00:00:00 IGIHE NETWORK KN KINYARWANDA EN ENGLISH FR FRANCAIS

Rubavu: Ubushabitsi n’ubuharike bwagaragajwe nk’umuzi w’igwingira ry’abana

Yanditswe na Claude Bazatsinda
Kuya 9 June 2024 saa 08:49
Yasuwe :

Ubuyobozi bw’Akarere ka Rubavu bwagaragaje ko kuba umubare munini w’abagore bakora ubucuruzi bwambukiranya imipaka hakaba n’abagabo bagiharika abagore babo ari imbogamizi ikomeye ku mikurire y’umwana.

Umujyi wa Rubavu uhana imbibi n’Umujyi wa Goma ku buryo kuhatandukanya ukoresheje amaso bitakorohera kubera ibikorwa by’ubucuruzi bwambukiranya umupaka bukorwa n’abantu benshi.

Witegereje neza ubona abenshi mu bambuka bakora ubucuruzi hagati ya Repubulika Iharanira Demokarasi ya Congo n’u Rwanda ari abagore kuko babaritwa hejuru ya 80% by’ababukora.

Umujyi wa Rubavu kandi ugaragaramo ikibazo cy’abagabo bakunze guta ingo zabo bakajya gushaka abandi bagore bataye abo bashakanye, na bo bafite abandi bana.

Mu bukangurambaga bwahariwe kwita ku buzima bw’umwana n’umubyeyi buri gukorwa na Minisiteri y’Ubuzima ibinyujije mu Kigo cyayo, RBC, Minisiteri y’Uburinganire n’Iterambere ry’Umuryango n’abafatanyabikorwa babo, Umuyobozi w’Akarere ka Rubavu wungirije ushinzwe imibereho myiza y’abaturage, Ishimwe Pacifique, yemeza ko iki kibazo gihari kandi ko gikoma mu nkokora imikurire y’abana.

Yagize ati "Iki kibazo cyo guhuza ubu bucuruzi no kwita ku buzima bw’abana kirahari ariko dukomeza gushyira imbaraga mu kwigisha ababyeyi no kubegereza amarerero kuko no ku mupaka rirahari ryabagenewe, tugafatanya n’abafatanyabikorwa muri gahunda nka Sugira muryango na turere abana zigamije kwigisha ababyeyi uburyo bwiza bwo kurera abana mu muryango utekanye bamurinda igwingira, twita cyane ku miryango y’amikoro make."

Yakomeje agira ati "Ikibazo cy’ubuharike nta wavuga ko kidahari, akenshi giterwa n’amakimbirane y’ibintu bitandukanye, aha twigisha abagabo uruhare bafite mu kubaka umuryango utekanye, ndetse abenshi batangiye kubyumva ko inshingano zo kwita ku mikurire y’abana zibareba nk’umuryango wose."

Hari na bamwe mu babyeyi n’abagore bagaragaza ko kuba bita ku buzima bwo mu ngo zabo bonyine no gushakisha icyo gukora ngo niteze imbere usanga bibananiye byose bikagira ingaruka ku bana babo bikbakururira igwingira.

Mukandayisenga Immaculé ni umwe muri bo, ufite abana bane yitaho wenyine ndetse bakaba bagaragagaza imirire mibi.

Yagize ati "Umugabo yarantaye ajya kwishakira undi, nzinduka njya hakurya muri Congo kubashakira imibereho, barya ibyarayemo bikonje na byo bidahagije, amikoro make mfite no kubahahira njyenyine bituma ubuzima bwabo butagenda neza."

Murorunkwere Judith we yagize ati "Abagore benshi b’inaha dutunzwe n’ubucuruzi bwambukiranya umupaka. Abana bacu tubagaburira dutashye ubundi tukirirwa iyo tukarya amandazi n’amazina tukaryama. Niho iri gwingira ruturuka."

Ubwo hatangizwaga icyumweru cyahariwe kwita ku mibereho buzima bw’umwana n’umubyeyi ku wa 3 Kanama 2024, Umukozi wa RBC ushinzwe Porogaramu z’Ubuzima bw’Umwana n’Umubyeyi mu mavuriro, Dr. Cyiza François Regis, yavuze ko icyumweru nk’iki kibafasha kumenya uko ubuzima bw’umwana n’umubyeyi buhagaze no kurushaho kubwitaho.

Yagize ati" Icyumweru cyahariwe ubuzima bw’umwana n’umubyeyi, kidufasha gukora ubukangurambaga kuri serivisi zabagenewe, harimo gukingira abana bato, kubapima ibiro n’ibindi bigaragaza uko umwana akura, ikindi bituma tugera ku bana bose aho 95% babona izo serivisi, abafite ikibazo bakitabwaho by’umwihariko."

Minisitiri w’Uburinganire n’Iterambere ry’Umuryango Dr. Uwamariya Valentine yasabye ababyeyi gufatanya kwita ku buzima bw’umwana aho kubiharira umubyeyi umwe.

Ati “Ikibazo cy’ubusinzi twagikomojeho, aho usanga ibyo bejeje babimarira ku isoko amafaranga avuyemo bakayamarira mu biyobyabwenge aho kuyakoresha bita ku bana, ariho usanga bagwingira, ababyeyi bakwiriye gufatanya mu nshingano, yaba kubarera kwita ku mirire yabo n’imikurire, aho kwishora mu biyobyabwenge n’amakimbirane."

Mu 2015 Akarere ka Rubavu kari gafite abana bafite imirire mibi bagera kuri 45,6% na ho mu 2020 baramanuka bagera kuri 40%.

Abana bahawe amata mu bukangurambaga bwo kurwanya imirire mibi
Ababyeyi bashishikarijwe gufatanya bakita ku buzima bw'umwana
Abana bagwingira my karere ka Rubavu ahanini bituruka ku babyeyi bahugira mu mirimo ntibite ku bana babo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .