Rubavu: Polisi yafashe abantu barindwi banywaga bakanakwirakwiza urumogi

Yanditswe na IGIHE
Kuya 16 Ukwakira 2020 saa 09:06
Yasuwe :
0 0

Polisi y’u Rwanda ifatanyije n’abaturage ikomeje ibikorwa byo kurwanya ikoreshwa ry’ibiyobyabwenge mu gihugu cyane mu Karere ka Rubavu. Ku wa Gatatu tariki ya 14 Ukwakira abapolisi bo mu ishami rya Polisi rishinzwe kurwanya ibiyobyabwenge (ANU) bafashe abantu barindwi harimo abarukwirakwizaga ndetse n’abarunywa.

Icyo gikorwa cyabereye mu Mirenge ya Kanzenze na Gisenyi yo mu Karere ka Rubavu. Mu Murenge wa Kanzenze hafatiwe umusore w’imyaka 28, afatanwa udupfunyika 650 tw’urumogi.

Mu Murenge wa Gisenyi mu Kagari ka Bugoyi hafatiwe itsinda ryarimo kunywa urumogi rigizwe n’abasore batandatu.

Umuvugizi wa Polisi mu Ntara y’Iburengerazuba, CIP Bonaventure Twizere Karekezi, yavuze ko hari umugore wafashwe avuye kurangura urumogi, aruhawe n’abantu baturutse muri Repubulika Iharanira Demokarasi ya Congo.

Ati “Umuturage utwara abagenzi kuri moto ni we wahaye amakuru abapolisi avuga ko hari umuntu ahetse kandi afite urumogi yarwambariyeho imyenda. Yageze ku bapolisi barabahagarika, abapolisikazi basaka wa mugore koko basanga afite igipfunyika kirimo urumogi yagishyize ku nda yambariraho imyenda myinshi arangije aheka umwana.”

Uwo mugore yanze kwerura ngo avuge abamuhaye urwo rumogi ariko abapolisi bari bafite amakuru ko ajya kurufata ahantu mu kibaya kiba mu Mudugudu witwa Rugari mu Kagari ka Nyaruteme mu Murenge wa Kanzenze ari naho ahurira n’abantu barukura muri RDC.

CIP Karekezi yakomeje avuga ko ishami rya Polisi rishinzwe kurwanya ibiyobyabwenge ryanakoze igikorwa cyo gufata itsinda ry’abantu bari bazwi ko banywa urumogi.

Ati “Twari dufite amakuru ko hari ahantu hahurira urubyiruko (ku irigara) bakanywa urumogi mu Mudugudu wa Bugoyi mu Kagari ka Bugoyi mu Murenge wa Gisenyi. Mu rwego rwo guca ayo marigara nibwo abapolisi bagiye gufata urwo rubyiruko bahasanga batandatu barimo gusangira urumogi ndetse bamwe barufite mu mifuka.”

Umuvugizi wa Polisi mu Ntara y’Iburengerazuba yashimiye abaturage ku ruhare bakomeje kugaragaza mu kurwanya ibiyobyabwenge bikunze kugaragara muri aka karere. Yasabye n’abandi kujya bihutira gutanga amakuru kugira ngo ibiyobyabwenge birwanywe burundu.

Ati“Ibikorwa dukora byose umunsi ku wundi dufatanya n’abaturage, nibo baduha amakuru y’abacuruza ibiyobyabwenge ndetse n’ababinywa. Abaturage bamaze gusobanukirwa ingaruka z’ibiyobyabwenge haba ku mutekano ndetse no ku buzma bwa muntu ariko ikibabaje cyane urubyiruko rukaba arirwo rukomeje kwijandika mu biyobyabwenge.”

Ingingo ya 263 mu itegeko riteganya ibyaha n’ibihano muri rusange mu gika cyayo cya gatatu ivuga ko umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranije n’amategeko, aba akoze icyaha. Iyo abihamijwe n’urukiko ahanishwa igifungo kitari munsi y’imyaka irindwi ariko kitarenze imyaka icumi n’ihazabu y’amafaranga y’u Rwanda atari munsi ya miliyoni eshanu ariko atageze kuri miliyoni icumi ku byerekeye ibiyobyabwenge byoroheje.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .