kwita ku babyeyi babo.

Yagize ati “Impamvu bavuga ko umuntu ageze mu zabukuru ni uko hari intege nke aba amaze kugira kubera imbaraga zo gukora ziba zagabanutse, tukaba dusaba abakiri bato nk’urubyiruko bazirikane kwita ku miryango yabo ifite abageze mu zabukuru, turahari nka Leta kugira ngo tubifatanye ariko ni inshingano y’umwana kwita ku mubyeyi we.”

Muri icyo gikorwa hashimiwe abageze mu zabukuru bahize abandi muri gahunda zitandukanye harimo gusigasira umuco, kubahiriza gahunda za Leta, kurwanya no gukumira amakimbirane mu muryango n’ibindi.

Imiryango itandatu y’abageze mu zabukuru kandi borojwe inka muri gahunda ya Girinka.

Rucagu Boniface yasabye abakiri bato kujya bita ku bageze mu zabukuru
Imiryango y'abageze mu zabukuru yahawe ibikoresho byifashishwa mu bworozi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .