Rubavu: Mugisha Denise yatakambye avuga ko yariganyijwe amabuye y’agaciro ya miliyoni 23 Frw

Yanditswe na Mukwaya Olivier
Kuya 28 Gicurasi 2020 saa 04:15
Yasuwe :
0 0

Mugisha Denise yashyize mu majwi Ubushinjacyaha bukorera mu Karere ka Rubavu, avuga ko bwarigishije amabuye ye y’agaciro yo mu bwoko bwa Coltan afite agaciro ka miliyoni 23 Frw.

Aya mabuye y’agaciro yafashwe n’inzego zikorera ku mupaka uhuza Rubavu n’Umujyi wa Goma, nyirayo Mugisha ashinjwa kunyereza imisoro.

Nyuma yo gufatanwa ayo mabuye, uyu mubyeyi yagejejwe imbere y’Ubutabera ndetse akatirwa igifungo cy’amezi atandatu.

Yagize ati “Nyuma y’uko aya mabuye afashwe banjyanye mu rukiko bemeza ko mfungwa umwaka. Narajuriye nabwo bemeza ko mfungwa amezi atandatu. Niyambaje Urukiko Rukuru, Urugereko rwa Musanze ruvanaho igifungo ariko ntegekwa kwishyura imisoro n’amande y’Ikigo cy’Igihugu cy’Imisoro n’Amahoro (RRA).’’

Mugisha yishyuye amafaranga yasabwaga muri RRA ariko agiye gufata amabuye atungurwa no gusanga harimo umucanga uvanze n’amakoro.

Yiyambaje inzego zitandukanye ndetse anegera uwari Umushinjacyaha Mukuru ariko ikibazo cye gikomeza kuba insobe.

Umuvugizi w’Ubushinjacyaha, Nkusi Faustin, yabwiye IGIHE ko nubwo uyu mugore asaba amabuye, urukiko rwasabye ko yajyanwa mu Kigo cy’Igihugu gishinzwe Mine, Peteroli n’umutungo Kamere mu Rwanda.

Yagize ati “Aya mabuye yari yayinjije mu buryo butemewe n’amategeko kuko yanyuze mu nzira zitemewe. Yakwepye Ikigo cy’Igihugu cy’Imisoro n’Amahoro n’Urwego rw’Abinjira n’Abasohoka mu Rwanda, abo avuga bayamwinjirije ntibahanyuze aho. Nta mpapuro zerekana aho amabuye yari avuye, aho yacukuwe, aho akomoka, inyemezabuguzi, ubwoko bwayo ngo bigaragaze niba ari ‘Mangano’ [azwi nka Coltan] avuga.’’

Yavuze ko ikibazo cyajyanywe mu nkiko ayo mabuye aza gupimwa, umuhanga mu by’amabuye y’agaciro agaragaza ko ari Coltan na Gasegereti, apima ibilo 225.

Ati “Yavuze ko agaciro k’ayo mabuye ari miliyoni n’ibihumbi 945 626 Frw. Ayo mabuye aracyari kuri parike, we [Mugisha] icyo atemera n’ayo mabuye.’’

Nkusi yavuze ko usesenguye imanza usanga byaranzuwe ko ayo mabuye asubizwa mu Kigo cy’Igihugu gishinzwe Mine, Peteroli n’umutungo Kamere.

Ati “Uretse kuba ashaka kubisubizwa uyu munsi kandi azi neza ko byinjiye mu buryo butari bwo. Ntiyabitangiye ikirego ngo asabe gusubizwa ibintu bye. Mu rukiko rukuru, ntibyavuzwe aho amabuye ari bujye, bivuze ko agomba gusubizwa kiriya kigo. Na we ari mu rukiko ntiyasabye ko asubizwa ayo mabuye.’’

Mugisha avuga ko ibipimo by’ibanze byatanze ibitandukanye n’ibyagaragajwe nyuma ku mabuye ye.

Yasobanuye ko ku birebana n’umwimerere w’amabuye avuga, bigoranye kuyamenya bitewe n’inzira yaciyemo.

Yagize ati “Ibilo 225 byafatiriwe ntabwo ari echantillon, ibyo asaba ngo twemeze ko aribyo byaciye muri izo nzira zo gukwepa RRA. Iyo aza kuba ari akantu gato byakumvikana ariko ntaho wabihera mu gihe hafashwe ibilo 225 kandi byarapimwe nyuma umuhanga yemeza ubwoko bw’amabuye kandi udufuka tune turahari.”

Yakomeje avuga ko forode ari inzira mbi ku buryo umuntu atabasha kumenya ibiranga amabuye.

Ati “Kunyura mu nzira zo mu mashyamba kandi hari umupaka ni forode ni nacyo kibazo gihari kuko nawe nta mpapuro zemewe zizwi zerekana uko amabuye yapimwe naho yavuye yerekanye kuko ntabwo wakwemera ko ibyo avuga aribyo.’’

Amakuru agera kuri IGIHE ni uko Umushinjacyaha bivugwa ko afite aho ahuriye n’amabuye y’agaciro yaburiwe irengero arimo kubazwa n’Urwego rw’Igihugu rushinzwe Ubugenzacyaha, RIB, n’abavugwa muri iyi dosiye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .