Rubavu:Umwarimu yakoze uburyo bwo kwigisha abanyeshuri binyuze mu mashusho

Yanditswe na Mukwaya Olivier
Kuya 13 Nzeri 2020 saa 05:00
Yasuwe :
0 0

Kuva icyorezo cya Covid-19 cyaza, cyahinduye imibereho y’abantu, mu rwego rwo kwirinda bimwe mu bikorwa birimo n’amashuri birahagarara, abanyeshuri bacikiriza amasomo abarimu baabura akazi. Mu rwego rwo kutagirwaho ingaruka zikomeye n’izi mpinduka zaje umuntu ataziteguye buri wese asabwa umusanzu we.

Nyuma yo kubona ingaruka iki cyorezo cyagize ku mashuri, Umwarimu mu ishuri ryisumbuye rya GS Rambo, ryo mu Murenge wa Nyamyumba mu Karere ka Rubavu,Uwayezu Obed yatangije umuyoboro ku rubuga rwa Youtube witwa “Elearning Obed” ufasha abanyeshuri gukomeza kwiga muri iki gihe amashuri yabo afunze kubera Covid-19.

Amasomo anyuzwa kuri “Elearning Obed” arimo ayagenewe abanyeshuri bo mu mashuri abanza n’ayagenewe abiga mu ayisumbuye. Uretse Youtube amasomo agera ku banyeshuri hifashishijwe abantu basanzwe bacuruza indirimbo na filimi bo hirya no hino muri aka karere ka Rubavu.

Uwayezu Obed avuga ko yahisemo gushinga uyu muyoboro, no kuzana ubu buryo bushya bwo kwigisha nyuma yo kubona ko abana bari mu rugo bashobora kurangara bakazasubira ku ishuri barasubiye inyuma.

Yagize ati “Mbere na mbere uru ni urubuga rwo gufasha abanyeshuri bari mu kiruhuko cyatewe na Coronavirus, uje gukemura ikibazo cy’abana birirwa mu rugo bareba za Filime badasubira mu masomo kubera ubunebwe bwo gufata ikayi kandi uzafasha abanyeshuri kudasubira inyuma mu masomo.”

Uyu mwarimu avuga ko mu masomo atanga yibanda ku banyeshuri bazakora ibizamini bya Leta yaba ibisoza amashuri abanza, n’ayisumbuye kandi bakayahabwa ku buntu.

Ati “Nibanda mu gufasha abana bitegura ibizamini bya Leta, kwiga aha n’ubuntu kandi buri munyarwanda agomba kwiga, ikindi aya mashusho ahari abarimu bemerewe kuyakoresha basobanurira abana kugira ngo barusheho gusobanukirwa isomo ntihazabeho icyuho kubera Coronavirus.”

Uwayezu usanzwe wigisha amasomo y’Imibare, ibinyabuzima n’ubutabire avuga ko yatangiye ari wenyine, ariko ubu ko yatangiye kuvugana n’abandi barimo bigisha andi masomo kugira ngo babe bakorera hamwe n’abanyeshuri babashe kubona amasomo atandukanye.

Ati “Natangiye ndi njyenyine ,ariko hari n’abandi bemeye ko dufatanya, kandi mbaziho ubushobozi kandi bamaze kubyemera. Twizeye ko hari itafari tuzashyira ku burezi bw’abana bacu.“

Akomeza avuga ko hari kurebwa uburyo hashyirwaho ingengabihe igaragaza uko amasomo azajya atambuka ndetse n’uburyo abakeneye amashusho ye ari kwigisha bayabona byoroshye.

Ati“Turifuza gushyiraho gahunda y’uko buri munsi hajya hatambuka isomo rijyanye na buri shuri, icyo dusaba ababyeyi n’ukujya baha umwanya abana bagakurikira amasomo kuri uyu muyoboro kugira ngo amasomo atazajya abacika, kandi n’abakeneye amashusho turimo gutegura uko bajya bazibona byoroshye.”

Iki gitekerezo Uwayezu agishyigikiwemo n’Umuyobozi w’ishuri yigishaho, Niyonsaba Martin uvuga ko bahisemo gushyigikira umwarimu wabo nyuma yo kubona ko ikoranabuhanga rifasha abana mu gutsinda.

Uwayezu avuga ko umubare w’abakurikirana aya masomo ye binyuze kuri Youtube umaze kugera kuri 620, mu gihe abasaga 100 bamaze kugura amashusho y’amasomo ye atabariyemo undi mubare w’abo atazi bayakura ku bantu basanzwe bacuruza amashusho y’indirimbo na filime.

Ubu buryo bushya bwo gutanga masomo byatumye uyu mwarimu aza mu bahatanira igihembo cy’umwarimu w’indashyikirwa mu rwego rw’akarere aho ageze mu cyiciro cya nyuma mu barimu bo mu karere ka Rubavu.

Uwayezu Obed atanga amasomo yifashishije Youtube
Avuga ko yagize iki gitekerezo nyuma yo kubona ko abanyeshuri bashobora gusubira inyuma kubera kumara igihe batiga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .