00:00:00 IGIHE NETWORK KN KINYARWANDA EN ENGLISH FR FRANCAIS

Rubavu: Polisi yahagaritse abishyuzaga abamotari amafaranga atemewe

Yanditswe na Mukwaya Olivier
Kuya 23 July 2022 saa 01:42
Yasuwe :

Ubuyobozi bwa Polisi mu ntara y’uburengerazuba bwahagaritse ndetse bugiye gukurikirana abari barihaye inshingano zo kwishyuza abamotari amafaranga atagira aho yandikwa mu karere ka Rubavu.

Iki gikorwa cyari kinyuranyije n’amabwiriza y’Urwego Ngenzuramikorere (RURA) n’ay’Ikigo cy’igihugu gishinzwe amakoperative (RCA), yakuyeho Koperative z’abamotari.

Abamotari bavuga ko aya mafaranga batangiye kuyacibwa kuva ubwo koperative babarizwagamo zihagaritswe.

Aba bamotari bakunze kugaragaza ko babangamiwe n’amafaranga 100 bakwa kuri buri mugenzi bakuye ku mupaka wa Grande Barrière n’abantu bishyizeho kandi batagaragaza aho ayo mafaranga ajya kuko nta nyemezabwishyu.

Umwe muri aba bamotari ukorera ku mupaka munini avuga ko bari babangamiwe n’abantu bishyizeho nyuma y’uko koperative zivuyeho bakabaka amafaranga bigaragara ko bijyanira.

Ati “Mu karere turi abamotari bagera ku 2500, buri wese unyuze ku mupaka atwaye bamuca ijana barangiza bakayigabanira, ni ikibazo gikomeye kuko ku bwacu biraturambiye, ibi byatangiye nyuma y’aho RURA na RCA bihagarikiye amakoperative.”

Mugenzi we yungamo akavuga ko hari n’ubwo bakwa amafaranga menshi utabyubahiriza bagahamagara imodoka ya polisi igatwara moto ye agahomba amafaranga n’igihe.

Ati “Ririya tsinda ryatujujubije iyo udakorera kuri parikingi yabo bashobora kuguca amafaranga igihumbi, bibiri cyangwa bitanu kandi yose ntabwo agira aho yanditse nta nyemezabwishyu, tubifata nk’ubusambo noneho iyo utayatanze biragukomerana kuko moto yawe barayifunga bihaye inshingano tutazi uwazibahaye.”

Umuvugizi wa Polisi mu ntara y’Iburengerazuba SP Karekezi Twizere Bonavanture, avuga bahagaritse iri tsinda kandi ko bagiye kubikurikirana.

Ati “Ntabwo twashyigikira abantu batazwi, twabahagaritse ntabwo ubu barimo kwishyuza abamotari, kandi ntibihagararira aho kuko hagomba gukorwan’iperereza kuko turimo kubikurikirana”.

Mu karere ka Rubavu habarurwamo abamotari barenga 2500 kandi bose kubera ubuhahirane na Repubulika iharanira demokarasi ya Congo bakaba bajyana abagenzi cyangwa bakabakura ku mupaka munini buri kanya kubera gucibwa ariya mafaranga bakaba nabo bongeragaho, abagenzi bakabyinubira.

Aba bishyuzaga abamotari bari barihaye n'imyambaro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .