Rubavu: Umuturage yarashwe agerageza kwinjira mu Rwanda binyuranyije n’amategeko

Yanditswe na Mukwaya Olivier
Kuya 19 Ukwakira 2019 saa 05:47
Yasuwe :
0 0

Umuturage witwa Bizimungu Thomas yarasiwe mu Mudugudu wa Rutagara mu Kagari ka Rukoko mu Murenge wa Rubavu mu ijoro ryakeye ubwo yanyuraga mu nzira zitemewe zinjira mu gihugu, zikunze gukoreshwa n’abashaka guhungabanya umutekano.

Bizimungu w’imyaka 56 yari asanzwe akora akazi k’izamu mu ibagiro rya Rutagara.

Amakuru IGIHE ifite ni uko uwo muturage yarashwe mu masaha ya saa tanu zijoro arimo kugerageza kwinjira mu gihugu.

Ubuyobozi bwahise buremesha inama abaturage mu gitondo cyo kuri uyu wa Gatandatu, tariki ya 19 Ukwakira 2019.

Mu butumwa bw’ubuyobozi bw’Akarere ka Rubavu bwasabye abaturage kwirinda kunyura mu nzira zitemewe.

Umuyobozi wa Polisi mu Karere ka Rubavu, Superitendent Roger Muhodari, yasabye abaturage kwirinda kwinjiza ibiyobyabwenge kuko bishobora gushyira ubuzima bwabo mu kaga.

Yagize ati “Birababaje kuba tubuze umuntu. Kuki mushaka kujya kwinjiza urumogi? Mubimenye ko iyo bagufashe ibihano byakajijwe ni burundu cyangwa imyaka 20 iyo utagoranye, ariko iyo bakwikanzemo umwanzi barakurasa, mucike muri aya mayira.’’

Umuyobozi w’Akarere ka Rubavu wungirije ushinzwe Iterambere ry’Ubukungu, Nzabonimpa Deogratias, yasabye abaturage kwirinda guca ahatemewe kuko uhanyuze afatwa nk’umwanzi.

Yagize ati “Ndihanganisha umuryango wabuze uwabo mbasaba ko twagira intego yo kugira umuhigo wo kutongera guca mu nzira zibujijwe inzira tugomba kunyuramo duhahirana n’abaturanyi turazizi. Nijoro umuntu ushinzwe umutekano ari ku kazi ntashobora gutandukanya umwanzi n’umuturage. Mu ijoro ugaragaye wese mu nzira zitemewe biroroshye kumufata nk’umwanzi. Iyo hagize umuturage wacu uhaburira ubuzima ni we uba wizize.’’

Abaturage bo mu Karere ka Rubavu bamaze igihe barahawe amabwiriza y’imipaka y’ahakwiye kunyurwa irimo uwa Kabuhanga, Petite Barrière na Grande Barrière.

Tariki 6 werurwe 2019 nabwo Abanyarwanda batatu barashwe bageragezaga kwinjira mu gihugu bavuye muri Repubulika Iharanira Demokarasi ya Congo, banyuze ahatemewe n’amategeko. Aba bagabo bari batwaye imyenda ya caguwa ya magendu barasiwe mu Murenge wa Rubavu.

Abaturage bo mu Karere ka Rubavu basabwe kunyura mu nzira zemewe birinda ibyago bashobora kuhagirira
Umunyamabanga Nshingwabikorwa w'Umurenge wa Rubavu, Tuyisenge Annonciata, yasabye abaturage kugira umuhigo kudaca mu nzira zitemewe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza