Rubavu: Koperative y’ababaga ingurube yimwe icyangombwa cy’ubutaka yahawe n’akarere ngo yubake ibagiro

Yanditswe na Mukwaya Olivier
Kuya 29 Kanama 2020 saa 10:26
Yasuwe :
0 0

Abanyamuryango ba Koperative Duhahirane Rubavu (KOPEDURU), ikora akazi ko kubaga ingurube, baravuga ko ubuyobozi bw’akarere bwabahaye ikibanza ariko bukabima icyangombwa cy’ubutaka, ku buryo bamaze umwaka badakora.

Nk’uko bigaragara, ubu butaka babuhawe mu 2014 akaba ari nabwo batangiye kwaka icyangombwa cyabwo none imyaka ibaye itandatu batarakibona.

Dusabemungu Leonard, umunyamuryango wiyi Koperative, avuga ko akarere kabafungiye kabasaba kwimura ibikorwa kandi aho babyimurira abakozi bo mu butaka barabimye icyangombwa cyaho, bagasaba ubufasha kugira ngo bave mu bihombo.

Ati “Ubuyobozi bwaraturangaranye, badufungiye ibagiro ryari ritunze benshi. Ibyo badusabye twarabikoze twegera umurenge batubwira ko ari akarere kadufunze twegereye akarere kadusaba kwimura ibikorwa kandi aho twabyimurira batwimye ibyangombwa byaho”.

Yakomeje agira ati “Twandikiye Meya asaba ko mu butaka baduha icyangombwa ariko n’ubu ntacyo baraduha, turasaba ko badufasha tukabona icyangombwa tukajya gukorera ahabigenewe tukava mu bihombo’’.

Dusabemungu yavuze ko bafite impungenge ko n’aho basanganywe hagurishwa kuko bafashe inguzanyo muri banki ikaba irimo kubabarira kandi badakora, n’aho bakabaye bakorera bakaba badahabwa icyangombwa kugira ngo bakore bishyure.

Mukankubana Margeritte, umunyamabanga wa koperative Duhahirane, avuga ko bahawe ikibanza abakozi b’akarere ka Rubavu bakagiha KOADU ariko nyuma yuko bakigaruje bakaba barimwe icyangombwa kugira ngo bubake ibagiro.

Ati ‘’Twahawe ikibanza gifite nimero 4001 mu butaka bagiha KOADU igifatiraho inguzanyo ya miliyoni 250Frw ariko twagannye ubuyobozi muri 2016 birangira icyangombwa kivuye mu ngwate ariko twibaza icyo turimo kuzira kugira ngo natwe twubake ibagiro rya kijyambere kuko ntitwakubaka tudafite icyangombwa. Ubutaka turabufite ikibura ni icyangombwa’’.

Umuyobozi w’Akarere ka Rubavu, Habyarimana Gilbert, avuga ko akarere kagiye gatanga ubutaka ku bikorera bityo nibigaragara ko babuhawe bazabafasha.

Ati “Hari igihe akarere kagiraga ubutaka kakagenda kabutanga mu buryo butandukanye ariko ubu nta butaka buhari bwo guha abikorera, bigaragaye ko hari ubwo babahaye ibyongibyo twabishyira mu bikorwa kuko ubuyobozi burakomeza turahari tuzabafasha’’.

Koperative Duhahirane Rubavu yashinzwe muri 2004 ihabwa ubuzima gatozi mu 2010 igizwe n’abanyamuryango 60 ikaba imaze umwaka n’amezi atatu yarahagaritswe kubera umwanda yatezaga abayituriye.

Kugeza ubu itegereje ibyangombwa by’ubutaka yahawe mu gace kagenewe amabagiro ka Rutagara kugira ngo nayo yubake iry’ingurube.

Aho bakoreraga hari habangamiye abaturanyi
Aho bakoreraga hashize umwaka hafunzwe
Iyi koperative imaze umwaka idakora
Bavuga ko habayemo uburiganya ikibanza gihabwa indi koperative
Nyuma y'umwaka bafungiwe, aho bakoreraga hajemo ibihuru
Ubuyobozi bwabahaye ikibanza muri 2014

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .