Rubavu: Kutagira irimbi bituma abaturage bashyingura mu ngo

Yanditswe na Mukwaya Olivier
Kuya 18 Mutarama 2020 saa 10:48
Yasuwe :
0 0

Abaturage bo mu mirenge itandukanye mu Karere ka Rubavu, ikikije umujyi wa Gisenyi, bavuga ko bahangayikishijwe no kutagira aho bashyingura, n’iyo bahabonye mu mirima y’abaturage bakababazwa n’uko hakomeza guhingwa bagasaba ubuyobozi kubashakira ahantu bajya bashyingura.

Iki kibazo cyo kutagira aho gushyingura bakigaragarije intumwa z’abadepite ziri mu ruzinduko rwo kureba ibikorwa remezo mu turere dutandukanye.

Mu gihe leta ivuga ko nta muturage wemerewe gushyingura mu rugo, ko ahagomba gushyingurwa ari mu irimbi rusange rizwi; abaturage bo mu mirenge ya Rubavu, Cyanzarwe, Kanama, Kanzenze, Busasamana, Nyakiriba, Nyamyumba bavuga ko nta rimbi bagira ari ukwirwanaho bagashyingura inyuma y’inzu mu murima.

Dushimirimana Illuminate umuturage wo mu murenge wa Nyamyumba, avuga ko bashyingura mu mirima nyuma y’imyaka itanu bagakomeza kuhahinga.

Ati “Iyo umuntu apfuye tumushyingura mu rugo mu isambu iyo uyifite ugashyiraho indabyo gusa hanyuma hashira imyaka itanu bagakomeza kuhahinga. Turasaba leta ko yadushakira irimbi kuko iyo abana bagenda banyura ahashyinguwe ababyeyi babo ntabwo aba ari byiza’’.

Musabyimana Jean Paul wo mu Murenge wa Mudende, avuga ko uwagize ibyago yirwanaho agashaka aho ashyingura agasaba ubuyobozi kubashakira irimbi kuko ryahozeho.

Ati “Buri muntu ashyingura mu murima we cyangwa ahandi abonye, ni ukwirwanaho kuko nta rimbi tugira. Iyo bamaze gushyingura bashyiraho indabo nyuma hakazasibangana bagakomeza kuhahinga. Ubuyobozi bwadufasha tukabona ahantu ho gushyingura kuko twari tuhafite nuko haza umushinga uhatera ibiti’’.

Depite Harerimana Mussa Fazil, ari na we ukuriye itsinda ririmo gusura Akarere ka Rubavu, avuga ko ubuyobozi bwamwijeje ko ikibazo cy’amarimbi kiza gukemuka vuba.

Ati “Ni ukubyihutisha kuko itegeko rivuga ko amarimbi ari aya leta kandi ni umutungo ugengwa n’inzego z’ibanze...akarere katwemereye ko kagiye gukora ibishoboka kugira ngo kabagurire ubutaka bugomba kuba irimbi kandi batangiye kuhashaka igisigaye ni ukwishyura no kureba neza ubwo butaka niba butakenerwa mu buhinzi’’.

Umuyobozi w’akarere wungirije ushinzwe iterambere ry’ubukungu, Nzabonimpa Deogratias, avuga ko ikibazo cy’amarimbi kiri mu mirenge yose ariko ko bateganya gushyiraho amarimbi ahuriweho n’imirenge ituranye.

Ati “Ikibazo cy’amarimbi ni ikibazo rusange mu mirenge yose igize karere kacu, icyo duteganya ni ukubaka amarimbi ahuriweho n’imirenge myinshi ahabasha kugerwa n’ibikorwaremezo nk’imihanda kugira ngo imirenge myinshi ijye ibasha kwifashisha amarimbi macye ku buso dufite kuko ntabwo twanyanyagiza amarimbi muri buri murenge kuko hari aho imirenge ishobora guhurira’’.

Akarere ka Rubavu gafite irimbi rimwe rya Karundo riherereye mu murenge wa Gisenyi ku mupaka wa Congo naryo ryatangiye kuzura, bikaba bigoranye ku mirenge yindi kujya kuhashyingura kuko ari kure bagahitamo gushyingura mu mirima yabo.

Ubuyobozi bw’akarere ka Rubavu bwari bwijeje abaturage bo mu murenge wa Cyanzarwe no mu murenge wa Rubavu ko mu ngengo y’umwaka wa 2016/2017 bazabona irimbi kuko babonye aho rizashyirwa, gusa kugeza ubu abaturage baracyategereje.

Bashyingura mu ngo kubera kutagira irimbi
Depite Harerimana yijeje abaturage ko ikibazo cy'irimbi kigiye gukemuka vuba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .