Rubavu: RSSB yijeje ubufatanye mu kubakira imiryango itishoboye

Yanditswe na Mukwaya Olivier
Kuya 25 Mutarama 2020 saa 07:19
Yasuwe :
0 0

Ubuyobozi bw’Ikigo cy’ubwishingizi, RSSB, bwijeje ubufatanye abaturage b’Akarere ka Rubavu mu kubakira imiryango ikennye, magingo aya habarurwa izisaga 400.

Kuri uyu wa Gatandatu nibwo abakozi ba RSSB bifatanyije n’abatuye Akarere ka Rubavu mu muganda ngarukakwezi wabereye mu murenge wa Rugerero, aho batangije igikorwa cyo kubaka inzu eshatu zagenewe abatishoboye.

Mu biganiro n’abaturage nyuma y’Umuganda, Umuyobozi ushinzwe imicungire y’abakozi muri RSSB, Mugabo Emmanuel, yabwiye abaturage ko atari ubwa mbere bakoranye, abizeza ubufatanye mu kubakira imiryango ikennye isigaye.

Ati “Gahunda yacu ni uko umuturage agira ubuzima bwiza kubera mituweli nyuma y’ubuzima bwiza akiteganyiriza izabukuru muri Ejo Heza.”

“Murabizi neza ko ubufatanye bwacu n’akarere ka Rubavu si ubwa vuba, murabizi ko twagize uruhare mu kubakira imiryango 148 y’abarokotse Jenoside yakorewe abatutsi batujwe, ninayo mpamvu tugiye kwisakasaka kugirango tugire uruhare muri iki gikorwa cyo kubakira abatishoboye.”

Umuyobozi wungirije w’akarere ushinzwe imibereho myiza y’abaturage, Ishimwe Pacifique, yasabye abaturage kwitabira gutanga umusanzu w’ubwisungane mu kwivuza, anashimira ubufatanye bwa RSSB.

Ati “Murabizi ko igihe cyo gutanga mituweli cyegereje, nabasabaga gutangira kwitegura mwizigamira amafaranga kugirango igihe nikigera muzabashe guhita mwivuza.”

Ubuyobozi bw’Akarere ka Rubavu buvuga ko mu karere kose habarurwa ingo 415 zikeneye gutuzwa, hakaba harimo kubakwa inzu 210, izisigaye akaba arizo RSSB yabemereyeho ubufasha.

Abakozi ba RSSB batunda amabuye ku muganda
Abakozi ba RSSB bifatanyije n'abaturage mu kubakira abatishoboye
Umuyobozi wungirije w’Akarere ka Rubavu ushinzwe imibereho myiza y’abaturage, Ishimwe Pacifique, yashimye ubufatanye bamaze kugirana na RSSB
Ubuyobozi bw'Akarere bwafatanyije na RSSB gutangiza umushinga wo kubakira abatishoboye
Abayobozi batandukanye mu biganiro nyuma y'umuganda rusange
Mugabo Emmanuel ushinzwe imicungire y’abakozi muri RSSB, yabwiye abaturage ba Rubavu ko atari ubwa mbere bakoranye, abizeza ubufatanye mu kubakira imiryango ikennye
Ntigurirwa Déogratias ushinzwe Mituweli muri RSSB, yakanguriye abaturage kwitabira gutanga ubwisungane mu kwivuza
Abaturage bahuriye mu biganiro nyuma y'umuganda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza