Rubavu: Hari abakibona mu ndorerwamo y’Abagoyi n’Abagogwe

Yanditswe na Mukwaya Olivier
Kuya 22 Ukwakira 2018 saa 09:24
Yasuwe :
0 0

Mu Karere ka Rubavu hari abaturage bakibona mu ndorerwamo y’amoko, ku buryo usanga baka cyangwa bagatanga serivisi zitandukanye babigendeyeho.

Ubushakashatsi ku gipimo cy’ubumwe n’ubwiyunge mu Rwanda bwa 2015, bwagaragaje ko Abanyarwanda 27.9% bakibona mu ndorerwamo y’amoko, aho Akarere ka Rubavu kari ku isonga ku ijanisha rya 74.4%.

Ibi bikaba imbogamizi ku bwiyunge harimo n’ingengabitekerezo ya Jenoside itararanduka ku kigero cyo hejuru.

Ubwo Komisiyo y’Ubumwe n’Ubwiyunge yasuraga Akarere ka Rubavu, mu cyumweru gishize, yanenze ubuyobozi mu nzego zitandukanye ku kuba abaturage bakibona mu ndorerwamo y’amoko ku kigero giteye ubwoba.

Komiseri muri komisiyo y’igihugu y’ubumwe n’ubwiyunge, Padiri Consolateur Innocent, yabwiye abayobozi ko kuba ubwabo bafite amacakubiri ari byo bituma Akarere ka Rubavu kaza imbere mu ngengabitekerezo ya Jenoside.

Yavuze ko hari abakibona mu ndorerwamo y’Abagoyi n’Abagogwe ndetse bakabyitwaza mu buzima bwa buri munsi.

Ati “Amacakubiri niba uyabona mu banyeshuri, ukayabona mu barimu ubwo murashaka iki?. Hari ikibazo nasanze hari Abagoyi n’Abagogwe ku buryo ugiye kwaka serivisi agendera muri ibyo, nukwakira serivisi akavuga ngo uyu mufashe ni uwacu”.

Yakomeje agira ati “Nonese ubu abana mubyara mwifuza ko bazongera gutemana murashaka ko aya mazu mwubaka asenyuka’’.

Perezida wa Komisiyo y’Igihugu y’Ubumwe n’Ubwiyunge, Bishop Rucyahana John, yavuze ko kutagira ubumwe ari byo bituma n’ibikorwa remezo bitandukanye bitubakwa muri aka karere.

Ati “Abana bazanye amacakubiri baraberana mu ndorerwamo y’amoko kandi biragaragara no mu bikorwa by’amajyambere, nk’isoko rya Rubavu ryanga kuzura gute, ninde wariroze mwebwe muraroga mukaroga n’amasoko, iyo mugira ubumwe ririya soko riba ryaruzuye kuriya rimeze niko mugaragara”.

Yakomeje abanenga guhishira abaturage bajya mu bacengezi ntihagire ikivugwa, ababwira ko ingaruka niziza bazazisangira.

Ati “Abana banyu bagenda mu bacengezi hariya hirya, abandi bava hano bakajya gukora inama hariya hakurya bakagaruka kandi bafite imiryango ibireba igaceceka, ariko reka mbabwire ingaruka niziza tuzazisangira’’.

Mudenge Boniface, umurinzi w’igihango avuga ko biterwa n’abantu bakuru ndetse n’abayobozi bagira indimi ebyiri, akaba umuyobozi yagera mu rugo akavuga amacakubiri.

Ati “Hano turacyari inyuma mu bwiyunge biturutse ku bantu bakuru, aho usanga umusore akundana n’inkumi umwe ari umuhutu undi akaba umututsi bakabibona nk’ibibangamye bagashaka no kubabuza”.

Ubuyobozi bw’Akarere ka Rubavu buvuga ko iki kibazo kirimo kuvugutirwa umuti binyuze mu nama z’abaturage, imikoranire n’abanyamadini, ibiganiro mu mashuri biganisha kuri Ndi Umunyarwanda, kandi hari icyizere ko kizakemuka.

Abayobozi n'abakozi mu nzego zitandukanye z'Akarere ka Rubavu
Umuyobozi w'Akarere Habyarimana Gilbert atangiza inama ku mugaragaro
Padiri Consolateur Innocent avuga ko hari abakigendera ku moko y'Abagoyi n'Abagogwe
Bishop Rucyahana John yabwiye abayobozi ko kutagira ubumwe bidindiza n'irindi terambere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza